Tlen kiijkuilok Mateo
1 Ipan ni libro kiijtoua ajkia elkej itatauaj katli uejkajkia itstoyaj tlen Jesucristo,* ikone David, ikone Abrahán.
2 Ikone Abrahán elki Isaac;
ikone Isaac elki Jacob;
ikoneuaj Jacob elkej Judá uan iikniuaj;
3 ikoneuaj Judá elkej Pérez uan Zérah (ininnana elki Tamar);
ikone Pérez elki Hezrón;
ikone Hezrón elki Ram;
4 ikone Ram elki Aminadab;
ikone Aminadab elki Nahsón;
ikone Nahsón elki Salmón;
5 ikone Salmón elki Boaz (inana elki Rahab);
ikone Boaz elki Obed (inana elki Rut);
ikone Obed elki Jesé;
6 ikone Jesé elki tlanauatijketl David.
Ikone David elki Salomón (inana elki isiua Urías);
7 ikone Salomón elki Rehoboam;
ikone Rehoboam elki Abías;
ikone Abías elki Asá;
8 ikone Asá elki Jehosafat;
ikone Jehosafat elki Jehoram;
ikone Jehoram elki Uzías;
9 ikone Uzías elki Jotán;
ikone Jotán elki Acaz;
ikone Acaz elki Ezequías;
10 ikone Ezequías elki Manasés;
ikone Manasés elki Amón;
ikone Amón elki Josías;
11 ikoneuaj Josías elkej Jeconías uan iikniuaj. Inijuantij tlakatkej kema judíos kinuikakej Babilonia.
12 Kema ya kinuikatoyaj Babilonia, ikone Jeconías elki Sealtiel;
ikone Sealtiel elki Zorobabel;
13 ikone Zorobabel elki Abiud;
ikone Abiud elki Eliaquim;
ikone Eliaquim elki Azor;
14 ikone Azor elki Sadoc;
ikone Sadoc elki Aquim;
ikone Aquim elki Eliud;
15 ikone Eliud elki Eleazar;
ikone Eleazar elki Mattán;
ikone Mattán elki Jacob;
16 ikone Jacob elki José, katli mosiuajtik iuaya María. Ya elki inana Jesús, katli kiiljuiaj Cristo.
17 Uajka, elkej 14 tetajmej, pejki ika Abrahán uan tlanki ika David. Sekinok 14 tetajmej pejki ika David uan tlanki kema kinuikakej Babilonia. Uan sekinok 14 tetajmej pejki kema kinuikakej Babilonia uan tlanki hasta Cristo.
18 Ya ni panok kema tlakatki Jesucristo. José kiijtlantoya María, uan kema ayamo monamiktiyaya, ichikaualis Dios* kichijki María ma tlanemilti.* 19 José, katli eliskia iueue, eliyaya se kuali tlakatl uan amo kinekiyaya ma kipinajtikaj María. Yeka moiljuijtoya ichtakatsi kikauas.* 20 Uan kema moiljuik kiampa kichiuas, ¡xikitakaj!, iángel Jehová* monextik kema tlatemikiyaya uan kiiljuik: “José, ikone David, amo ximajmaui timosiuajtis iuaya María pampa ichikaualis Dios kichijtok ma tlanemilti. 21 Ya kipias se pilokichpiltsi uan moneki tijtokaxtis Jesús* pampa ya kinmakixtis maseualmej tlen inintlajtlakoljuaj”. 22 Nochi ni tlamantli panok para ma moaxiti tlen Jehová* kiijtojtoya ika iteokamanalojka:* 23 “¡Xikitakaj! Nopa ichpokatl tlanemiltis uan kitlakatiltis se pilkonetsi, uan kitokaxtisej Emmanuel”, tlen kiijtosneki “Dios* itstok touaya”.
24 Kema José isak,* kichijki tlen iangel Jehová* kinauatik uan mosiuajtik iuaya.* 25 Uan ya amo kinechkauik María hasta kema tlakatki nopa pilkonetsi. Uan José kitokaxtik Jesús.