Nopa achtoui carta tlen kiijkuilok Juan
2 Nopilkoneuaj, niinmechtlajkuiljuilia ni tlamantli para amo intlajtlakolchiuasej. Pero tlaj se akajya tlajtlakolchiua, tijpiaj se totlapaleuijka katli itstok inechka toTata: Jesucristo, katli kichiua tlen xitlauak iixpa Dios.* 2 Ya eli kej se ofrenda* tlen temaktilijtokej por totlajtlakoljuaj para sampa timoyoltlalisej iuaya Dios.* Pero amo san tojuantij techpaleuia, nojkia kinpaleuia nochi maseualmej. 3 Tlaj tijneltokatosej itlanauatiljuaj, nesis para tikixmatij. 4 Katli kiijtoua “Na nikixmati” pero amo kineltoka itlanauatiljuaj, san istlakati uan tlen melauak amo eltok ipan iyolo. 5 Pero tlaj se akajya kineltoka itlajtol Cristo, kinextia nelnelia kiiknelia Dios. Yeka tijmatij para tiitstokej sansejko iuaya. 6 Katli kiijtoua itstok sansejko iuaya moneki kichiuas sanse kej ya* kichijki.*
7 Noikniuaj katli niinmechiknelia, amo niinmechtlajkuiljuilia se yankuik tlanauatili, niinmechtlajkuiljuilia se tlanauatili tlen desde uejkajkia inkipixtokej, kema pejki inmomachtiaj uan inkitokiliaj Cristo. Ni tlanauatili tlen desde uejkajkia inkipixtokej eli nopa tlajtoli tlen inkikajkej. 8 Maske ya nopa niinmechiljuia, niinmechtlajkuiljuilia se yankuik tlanauatili tlen ya kitokilik uan tlen inmojuantij nojkia inkitokilijkej, pampa tsintlayouilotl ixpolijtia uan tlauili tlen melauak ya tlauijtok.
9 Katli kiijtoua itstok ipan tlauili, pero kikualankaita iikni, nojua itstok ipan tsintlayouilotl. 10 Katli kiiknelia iikni, itstok ipan tlauili uan amo onka yon se tlamantli tlen uelis kichiuas ma uetsi.* 11 Pero katli kikualankaita iikni itstok ipan tsintlayouilotl uan nemi ipan tsintlayouilotl uan amo kimati kanke yaui, pampa tsintlayouilotl kichijtok amo ma tlachia.
12 Nopilkoneuaj, niinmechtlajkuiljuilia pampa ika itoka* inmechtlapojpoljuijtokej inmotlajtlakoljuaj. 13 Tetajmej, niinmechtlajkuiljuilia pampa ya inkiixmatij katli itstok desde uejkajkia. Telpokamej, niinmechtlajkuiljuilia pampa inkitlantokej Axkualtlakatl. Konemej, niinmechtlajkuiljuilia pampa ya inkiixmatij toTata. 14 Tetajmej, niinmechtlajkuiljuilia pampa ya inkiixmatij katli itstok desde uejkajkia. Telpokamej, niinmechtlajkuiljuilia pampa intetikej uan itlajtol Dios eltok ipan inmoyolo uan inkitlantokej Axkualtlakatl.
15 Amo xikiknelikaj kej monejnemiltiaj maseualmej katli amo kualmej yon tlamantli tlen inijuantij kichiuaj. Tlaj se akajya kiiknelia ni tlamantli, amo nelnelia kiiknelia toTata. 16 Pampa tlen kiyoltilana totlakayo, tlen kiixtoka toixteyol uan kema timoueyimatij ika tlen tijpiaj, amo uala tlen toTata, uala tlen maseualmej katli amo kualmej. 17 Nojkia, maseualmej katli itstokej ipan Tlaltipaktli uan tlen kinyoltilana, kintsontlamiltisej, pero katli kichiua tlen Dios kineki, itstos para nochipa.
18 Nopilkoneuaj, nopa tonali tlen mokaua ya nechka tlamis. Inmojuantij inkikajkej uala katli kiijixnamiki Cristo.* Nama monextijtokej miakej katli kiijixnamikij Cristo, uan yeka tijmatij nopa tonali tlen mokaua ya nechka tlamis. 19 Inijuantij itstoyaj kampa tojuantij, pero techkajtejkej pampa amo eliyayaj kej tojuantij, pampa tlaj eliskiaj kej tojuantij, mokajtoskiaj touaya. Pero kiskej para nelnelia ma nesi amo nochi eliyayaj kej tojuantij. 20 Inmojuantij inmechtlapejpenijtok ika ichikaualis* Katli Eli Tlatsejtseloltik uan nochi inmojuantij inkimatij tlen melauak. 21 Amo niinmechtlajkuiljuilia pampa amo inkimatij tlen melauak, nijchiua pampa inkimatij uan pampa tlen melauak amo kipia yon se istlakatili.
22 ¿Ajkia istlakati? Katli kiijtoua Jesús amo eli Cristo. Ya ni eli katli kiijixnamiki Cristo: katli amo tlaneltoka ipan toTata uan ipan iKone. 23 Nochi katli amo tlaneltokaj ipan iKone, nojkia amo kuali mouikaj iuaya toTata. Pero katli tlaneltokaj ipan iKone, kuali mouikaj iuaya toTata. 24 Uan tlen inmechmachtijkej tlen Cristo desde uejkajkia ma mokaua ipan inmojuantij. Tlaj tlen inkikajkej desde uejkajkia mokaua ipan inmojuantij, nojkia initstosej sansejko iuaya iKone uan iuaya toTata. 25 Nojkia, ya ni eli tlen ya techtenkauilik: nemilistli tlen amo kema tlamis.*
26 Niinmechtlajkuiljuilia ni tlamantli pampa se keskij kinekij inmechkajkayauasej. 27 Pero inmojuantij pampa Dios inmechtlapejpenijtok* ika ichikaualis uan ichikaualis eltok ipan inmojuantij, amo moneki se akajya ma inmechmachtijto. Pero Dios kitekiuia ichikaualis para inmechmachtis nochi tlamantli uan eli melauak uan amo istlakati. Yeka xiitstokaj sansejko iuaya, sanse kej ichikaualis inmechmachtijtok inkichiuasej. 28 Uajka nopilkoneuaj, nojua xiitstokaj sansejko iuaya, kiampa kema ya monextis, amo timajmauisej tikamanaltisej iuaya, uan kema tlakuepilis* amo timoiyokatlalisej pampa tipinauasej. 29 Tlaj inmojuantij inkimatij ya kichiua tlen xitlauak, nojkia inkimatij nochi katli kichiuaj tlen xitlauak elij ikoneuaj.