Tlen kiijkuilok Mateo

21 Kema itstoyaj nechka Jerusalén uan asitoj Betfagué, ipan tepetl tlen Olivos, Jesús kintitlanki omej itokilijkauaj 2 uan kiniljuik: “Xiakaj ipan ne pilaltepetsi tlen nopaya inkiitaj. Uan kema inasitij, inkipantisej ilpitok se tenanburro iuaya se pilburrojtsi. Xikintojtomakaj uan xinechualikilikaj. 3 Tlaj se akajya inmechiljuis se tlenijki, xikiljuikaj: ‘ToTeko kintekiuis’. Uan nimantsi inmechkauas xikinuikakaj”.

4 Nochi ni tlamantli panok para ma moaxiti tlen Dios* kiijtojtoya ika teokamanalojketl,* katli kiijtok: 5 “Xikiljuikaj iichpoka Sion:* ‘¡Xikita! Motlanauatijka uala kampa ta. Ya yolyamanik* uan tlejkotok ipan se burro, kena, ipan se pilburrojtsi, ikone se tlapiali katli kitlamamaltiaj’ ”.

6 Uajka itokilijkauaj yajkej uan kichijkej nochi tlen Jesús kinnauatik. 7 Kiualikilijkej nopa tenanburro ika ipilburro uan kinpejpechtijkej ika nopa yoyomitl tlen ika moajkoluijkomayayaj* uan ya moseuik iixko.* 8 Miakej maseualmej kisouayayaj ipan ojtli ininyoyo tlen ika moajkoluijkomayayaj; sekinok kimapojpostekiyayaj imakuayo kuauitl uan kitlaliyayaj ipan ojtli. 9 Nojkia, miakej maseualmej katli tlayakantiauiyayaj uan katli yauiyayaj itepotsko,* kuatsajtsitiauiyayaj: “¡Timitstlajtlaniaj* Dios, xijmanaui iKone David! ¡Tlateochiuali katli uala ipan itoka Jehová!* ¡Xijmanaui, timitstlajtlaniaj, ta katli tiitstok iluikak!”.

10 Kema asito Jerusalén, ipan nopa altepetl nochi maseualmej pejkej tlauejchiuaj uan tlatsintokayayaj: “¿Ajkia nopa tlakatl?”. 11 Nopa miakej maseualmej kiijtouayayaj: “¡Eli teokamanalojketl Jesús, katli uala Nazaret tlen tlali Galilea!”.

12 Jesús kalajki ipan teokali uan kinkixtik nochi katli tlanamakayayaj uan tlakouayayaj nopaya. Kiixkuepki* ininmesas katli kipayaniyayaj* tomij uan ininkuabancos katli kinnamakayayaj palomas. 13 Uan kiniljuik: “Ijkuilijtok ‘Nochaj kitokaxtisej kali kampa momaijtouaj’,* pero inmojuantij inkichiuaj kej se kali kampa motlatiaj* tlachtekinij”. 14 Nojkia, ipan teokali kinechkauijkej katli amo tlachiayayaj uan katli metskuachotikej, uan ya kinchikajki.

15 Nopa sacerdotes katli kipiayayaj tlanauatili uan escribas* amo kinpaktik kema kiitakej nopa milagros tlen kichiuayaya uan kema konemej kuatsajtsiyayaj ipan teokali “¡Timitstlajtlaniaj, xijmanaui iKone David!”. 16 Uajka kiiljuijkej Jesús: “¿Tijkaki tlen kiijtouaj?”. Ya kinnankilik: “Kena nijkaki. ¿Amo kema inkipojkej ni: ‘Tijchijtok konemej uan pilkonetsitsij katli nojua chichij ma mitsueyichiuakaj ika ininkamak’?”. 17 Uan kinkajtejki nopaya, kiski tlen nopa altepetl, yajki Betania uan nopaya tonilito.

18 Kema tlakuepiliyaya Jerusalén ika ijnalok, mayanki. 19 Uajka kiitak ojteno se higokuauitl uan monechkauik pero amo kipixtoya itlajka, san ixiuiyo. Uan kiiljuik: “Ayokmo kema sampa xitemaka motlajka”. Nopa higokuauitl nimantsi uajki. 20 Kema itokilijkauaj kiitakej ni tlamantli, mosentlachilijkej uan kiijtojkej: “¿Kenke ni higokuauitl nimantsi uajki?”. 21 Jesús kinnankilik: “Temachtli niinmechiljuia, tlaj intlaneltokaj ika nochi inmoyolo, amo san inkichiuasej tlen nijchiuilik ni higokuauitl, nojkia inkiiljuisej ni tepetl ‘Ximotlanana uan ximomajkaua ipan mar’, uan kiampa panos. 22 Uan nochi tlen intlajtlanij kema inmomaijtouaj, inkiselisej tlaj intlaneltokaj”.

