Nopa achtoui carta tlen kiijkuilok Pedro

5 Uajka, na katli nojkia nieli se ueuejtlakatl, nikitak kenijkatsa kitlaijiyouiltijkej Cristo uan na nojkia nijselis nopa ueyitilistli tlen monextis, nikintlajtlania ueuejtlakamej katli itstokej kampa inmojuantij: 2 kej intlayakananij,* xikinmokuitlauikaj ipilborregojuaj Dios* katli inmechmakatokej para inkinmokuitlauisej; amo xijchiuakaj san pampa kiampa moneki inkichiuasej, xijchiuakaj ika pakilistli iixpa Dios. Nojkia amo xijchiuakaj pampa inkinekij inkitlanisej tomij, xijchiuakaj pampa nelnelia inkinekij inkinpaleuisej, 3 yon xijchiuakaj kejuak ineliskiaj ininteko katli iaxkauaj Dios, más kuali xijchiuakaj tlen kuali, kiampa nojkia kichiuasej sanse kej inmojuantij. 4 Uan kema monextis nopa tlamokuitlauijketl katli más tlayakana, inmojuantij inkiselisej nopa corona tlen tlauel yejyektsi tlen amo pilini.

5 Nojkia inmojuantij katli más intelpokamej, xijkauakaj ma inmechyakanakaj tlakamej katli más uejueyij. Pero nochi inmojuantij xijnextikaj amo inmoueyimatij se ika seyok, pampa Dios amo kuali kinita katli moueyimatij, pero kinextia ueyi iyolo ika maseualmej* katli moechkapantlaliaj.

6 Uajka, xijkauakaj ma inmechyakana Dios katli kipia tetikayotl,* kiampa ya inmechuejkapantlalis ipan nopa tonali kema kinamiki, 7 uan xijkauakaj imako nochi tlen inmechkuesoua, pampa ya motekipachoua por inmojuantij. 8 ¡Xijnextikaj kuali intlalnamikij uan kuali xitlachixtokaj! Inmokualankaitakaj Diablo nemi kampa inmojuantij kej se león tlen nanalkatinemi uan kitemojtinemi ajkia kikuas. 9 Pero xikijixnamikikaj Diablo, kuali xitlaneltokakaj, uan xikilnamikikaj ipan nochi Tlaltipaktli toikniuaj nojkia kiixnamikij sanse tlaijiyouilistli kej inmojuantij. 10 Uan kema ya intlaijiyouijtosej se kentsi tonali, Dios katli kipia ueyi iyolo,* katli inmechnotski para initstosej iuaya Cristo uan para inmechuejkapantlalisej para nochipa, yaya inmechtlamikualchijchiuas. Ya kichiuas xielikaj intemachmej, ya kichiuas xielikaj intetikej uan inmechtlalis kampa amo aka inmecholinis. 11 Yaya nochipa ma kipia tetikayotl. Amén.*

12 Silvano,* katli nikita kej se noikni katli temachtli, nechpaleuik ma niinmechtlajkuiljuili se keski tlajtoli para niinmechyolchikauas uan para xijmatikaj Dios nelnelia kinextijtok ueyi iyolo ika inmojuantij.* Uan amo xijkauakaj nopa tlamantli. 13 Nopa siuatl* katli itstok Babilonia katli kitlapejpenijtokej sanse kej inmojuantij, inmechontlajpaloua, uan nojkia nokone Marcos. 14 Ximotlajpalokaj se ika seyok uan ximotsoponikaj kej iniknimej.*

Nochi inmojuantij xijpiakaj tlaseuilistli, katli initstokej sansejko iuaya Cristo.