Nopa carta tlen kititlanilijkej Tito

2 Pero ta nojua xitepouilijto tlen mouika ika nopa tlamachtili tlen tlauel tepaleuia. 2 Tlakamej katli ya kipiaj más ininxiui moneki kuali kinauatisej tlen kichiuaj ipan ininnemilis uan moneki elisej tlakamej katli nochi kintlepanitaj,* ma kinextikaj kuali tlalnamikij uan ma kipiakaj tetik inintlaneltokilis, ma teiknelikaj uan ma kiijiyouikaj nochi. 3 Nojkia, siuamej katli ya kipiaj más ininxiui kuali ma monejnemiltikaj para ma kiuejkapantlalikaj Dios,* amo ma teistlakauikaj yon ma kiikaj miak vino uan ma tlamachtikaj tlen kuali, 4 kiampa uelis kinconsejomakasej siuamej katli más ichpokamej para ma kiniknelikaj ininueue uan ininkoneuaj, 5 ma kinextikaj kuali tlalnamikij, ma kipiakaj ininnemilis tlapajpaktik, chikauak ma tekitikaj ininchaj, ma kipiakaj kuali ininyolo uan ma kikauakaj ininueue ma kinyakana, kiampa amo aka uelis kiijilnamikis itlajtol Dios.

6 Nojkia, nojua xikinconsejomakato tlakamej katli más telpokamej para ma kinextikaj kuali tlalnamikij, 7 uan xijnexti tijchiua tlen kuali ipan nochi tlamantli para sekinok nojkia ma kichiuakaj kej ta. Xitlamachti tlen tlapajpaktik* uan amo tleno xikajauilmati* 8 uan xitlamachti ika tlajtoli tlen tepaleuia tlen amo aka uelis kitlaijiljuis, kiampa katli tlaijixnamikij mopinaualtisej pampa amo kipiasej yon se tlamantli tlen amo kuali tlen ika uelis techijilnamikisej. 9 Tlatekipanouanij ma kikauakaj inintekouaj ma kinyakanakaj ipan nochi tlamantli: ma kitemolikaj kenijkatsa kinyolpakiltisej, amo ma kinnajnankilikaj 10 uan amo ma kintlachtekilikaj, más kuali ma kinextikaj elij temachmej uan kiampa ipan nochi tlamantli uelis kiyejyekchiuasej itlamachtil toTlamakixtijka,* Dios.

11 Pampa Dios kinextia ueyi iyolo ika nochi maseualmej* uan nopa nesi pampa kichijtok ma momakixtikaj maseualmej tlen kampa ueli euaj. 12 Nopa techmachtia yon kentsi ma tijnekikaj tijchiuasej tlen amo kuali yon ma tijkauakaj ma techyoltilana tlen onka ipan Tlaltipaktli, nojkia ma tijnextikaj kuali titlalnamikij, ma tijchiuakaj tlen xitlauak uan ma tijtekipanokaj Dios ika nochi toyolo ipan ni tonali,* 13 kema tijchiaj ma moaxiti tlen timotemachiaj tijselisej tlen kichiuas tlauel ma tiyolpakikaj uan tijchiaj kema monextisej ika ininueyitilis Dios katli tlauel ueyi uan toTlamakixtijka Jesucristo. 14 Yaya motemaktilik por tojuantij para techmakixtis tlen nochi tlamantli tlen amo kuali uan para kipajpakchiuas se altepetl tlen san ya eli iaxka uan kampa nochi tlauel kinekisej kichiuasej tlen kuali.

15 Nojua xikamanaltito tlen ni tlamantli, xiteconsejomakato uan xitetlakaualtijto ika nochi tlanauatili. Amo xijkaua yon se akajya amo ma mitstlepanita.