23 Kema kalajki ipan teokali, nopa sacerdotes katli kipiayayaj tlanauatili uan katli kinyakanayayaj judíos kinechkauijkej kema tlamachtiyaya uan kitlatsintokijkej: “¿Ika tlake tlanauatili tijchiua ni tlamantli? ¿Uan ajkia mitsnauatik xijchiua?”. 24 Jesús kinnankilik: “Na nojkia niinmechtlatsintokis se tlamantli. Tlaj innechnankilisej, niinmechiljuis ika tlake tlanauatili nijchiua ni tlamantli. 25 ¿Ajkia kititlanki Juan ma teatsonpoliuilti? ¿Dios katli itstok iluikak o maseualmej?”. Inijuantij pejkej moiljuiaj ipan ni tlamantli. Kiijtouayayaj: “Tlaj tijnankilisej kititlanki Dios, ya techiljuis: ‘Uajka, ¿kenke amo inkineltokakej?’. 26 Pero tlaj tikijtosej kititlankej tlakamej, tijmakasij tlen kiijtosej ni miakej maseualmej pampa nochi kiitaj Juan kej se teokamanalojketl”. 27 Uajka kinankilijkej: “Amo tijmatij”. Uan Jesús kiniljuik: “Na nojkia amo niinmechiljuis ika tlake tlanauatili nijchiua ni tlamantli.

28 ”¿Tlake inmoiljuiaj? Se tlakatl katli kinpixtoya omej ikoneuaj, kiiljuik nopa achtouiejketl: ‘Nokone, xia xitekititi nama kampa nijtoktok uvas’. 29 Ikone kinankilik: ‘Amo nijneki nias’. Pero teipa moyolpatlak uan yajki. 30 Teipa nopa tlakatl nojkia kiiljuito katli teipaejketl. Uan ya kinankilik: ‘Kena notata, na nias’. Pero amo yajki. 31 ¿Ajkia tlen ni omej kichijki tlen itata kinekiyaya?”. Inijuantij kinankilijkej: “Katli achtouiejketl”. Jesús kinnankilik: “Temachtli niinmechiljuia, katli tlainamaj impuestos uan siuamej katli monamakaj* itstokej más nechka que inmojuantij para kalakisej ipan iTlanauatijkayo Dios. 32 Pampa Juan ualajki uan inmechnextilik nopa kuali ojtli, pero inmojuantij amo inkineltokakej. Uan katli tlainamaj impuestos uan siuamej katli monamakaj, kena kineltokakej. Uan maske inkiitakej nopa, amo inmoyolkuepkej yon intlaneltokakej ipan ya.

33 ”Xijkakikaj seyok neskayotl. Se tlakatl katli iaxka se tlali, kitojki uvas uan kiyaualtsajki. Nojkia, tlaxajki kampa kipatskaskiaj uvas uan kichijchijki se uejkapantik kali. Teipa nopa tlali kintlanejtik* se keskij tokanij, uan yajki seyok altepetl. 34 Kema pejkej kitekij uvas, kintitlanki itlatekipanojkauaj kampa nopa tokanij para ma kinmakakaj tlen ya kinamikiyaya kiselis.* 35 Pero nopa tokanij kinitskijkej itlatekipanojkauaj, se kimakilijkej, seyok kimiktijkej uan seyok kitepachojkej.* 36 Katli iaxka nopa tlali sampa kintitlanki más miakej itlatekipanojkauaj. Pero inijuantij nojkia kiampa kinchiuilijkej. 37 Teipa, kititlanki ikone, pampa kiijtouayaya: ‘Kitlepanitasej nokone’. 38 Pero kema nopa tokanij kiitakej ikone, kiijtojkej: ‘Ya ni katli kikauilisej* nochi. ¡Ma tijmiktikaj, kiampa timoaxkatisej ni tlali!’. 39 Uajka kiitskijkej, kikixtijkej tlen kampa kitoktoyaj uvas uan kimiktijkej. 40 Uajka, kema asis katli iaxka nopa tlali, ¿tlake kinchiuilis tokanij?”. 41 Katli kitlakakilijtoyaj, kinankilijkej: “Kintsontlamiltis pampa tlauel amo kualmej. Uan nopa tlali kampa kitoktokej uvas, kintlanejtis sekinok tokanij, katli kimakasej tlen kinamiki kema kitekisej uvas”.

42 Jesús kiniljuik: “ITlajkuilol Dios kiijtoua: ‘Nopa tetl tlen kalchiuanij amo kinejkej kitekiuisej, ya nopa mochijtok nopa ueyi tetl kampa motetonia ome tepamitl.* Ni tetl iaxka Jehová* uan tojuantij tikitaj nelnelia tlauel yejyektsi’. ¿Inmojuantij amo kema inkipojkej? 43 Yeka niinmechiljuia, inmechkixtilisej iTlanauatijkayo Dios uan kimakasej seyok altepetl katli kena temakas itlajka kej kinamiki. 44 Nojkia, katli uetsis ipan ni tetl, tlauel mokokos. Uan tlaj ni tetl uetsis ipani se akajya, kixamanis”.

45 Kema sacerdotes katli kipiayayaj tlanauatili uan fariseos* kikajkej ni neskayotl, kimachilijkej inijuantij kinixkoiljuiyaya. 46 Kinekiyayaj kiitskisej, pero kinmakasiyayaj nopa miakej maseualmej pampa kiitayayaj kej se teokamanalojketl.