Nopa expa carta tlen kiijkuilok Juan
1 Na nieli nopa ueuejtlakatl* uan nimitstlajkuiljuilia ta noikni Gayo, katli nimitsiknelia ika nochi noyolo.
2 Noikni katli nimitsiknelia, nimomaijtoua* para kuali ma kisa nochi tlen tijchiua, kej nama kuali kistok nochi tlen tijchiua uan nojkia para kuali xiitsto. 3 Pampa tlauel niyolpajki kema toikniuaj ualajkej uan nechiljuijkej amo tijtlauelkajtok nopa tlamachtili tlen melauak uan pampa nojua tinemi ipan nopa ojtli tlen melauak. 4 Tlauel niyolpaki kema nijkaki nokoneuaj nojua nemij ipan ojtli tlen melauak.
5 Noikni katli nimitsiknelia, tijnextia tieli titemachtli ika tlamantli tlen tijchiua por toikniuaj maske amo tikinixmati. 6 Inijuantij kiijtojtokej kenijkatsa titeiknelia ininixpa toikniuaj tlen tlanechikoli. Kema kisteuasej, nimitsiljuia xikinpaleui ika tlen monekis uan xijchiua kej Dios* kipaktia. 7 Pampa inijuantij yajkej para kinpouilisej sekinok tlen Dios itoka, uan amo kintlajtlanijkej yon se tlamantli katli amo elij judíos. 8 Yeka tojuantij moneki kuali tikinselisej toikniuaj katli kiampa tlatekipanouaj, kiampa sansejko timopaleuisej para titematiltisej nopa tlamachtili tlen melauak.
9 Nikintlajkuiljuilik toikniuaj tlen tlanechikoli, pero Diótrefes katli nochipa kipaktia tlayakanas kampa inmojuantij, amo kitlepanita yon se tlamantli tlen tojuantij tikijtouaj. 10 Kema nias kampa inmojuantij, nikijtos tlen amo kuali kichiua, kiijtojtinemi miak tlamantli tlen amo kuali tlen tojuantij. Uan amo san ya nopa, nojkia amo kineki kuali kinselis toikniuaj. Uan katli kinekij teselisej, amo kinkaua kiampa ma kichiuakaj uan kineki kinkixtis tlen tlanechikoli.
11 Noikni katli nimitsiknelia, amo xijchiua kej katli kichiuaj tlen amo kuali, xijchiua kej katli kichiuaj tlen kuali. Katli kichiua tlen kuali, kichiua kej Dios. Katli kichiua tlen amo kuali, amo kiixmati Dios.* 12 Nochi inijuantij kiijtouaj Demetrio kichiua tlen kuali, uan kiampa kiijtouaj pampa monejnemiltia ika tlen Dios kiijtoua eli melauak. Tojuantij nojkia kiampa tikijtouaj, uan ta tijmati tlen tikijtouaj nelnelia melauak.
13 Nijnekiskia nimitsiljuis sekinok tlamantli, pero amo san nijneki nikijkuilos ipan se carta. 14 Más kuali, nijneki nima nias nimitsitati uan nikamanaltis mouaya.
Xijpia tlaseuilistli.
Touampoyouaj* katli nikaj itstokej mitsontlajpalouaj. Xikiniljui sejse touampoyouaj katli nopaya itstokej nikintlajpaloua.