Nopa achtoui carta tlen kiijkuilok Pedro
3 Nojkia, insiuamej xijkauakaj inmoueue ma inmechyakana, kiampa tlaj se tlen inijuantij amo kineltoka itlajtol Dios, uelis inkiyoltlanisej ika tlen inkichiuaj maske amo tleno inkiniljuisej, 2 pampa inijuantij kiitasej inmonejnemiltiaj senkistok kuali uan tlauel intlatlepanitaj. 3 Amo ximoyejyekchiuakaj* ika tlamantli tlen nesi san ixkotsi, kej kema moxiljuiaj ika uejueyi tlaxinepaloli,* moyejyekchiuaj ika oro uan yoyomitl tlen tlauel patiyo, 4 más kuali, inmoyejyejka ma nesi ika tlen eltok ipan inmoyolo. Yeka, kejuak ximotlalilikaj se tlamantli tlen yejyektsi kema inkinextiaj tlaseuilistli uan kema inelij inyolyamanikej,* ya nopa katli Dios* tlauel kipatiita uan nopa amo nempoliui. 5 Pampa kiampa moyejyekchiuayayaj siuamej katli uejkajkia itstoyaj katli Dios kiniyokatlalijtoya* uan motemachiyayaj ipan ya. Inijuantij kikauayayaj ma kinyakana ininueue, 6 sanse kej Sara kineltokayaya Abrahán uan kiiljuiyaya noteko. Inmojuantij inelij iichpokauaj tlaj nojua inkichijtosej tlen kuali uan amo tleno inkikauaj ma inmechmajmati.
7 Nojkia, intlakamej nojua xiitstokaj ininuaya inmosiua uan xikinkuamachilikaj. Xikinpatiitakaj kej inkimokuitlauiskiaj se komitl tlen más nima tlapani, pampa inijuantij nojkia kiselisej nemilistli sanse kej inmojuantij pampa Dios kinextik ueyi iyolo,* tlaj amo kiampa inkichiuasej, Dios amo inmechtlakakilis kema inmomaijtosej.*
8 Para nitlamis, nochi xijpiakaj sanse inmotlalnamikilis uan xijkuamachilikaj tlen sekinok kiyolmatij, ximoiknelikaj kej ineliskiaj iniknimej, tlauel xitetlasojtlakaj uan ximoechkapanokaj.* 9 Amo ximomakuepakaj kema inmechchiuiliaj tlen amo kuali yon xikintlaijiljuikaj katli inmechtlaijiljuiaj. Más kuali, xikinchiuilikaj tlen kuali pampa yeka Dios inmechnotski para inkichiuasej ni tlamantli uan kiampa inkiselisej se tlateochiualistli.
10 Pampa “tlaj se akajya kineki kiiknelis inemilis uan itstos ika pakilistli, moneki kinauatis inenepil para amo kiijtos tlen amo kuali uan para amo tlakajkayauas. 11 Ayokmo ma kichiua tlen amo kuali uan ma kichiua tlen kuali; ma kichiua kampeka itstos ika tlaseuilistli ininuaya sekinok uan kiampa ma kichijto. 12 Pampa Jehová* kintlachilia katli kichiuaj tlen xitlauak uan kintlakakilia kema chikauak kitlajtlaniaj se tlenijki, pero Jehová* moikankuepa* para amo kinitas katli kichiuaj tlen amo kuali”.
13 Uajka, ¿ajkia uelis inmechchiuilis tlen amo kuali tlaj inmojuantij tlauel inkinekij inkichiuasej tlen kuali? 14 Pero, maske intlaijiyouiaj pampa inkichiuaj tlen xitlauak, inyolpakij. Uajka, amo xijmakasikaj tlen inijuantij kimakasij* yon ximotekipachokaj. 15 Más kuali, xikitakaj Cristo eli toTeko uan eli tlatsejtseloltik ipan inmoyolo, nochipa ximokualchijchijtokaj para inkimatisej kenijkatsa intlanankilisej kema inmechtlatsintokisej kenke inmotemachiaj inkiselisej se tlenijki, pero xijchiuakaj ika miak tlatlepanitakayotl uan xielikaj inyolyamanikej.
16 Nochipa xijpiakaj kuali inmotlalnamikilis, kiampa maske inmechtlaijiljuisej uan kiijtosej tlen amo kuali tlen inmojuantij, san mopinaualtisej pampa kiitasej kuali inmonejnemiltiaj kej Cristo itokilijkauaj. 17 Pampa más kuali titlaijiyouis pampa tijchiua tlen kuali, tlaj Dios kikaua xitlaijiyoui, uan amo pampa tijchiua tlen amo kuali. 18 Pampa Cristo, katli eli xitlauak, mijki san sempatsi uan para nochipa por inintlajtlakoljuaj katli amo xitlauakej, para ma inmechpaleui inkipantisej Dios. Kimiktijkej kema nojua eliyaya se maseuali, pero kema Dios kiyolkuik kimakak se itlakayo para itstos iluikak. 19 Uajka, yajki kinmatiltito para kintlajtolsenkauasej nopa ángeles katli tsaktoyaj, 20 katli uejkajkia amo tlaneltokakej kema Noé itstoya. Ipan nopa tonali Dios kinextik kipia iyolo kema kichixki ma kitlamichijchiuakaj nopa arca, kampa san se keskij momanauijkej, elkej chikueyij maseualmej* katli momanauijkej kema tlauel tlatemik.
21 Ika tlen panok uejkajkia uelis tikixnextisej ika atsonpoliuilistli, tlen kichiua se akajya ma momakixti* pampa Jesucristo moyolkuik. Kema se akajya moatsonpoliuiltia amo kiijtosneki para mokixtilis tlamantli tlen sokiyo ipan itlakayo, kiijtosneki kitlajtlanis Dios ma kimaka kuali itlalnamikilis. 22 Ya moseuijtok ika imanejmak Dios pampa yajki iluikak, uan ángeles, tekichiuanij uan katli kipiaj tetikayotl yaya kinyakana.