Nopa ompa carta tlen kintitlanilijkej Cristo itokilijkauaj tlen Corinto
6 Kej tiitlapaleuijkauaj Dios,* tojuantij nojkia tiinmechtlajtlaniaj xijselikaj itlateochiualis tlen amo kinamiki tijselisej* uan amo xijchiuakaj ma eli san tlapik. 2 Pampa ya kiijtoua: “Nimitstlakakilik ipan nopa tonali kema kinamikiyaya nimitsteochiuas uan nimitspaleuik ipan nopa tonali kema nitemakixtiskia”.* ¡Nama eli nopa tonali kema Dios techteochiua! ¡Nama eli nopa tonali kema Dios techmakixtia!
3 Amo tijchiuaj yon se tlamantli tlen uelis kintepotlamiltis sekinok, kiampa amo aka uelis kiijilnamikis ni tekitl tlen tijchiuaj. 4 Más kuali, tijnextiaj para tielij tiitekipanojkauaj Dios ika nochi tlen tijchiuaj: kema tikijiyouiaj miak kuesoli, kema titlaijiyouiaj, kema amo tleno tijpiaj, kema tikixnamikij tlaouijkayotl, 5 kema techmakilijkej, kema techtsajkej, kema maseualmej moajkomankej para techteuisej, kema titekitikej chikauak, kema timokochsosolojkej, kema amo titlakuajkej; 6 kema kuali timonejnemiltiaj, kema tijnextiaj ipan tonemilis para tikixmatij tlen melauak, kema tijpiaj toyolo uan tiyolkualmej, kema tijkauaj ichikaualis Dios* ma techyakana, kema amo san titlachiuaj para titeikneliaj, 7 kema tikijtouaj tlen melauak, kema timotemachiaj ipan itetikayo Dios, kema tikitskiaj ika tomanejmak* uan ika tomaarraves* nopa tepostli tlen ika titlateuiaj para tijchiuasej tlen xitlauak; 8 kema techuejkapantlaliaj o kema techpinajtiaj, kema kuali kamanaltij tlen tojuantij o kema techijilnamikij. Techitaj kej titlakajkayauanij maske tikijtouaj tlen melauak; 9 kejuak amo aka techixmatiskia, maske Dios kuali techixmati; kejuak ya nechka timikiskiaj, maske nojua tiyoltokej; kejuak techtlatsakuiltijtoskiaj, maske amo tlanauatijtokej ma techmiktikaj; 10 techitaj kejuak timokuesojtokej, maske nochipa tiyolpaktokej; kejuak titeikneltsitsij, maske tikinmakaj sekinok miak tlamantli tlen kuali; kejuak amo tleno tijpiaskiaj, maske tijpiaj nochi.
11 Noikniuaj katli initstokej Corinto, timokamatlapojtokej para xitlauak tiinmechkamanaljuisej uan tlauel tiinmechikneliaj kejuak tlapojtok toyolo para inmojuantij. 12 Tojuantij amo timotsakuiliaj para tiinmechiknelisej, pero inmojuantij kena inmotsakuiliaj para inkinextisej intechikneliaj. 13 Yeka, niinmechkamanaljuia kejuak ineliskiaj nokoneuaj: xijnextikaj intechikneliaj uan kejuak xijtlapokaj inmoyolo para tojuantij.
14 Amo ximosansejkotilikaj ininuaya katli amo tlaneltokaj.* Pampa, ¿uelis mouikas tlen xitlauak ika tlen amo kuali?* O, ¿mouika tlauili ika tsintlayouilotl? 15 Nojkia, ¿uelis mouikas Cristo iuaya Satanás?* O, ¿uelis mouikas se katli tlaneltoka iuaya se katli amo? 16 Uan nopa teteyomej,* ¿uelis eltos ipan itemplo Dios? Pampa tojuantij tielij itemplo Dios katli yoltok. Pano sanse kej kiijtok Dios: “Na niitstos kampa inijuantij uan ninemis ininuaya, uan na nielis ininDios uan inijuantij elisej noaltepe”. 17 “ ‘Yeka xikisakaj kampa inijuantij uan ximoiyokatlalikaj’,* kiijtoua Jehová,* ‘uan ayokmo xikitskikaj tlen sokiyo’ ”,* “uan na niinmechselis”. 18 “ ‘Uan na nielis kej niinmotata, uan inmojuantij inelisej kej notelpokauaj uan noichpokauaj’, kiijtoua Jehová,* Katli Kipia Nochi Chikaualistli”.*