Apocalipsis
13 Nopa dragón* moketstoya iteno mar kampa onka xali.
Uajka nikitak se fiero tlapiali kisayaya tlen mar. Kipixtoya matlaktli ikuakua uan chikome itsonteko. Ipan sejse ikuakua kipixtoya se corona uan ipan sejse itsonteko kipixtoya tokajyotl tlen ika kiixpano Dios.* 2 Nopa fiero tlapiali tlen nikitak nesiyaya kej se leopardo,* pero iikxiuaj eliyaya kej iikxi se oso uan ikamak eliyaya kej ikamak se león. Uan nopa dragón kimakak nopa fiero tlapiali tetikayotl, iueyi silla uan miak tlanauatili.
3 Nikitak ipan se itsonteko tlauel kikokojkej uan nechka mikiskia, pero kampa tlauel kokojtoya, mochikajki. Uan nochi maseualmej katli itstokej ipan Tlaltipaktli kitokiliyayaj nopa fiero tlapiali uan tlauel kisentlachiliyayaj. 4 Kiueyichijkej nopa dragón pampa kimakatoya tlanauatili nopa fiero tlapiali, uan kiueyichijkej nopa fiero tlapiali uan kiijtouayayaj: “¡Amo itstok yon se kej ni fiero tlapiali! ¿Itstok se akajya katli uelis iuaya moteuis?”. 5 Nopa fiero tlapiali kiselik tlanauatili para kiijtos tlamantli tlen ika moueyimatiyaya uan kiijtos tlen tlauel fiero para kiixpanos Dios, nojkia kiselik tlanauatili para kichiuas san tlen ya kineki ipan eyi xiuitl uan tlajko.* 6 Teipa kitlapok ikamak uan pejki kiijtoua tlajtoli tlen ika kiixpano Dios, tlen ika kiixpano itoka uan kampa itstok, ipan iluikak, nopa kiijtosneki katli itstokej nopaya. 7 Kikauilijkej ma kinteui katli tlatsejtseloltikej* uan ma kintlani, uan kimakakej tlanauatili ipan nochi uejueyi familias,* pilaltepetsitsij, maseualmej katli kamanaltij sekinok tlajtoli uan altepemej. 8 Uan nochi katli itstokej ipan Tlaltipaktli kiueyichiuasej. Desde kema pejki Tlaltipaktli* yon se tlen inijuantij amo ijkuilijtok inintoka ipan nopa amamimili tlen iaxka nopa Pilborregojtsi katli kimiktijkej. Nopa amamimili kiijtoua ajkia inijuantij kiselisej nemilistli.
9 Tlaj se akajya kipia inakas, ma tlakaki. 10 Tlaj se akajya moneki kitsakuasej, uajka kitsakuasej. Tlaj se akajya temiktia ika espada,* nojkia kimiktisej ika espada.* Yeka katli tlatsejtseloltikej moneki kiijiyouisej uan tlaneltokasej.
11 Uajka nikitak seyok fiero tlapiali tlen kiski tlalijtik. Kipixtoya ome ikuakua kej se pilborregojtsi, pero pejki kamanalti kej se dragón. 12 Uan kipia sanse tlanauatili kej nopa achtoui fiero tlapiali tlen itstok iixpa. Kichiua nochi katli itstokej ipan Tlaltipaktli ma kiueyichiuakaj nopa achtoui fiero tlapiali, tlen kikokojkej uan nechka mikiskia, pero teipa mochikajki. 13 Uan kichiua uejueyi tlaneskayotl,* hasta kichiua ipan Tlaltipaktli ma temo tlitl tlen iluikak ininixpa maseualmej.
14 Kinkajkayaua katli itstokej ipan Tlaltipaktli ika nopa tlaneskayotl tlen kikauilijkej ma kichiua iixpa nopa achtoui fiero tlapiali. Uan nojkia kiniljuia katli itstokej ipan Tlaltipaktli ma kichiuilikaj iixkopinka nopa fiero tlapiali, tlen kokojtoya ika se espada pero mochikajki. 15 Nopa ompa fiero tlapiali kikauilijkej ma kimaka nemilistli* iixkopinka nopa achtoui fiero tlapiali. Kiampa iixkopinka nopa fiero tlapiali ueliskia kamanaltis uan tlanauatis ma kinmiktikaj nochi katli amo kinekij kiueyichiuasej.
16 Nochi, katli pilsiltsitsij* o katli ya uejueyij, katli tlatominpiaj uan katli amo, katli tlatekipanouaj uan katli amo, kinchiualtia ma kintlalilikaj se marca ipan ininmanejmak o ininkuaixpa 17 para yon se katli amo kipia nopa marca uelis tlakouas o tlanamakas, san uelis kiampa kichiuas katli kipia nopa marca, itoka nopa fiero tlapiali o inúmero. 18 Katli tlalnamiki ma kicuentajchiua inúmero nopa fiero tlapiali, pampa nopa número eli para maseualmej uan inúmero eli 666. San katli tlalnamiki kikuamachilis ni tlamantli.