Nopa achtoui carta tlen kintitlanilijkej Cristo itokilijkauaj tlen Corinto
12 Noikniuaj, nijneki kuali xijmatikaj tlen nopa yajatili* tlen Dios* temaka ika ichikaualis.* 2 Inmojuantij inkimatij kema ayamo intlaneltokayayaj, sekinok inmechyoltilanayayaj uan inmechchiualtiyayaj xikinueyichiuakaj nopa teteyomej* tlen amo uelij kamanaltij, uan inkichiuayayaj tlen ueli tlamantli tlen inijuantij kinekiyayaj. 3 Pero nijneki xijmatikaj para se katli kamanalti ika ichikaualis Dios amo uelis kitelchiuas Jesús, uan amo aka uelis kiijtos para Jesús eli toTeko tlaj amo kamanalti ika ichikaualis Dios.
4 Onka miak yajatili, pero eli san setsi chikaualistli* katli temaka; 5 onka miak tlamantli tekitl tlen ika uelis tikinpaleuisej sekinok, pero nochi mochiua san para setsi toTeko, 6 uan ichikaualis Dios kinyololinia maseualmej ma kichiuakaj miak tlamantli, pero itstok san setsi Dios katli kichiua nopa tlamantli ika nochi maseualmej. 7 Pero xitlauak nesi kenijkatsa ichikaualis Dios kimaka sejse maseuali se tlenijki para ma kinpaleui nochi. 8 Ichikaualis Dios kipaleuia se akajya ma kamanalti ika tlalnamikilistli, uan nojkia kipaleuia seyok ma kamanalti tlen sekinok amo uelij kimatij; 9 ichikaualis Dios kipaleuia seyok ma tlaneltoka, uan nojkia kipaleuia seyok para uelis techikauas; 10 seyok kipaleuia para ma kichiua milagros, seyok kipaleuia ma tematilti tlen Dios kiijtoua; seyok kipaleuia ma kikuamachili tlaj se tlajtoli* uala tlen Dios o amo; seyok kipaleuia ma kamanalti ipan miak tlajtoli uan seyok kipaleuia ma tlajtolkuepa* ipan miak tlajtoli. 11 Pero nochi ni tlamantli kichiua ichikaualis Dios, katli kipaleuia sejse maseuali kej ya kineki.
12 Pampa sanse kej totlakayo eli san setsi maske kipia miak partes, uan nochi nopa partes mosalouaj* ipan san setsi totlakayo, nojkia kiampa pano ika itlakayo Cristo. 13 Pampa nochi tojuantij, maske tijudíos o tigriegos, titlatekipanouanij o amo, nochi techatsonpoliuiltijkej san ika setsi ichikaualis Dios para ma timosalokaj ipan san setsi itlakayo, uan nochi tijselijkej san setsi chikaualistli.*
14 Totlakayo amo kipia san setsi parte, kipia miak partes. 15 Tlaj toikxi kiijtoskia “Na amo nieli imax ni maseuali, yeka amo nieli se parte tlen itlakayo”, nopa amo kichiuaskia ayokmo ma salijto ipan totlakayo. 16 Uan tlaj tonakas kiijtoskia “Na amo nieli iixteyol ni maseuali, yeka amo nieli se parte tlen itlakayo”, nopa amo kichiuaskia ayokmo ma salijto ipan totlakayo. 17 Tlaj ipan nochi totlakayo san tijpiaskiaj toixteyol, ¿kenijkatsa ueliskia titlakakisej? Uan tlaj ipan nochi totlakayo san tijpiaskiaj tonakas, ¿kenijkatsa ueliskia titlaijnekuisej? 18 Pero Dios kitlalik sejse parte tlen kipia totlakayo kej ya kinejki.
19 ¿Kenijkatsa eliskia totlakayo tlaj nochi eliskia sanse tlamantli? 20 Maske totlakayo kipia miak partes, eli san setsi totlakayo. 21 Toixteyol amo uelis kiiljuis tomax “Amo nijneki motlapaleuil”, yon totsonteko uelis kiiljuis toikxi “Amo nijneki motlapaleuil”. 22 Amo kiampa pano, pampa nopa partes tlen totlakayo tlen nesi más amo tetik, ya nopa más moneki, 23 uan nopa partes tlen totlakayo tlen timoiljuiaj amo tlauel ipati, ya nopa más tijmokuitlauiaj. Kiampa nopa partes tlen totlakayo tlen kichiua ma tipinauakaj, achi más tijpatiitaj 24 uan nopa partes tlen más kuali nesi amo moneki ma tijyejyektlalikaj. Pero Dios kichijchijki totlakayo uan más kimokuitlauik nopa parte tlen más monekiyaya, 25 kiampa nochi nopa partes tlen totlakayo amo moxelosej uan nochi momokuitlauisej. 26 Tlaj se parte tlen totlakayo tlaijiyouia, nochi nopa sekinok partes nojkia tlaijiyouiaj. Tlaj se parte kiuejkapantlaliaj, nochi nopa sekinok partes yolpakij iuaya.
27 Inmojuantij inelij itlakayo Cristo, uan sejse tlen inmojuantij inelij se parte tlen itlakayo. 28 Uan Dios kej ni kintekimakak maseualmej ipan tlanechikoli: achtoui, apóstoles; ika ompa, teokamanalouanij;* ika expa, katli tlamachtiaj; teipa katli kichiuaj milagros; teipa katli uelij techikauaj; katli tlapaleuiaj; katli kimatij tlayakanasej; katli kamanaltij miak tlajtoli. 29 Amo nochi elij apóstoles yon nochi elij teokamanalouanij, yon nochi tlamachtiaj yon nochi kichiuaj milagros, ¿axke? 30 Amo nochi uelij techikauaj yon nochi kamanaltij ipan miak tlajtoli, yon nochi tlajtolkuepaj, ¿axke? 31 Uajka nojua xijchijtokaj kampeka inkiselisej nopa yajatili tlen más uejueyi. Pero nama niinmechnextilis se ojtli tlen más kuali.