Nopa carta tlen kintitlanilijkej Cristo itokilijkauaj tlen Roma
15 Pero tojuantij katli tijpiaj tetik totlaneltokilis,* moneki tikinpaleuisej katli amo kipiaj tetik inintlaneltokilis,* uan moneki amo tijchiuasej san tlen tojuantij techpaktia. 2 Sejse tlen tojuantij ma tijchiuakaj tlen sekinok kinpaktia uan ma tikinchiuilikaj tlen kuali para tikinyolchikauasej. 3 Pampa yon Cristo amo kichijki san tlen ya kipaktiyaya, amo, panok kej ijkuilijtok: “Nopa tlamantli tlen ika mitsixpanoj, nojkia ika ya nopa nechixpanotokej”. 4 Pampa nochi tlen moijkuilok uejkajkia, moijkuilok para techmachtis uan para ma tijchiakaj tijselisej tlen kuali, pampa iTlajkuilol Dios techyoltlalia uan techpaleuia ma tikijiyouikaj tlen techpano. 5 Dios* katli techyoltlalia uan techpaleuia ma tikijiyouikaj tlen techpano, ma inmechpaleui nochi inmojuantij inkipiasej sanse tlalnamikilistli kej kipixki Cristo Jesús, 6 para sansejko uan ika sanse inmotoskak* xijueyichiuakaj iDios uan iTata toTeko Jesucristo.
7 Yeka, ximoselikaj ika pakilistli se ika seyok sanse kej Cristo nojkia inmechselik ika pakilistli, uan kiampa sekinok kiuejkapantlalisej Dios. 8 Pampa niinmechiljuia Cristo mochijki inintekipanojka judíos,* para kinextis Dios eli temachtli uan para ma kimatikaj nelia moaxitis tlen Dios kintenkauilik inintatauaj katli uejkajkia itstoyaj, 9 uan para nochi katli amo elij judíos ma kiueyichiuakaj Dios pampa tetlasojtla. Sanse kej ijkuilijtok: “Yeka, nimitsueyichiuas ininixpa nochi katli itstokej ipan sekinok altepemej uan nijueyichiuas motoka ika uikatl”. 10 Ya nojkia kiijtoua: “Inmojuantij katli ineuaj ipan sekinok altepemej, xiyolpakikaj iuaya ialtepe”. 11 Uan sejkanok* ipan se kentsi ipan iTlajkuilol Dios nojkia ijkuilijtok: “Xijueyichiuakaj Jehová,* nochi katli amo inelij judíos. Nochi altepemej ma kiueyichiuakaj”. 12 Nojkia Isaías kiijtoua: “Nesis se tlen ichampoyouaj Jesé,* katli uala para mochiuas inintlanauatijka nochi altepemej; maseualmej tlen nochi Tlaltipaktli motemachisej ipan ya”. 13 Dios katli kichiua ma tijchiakaj tijselisej tlen kuali, ma inmechpaleui tlauel inyolpaktosej uan inkipiasej tlaseuilistli pampa inmotemachiaj ipan ya, uan kiampa ichikaualis Dios* kichiuas nojua tlauel ximotemachijtokaj inkiselisej tlen inkichiaj.
14 Noikniuaj, kuali nijmati para inmojuantij nojkia inkinextiaj tlauel kuali inmoyolo uan inkimatij nochi tlamantli,* uan inuelij inmotlajtolmakaj* se ika seyok. 15 Pero, xitlauak niinmechtlajkuiljuilijtok tlen se keski tlamantli para sampa niinmechilnamikilis. Kiampa nijchiua pampa Dios kinextik ueyi iyolo ika na* 16 para ma nieli se itekipanojka Cristo Jesús katli nechtitlanki kampa itstokej katli amo elij judíos. Chikauak nitlatekipanoua ipan nopa tekitl tlen tlatsejtseloltik para nijmoyauas nopa kuali tlamachtili tlen Dios, uan kiampa katli amo elij judíos uelis elisej kej se ofrenda* tlen kiyolpaktia Dios uan tlen yaya kiiyokatlalijtok* ika ichikaualis.
17 Yeka, tlauel niyolpaki pampa nieli se itokilijka Cristo Jesús uan pampa nijchiua nopa tekitl tlen Dios nechmakatok. 18 Pampa amo nimosemakas nikijtos yon se tlamantli tlen na nijchijtok, san nikijtos tlen Cristo kichijtok ika na para ma tlaneltokakaj katli amo elij judíos. Ya uelki kichiua nopa ika tlen na nikijtok uan nijchijki, 19 nojkia ika milagros uan uejueyi tlamantli uan ika tlen ichikaualis Dios ueli kichiua. Yeka ejeliuis* senkistok nijmoyajtok nopa kuali tlamachtili tlen Cristo, desde Jerusalén hasta tlali Ilírico. 20 Yeka nimosentlalik amo nitematiltis nopa kuali tlamachtili kampa ya momoyajtoya Cristo itoka, pampa amo nijneki nitekititos kampa seyok ya kipeualtijtok. 21 Sanse kej ijkuilijtok: “Katli amo kinpouilijkej tlen ya, kiitasej, uan katli amo kikaktokej tlen ya, kikuamachilisej”.
22 Yeka nojkia miakpa nijmatki ouij nias niinmechpaxaloti. 23 Pero nitlamitlajtolmoyajtok ipan nochi ni altepemej, uan ya kipia miak* xiuitl nijnektok nias niinmechitati. 24 Yeka, kema nias para España nijnekiskia niinmechitas uan xinechojkauatij,* pero achtoui nijneki niitstos inmouaya se keski tonali. 25 Namantsi nechka nias Jerusalén para nikinpaleuis toikniuaj* katli nopaya itstokej. 26 Pampa katli itstokej ipan tlali Macedonia uan tlali Acaya, temakatokej tlen kipiaj ika nochi ininyolo uan kintitlanilijtokej se tlapaleuili toikniuaj katli itstokej ipan Jerusalén katli amo tleno kipiaj. 27 Maske nelia temakatokej ika nochi ininyolo, inijuantij kintlauikiliyayaj toikniuaj, pampa tlaj katli amo elij judíos mopaleuijtokej ika nochi nopa tlamantli tlen Dios kinmakatok toikniuaj tlen Jerusalén, uajka nojkia kinamiki ma kinpaleuikaj ika tlen kipiaj. 28 Yeka, kema nijtlamichiuas nopa tekitl uan nikitas nelia kiselijkej nopa tlapaleuili, nias para España uan nipanotikisati kampa inmojuantij initstokej. 29 Nojkia, nijmati kema niinmechpaxaloti niinmechuikilis se ueyi tlateochiualistli tlen Cristo.
30 Noikniuaj, ika toTeko Jesucristo uan ika nopa tlaiknelili tlen temaka ichikaualis Dios, niinmechtlajtlania ika nochi noyolo xijchiuakaj kampeka, sanse kej na nijchiua, ximomaijtokaj* para Dios ma nechpaleui, 31 para amo tleno ma nechchiuilikaj katli amo tlaneltokaj ipan Judea, uan para toikniuaj katli itstokej ipan Jerusalén kuali ma kiselikaj nopa tekitl tlen nijchiuas para nikinpaleuis. 32 Kiampa tlaj Dios kineki, niinmechpaxaloti ika pakilistli uan timoyolchikauasej se ika seyok. 33 Dios katli temaka tlaseuilistli, ma itsto ika nochi inmojuantij. Amén.*