Tlen kiijkuilok Mateo
11 Kema Jesús tlanki kiniljuia nopa 12 itokilijkauaj tlake monekiyaya kichiuasej, kistejki nopaya uan yajki tlamachtito uan tlajtolmoyauato ipan sekinok altepemej.
2 Kema Juan Katli teAtsonpoliuiltiyaya tsaktoya uan kimatki tlen Cristo kichiuayaya, kintitlanki itokilijkauaj 3 ma kitlatsintokitij: “¿Ta tieli katli tiualaskia o moneki tijchiasej seyok?”. 4 Jesús kinnankilik: “Xiakaj uan xikiljuikaj Juan tlen inkiitaj uan tlen inkikakij: 5 nama katli amo tlachiayayaj, tlachiaj; katli metskuachotikej, uelij nejnemij; katli kipixtoyaj lepra,* mochikauaj; katli amo tlakakiyayaj, nama tlakakij; katli miktoyaj, moyolkuij; uan katli amo tleno kipiaj, kinmatiltiaj nopa kuali tlamachtili. 6 Yolpaki katli amo tleno kitsakuilia ma nechneltoka”.
7 Kema ya tlakuepiliyayaj, Jesús pejki kinkamanaljuia nopa miakej maseualmej tlen Juan. Kiniljuik: “¿Tlake inkiitatoj ipan uaktok tlali? ¿Se akatl tlen ajakatl kiuiuixoua? 8 Uajka, ¿tlake inkiitatoj? ¿Se tlakatl katli mokentia yoyomitl tlen patiyo?* ¡Katli kitekiuiaj nopa yoyomitl tlen patiyo itstokej ininchaj tlanauatianij! 9 Uajka, ¿kenke inyajkej nopaya? ¿Inkiitatoj se teokamanalojketl?* Niinmechiljuia kena, uan ya eli más que se teokamanalojketl. 10 Ya ni tlen moijkuilok tlen Juan: ‘¡Xikita! ¡Achtoui nijtitlanis notlayolmelajka ma tlayakantia, uan yaya mitskualchijchiuilijtias nopa ojtli!’. 11 Temachtli niinmechiljuia, amo kema onkatok se maseuali más ueyi que Juan Katli teAtsonpoliuiltia. Pero katli amo kipia miak tlanauatili ipan nopa Tlanauatijkayotl tlen eltok iluikak, eli más ueyi que Juan. 12 Kema Juan pejki tlajtolmoyaua, maseualmej pejkej kichiuaj kampeka kalakisej ipan Tlanauatijkayotl tlen eltok iluikak. Uan katli kichijtokej kampeka, kena kalakisej. 13 Pampa tlen kiijkuilojkej nopa Teokamanalouanij uan nopa Tlanauatili,* kinextik tlen panoskia hasta kema Juan pejki tlajtolmoyaua. 14 Tlaj inmechpaktia o amo, ya eli nopa ‘Elías katli ualaskia’. 15 Katli kipia inakas, kuali ma tlakaki.
16 ”¿Kej ajkia elij ni maseualmej? Elij kej konemej katli moseuijtokej kampa mochiua tianguis* uan kintsajtsiliaj katli ininuaya mauiltiaj: 17 ‘Tijpitskej flauta, pero inmojuantij amo inmijtotijkej; tiuikakej se mijkauikatl, pero inmojuantij amo inmoyolixtejtejtsonkej* para inkinextisej inmokuesouaj’. 18 Pampa ualajki Juan, katli amo tlakua yon kii vino, uan maseualmej kiijtouaj: ‘Kipia se amo kuali ajakatl’.* 19 Uan ualajki Katli Eli iKone Se Maseuali,* katli kena tlakua uan kii vino, uan maseualmej kiijtouaj: ‘¡Xikitakaj! Se tlakatl katli sentlakuajtok uan sentlaitok, uan eli ininuampox* katli tlainamaj impuestos uan katli tlajtlakolchiuaj’. Ika nochi tlen kichiua se akajya, nesis tlaj nelia tlalnamiki”.
20 Uajka, pejki kiniljuia tlen amo kuali kichijtoyaj katli itstoyaj ipan nopa altepemej, pampa amo moyolpatlatoyaj maske nopaya kichijtoya miak milagros: 21 “¡Inteikneltikej katli initstokej ipan Corazín uan Betsaida! Pampa tlaj nopa milagros tlen mochijki kampa inmojuantij mochijtoskia ipan Tiro uan Sidón, nima moyolpatlatoskiaj uan motlalilijtoskiaj yoyomitl tlen uapaktik* uan motemilijtoskiaj kuajnextli. 22 Niinmechiljuia, ipan Nopa Tonali Kema Dios Tetlajtolsenkauas, más chikauak inmechtlajtolsenkauasej que Tiro uan Sidón. 23 Uan inmojuantij katli initstokej ipan Capernaúm, ¿inmoiljuiaj inmechuejkapantlalisej hasta iluikak? Amo, inmojuantij intemosej hasta Mijkaostotl.* Pampa tlaj nopa milagros tlen mochijki kampa inmojuantij mochijtoskia ipan Sodoma, uajka katli nopaya itstoyaj nojua itstoskiaj. 24 Niinmechiljuia, ipan Nopa Tonali Kema Dios Tetlajtolsenkauas, más ouij inkimatisej inmojuantij que katli itstoyaj ipan Sodoma”.
25 Teipa, Jesús kiijtok: “Nimitsuejkapantlalia ininixpa sekinok, noTata, toTeko katli tijnauatia iluikaktli uan Tlaltipaktli, pampa kuali tikintlatilijtok nochi ni tlamantli katli ixtlamatij uan tlalnamikij, uan tikinnextilijtok katli elij kej konemej. 26 Kena noTata, pampa ta tikitstok kuali kiampa tijchiuas”. 27 Nojkia kiijtok: “NoTata nechmaktilijtok nochi tlamantli. San noTata kuali nechixmati. Uan san na* kuali nikixmati noTata, uan nojkia kiixmatisej katli na nijneki ma kiixmatikaj. 28 Xiualakaj kampa na, nochi inmojuantij katli chikauak intekitij uan inkipiaj miak inmotlamamal, uan na niinmechyolseseltis.* 29 Xijkechpanokaj nokua uan xijkauakaj ma niinmechmachti, pampa niyolyamanik* uan yon kentsi nimoueyimati. Tlaj initstosej nouaya, kuali inkiyolmatisej. 30 Pampa nokua amo ouij inkiuikasej* uan notlamamal amo etik”.