Nopa ompa carta tlen kiijkuilok Pedro
3 Noikniuaj katli niinmechiknelia, ni eli nopa ompa carta tlen niinmechtlajkuiljuilia, uan sanse kej nopa achtoui carta, nijneki sampa niinmechilnamikilis se keski tlamantli tlen inmechpaleuis kuali inkitekiuisej inmotlalnamikilis, 2 para inkiilnamikisej tlen kiijtojkej teokamanalouanij* katli tlatsejtseloltikej katli uejkajkia itstoyaj, uan nopa tlanauatili tlen toTeko uan toTlamakixtijka* temakak ika inmoapóstoles. 3 Pero moneki inkimatisej ipan itlamia tonali itstosej katli san kipinajtisej tlamantli tlen kuali uan kichiuasej san tlen inijuantij kinyoltilana, 4 uan kiijtosej: “Ya kiijtok tlakuepilis,* ¿pero nama kanke itstok? Pampa desde nopa tonali kema totatauaj katli uejkajkia itstoyaj mijkej, amo tleno mopatlatok, eli sanse desde kema Dios kinchijchijki maseualmej”.
5 Inijuantij kinekij kiilkauasej iluikaktli eltok desde uejkajkia uan Dios kiijtok ika itlajtol tlali uan atl ma moxelo, uan atl kiyaualojtoya tlali. 6 Ika ni tlamantli kitsontlamiltik nochi tlen onkayaya ipan nopa tonali. Ni panok kema tlatemik ipan nochi Tlaltipaktli. 7 Pero ika itlajtol Dios, iluikaktli uan Tlaltipaktli tlen nama eltok, kikajtokej para kitsontlamiltisej ika tlitl uan kiampa eltos hasta kema asis nopa tonali kema Dios* kintlajtolsenkauas maseualmej katli amo kitlepanitaj. Ipan nopa tonali inijuantij kintsontlamiltisej.
8 Pero noikniuaj katli niinmechiknelia, amo xikilkauakaj ni tlamantli: para Jehová* se tonali kiita kej mil xiuitl uan mil xiuitl kiita kej se tonali. 9 Jehová* amo uejkaua para kichiuas tlen kitenkajtok kej se keskij maseualmej moiljuiaj. Ya kipia iyolo ika inmojuantij pampa amo kineki yon se ma poliui, ya kineki nochi ma moyolkuepakaj. 10 Pero nopa tonali tlen iaxka Jehová* ualas kej se tlachtejketl. Ipan nopa tonali iluikaktli ixpoliuis ika se tlamantli tlen chikauak kakistis, uan tlamantli tlen onka ipan iluikaktli uan ipan Tlaltipaktli eltos tlauel totonik, yeka atias. Tlaltipaktli uan nochi tlen onka nopaya, tlatlas.
11 Tlaj nochi tlamantli kiampa atias, inmojuantij moneki inmoiljuisej kenijkatsa inmonejnemiltiaj uan tlen moneki inkichiuasej. Inmojuantij moneki inelisej intlatsejtseloltikej uan amo inkitlauelkauasej Dios 12 kema inkichixtosej uan amo inkiilkauasej nopa tonali tlen iaxka Jehová,* pampa ipan nopa tonali iluikaktli kitsontlamiltisej ika tlitl uan tlamantli tlen ika kichijchijtokej iluikaktli uan Tlaltipaktli atias pampa eltos tlauel totonik. 13 Pero tijchiaj se yankuik iluikaktli uan se yankuik Tlaltipaktli kej Dios techtenkauilijtok, uan nopaya mochiuas tlen kuali.
14 Yeka noikniuaj katli niinmechiknelia, pampa inkichiaj ni tlamantli, xijchiuakaj kampeka para Dios ma inmechita intlapajpaktikej, amo inkipiasej yon se tlamantli tlen amo kuali uan kuali inmouikasej iuaya. 15 Nojkia, xikilnamikikaj pampa toTeko kipia iyolo, uelis timomanauisej, kej nojkia inmechtlajkuiljuilik toikni Pablo katli tikikneliaj, ika nopa tlalnamikilistli tlen Dios kimakak. 16 Ya kiijtok nopa ipan nochi icartas. Pero nopaya onka tlamantli tlen ouij mokuamachilia tlen maseualmej katli amo kuali tlaneltokaj uan amo kuali kikuamachiliaj ni tlamantli, kipajpatlaj kej nojkia kichiuaj ipan nochi sekinok partes tlen iTlajkuilol Dios, uan nopa kichiuas ma kintsontlamiltikaj.
17 Uajka, noikniuaj katli niinmechiknelia, pampa ya inkimatij ni tlamantli, kuali xitlachixtokaj para amo inmechkajkayauasej kej inijuantij kinkajkayajtokej katli amo kuajkualmej ika tlamachtili tlen amo melauak, uan nopa ueliskia kichiuas ayokmo initstosej intemachmej. 18 Más kuali, ximonejnemiltikaj kej kinamiki para toTeko uan toTlamakixtijka Jesucristo nojua más ma kinexti ueyi iyolo ika inmojuantij* uan nojua más kuali xikixmatikaj. Yaya kinamiki ma tijuejkapantlalikaj nama uan para nochipa. Amén.*