Nopa ompa carta tlen kiijkuilok Pedro
2 Pero sanse kej ipan Israel itstoyaj teokamanalouanij katli san tlakajkayauayayaj,* nojkia kampa inmojuantij itstosej tlamachtianij katli san tlakajkayauasej. Inijuantij ichtakatsi kichiuasej ximoxelokaj* kema tlamachtisej tlen amo melauak para ayokmo xitlaneltokakaj, uan hasta kiuejkamajkauasej ininteko katli kinkojki, nopa kichiuas nimantsi ma kintsontlamiltikaj. 2 Nojkia, miakej kichiuasej kej inijuantij pampa ayokmo pinauasej tlajtlakolchiuasej,* uan pampa kiampa kichiuasej, kiijtosej tlen amo kuali tlen nopa ojtli tlen melauak. 3 Nojkia pampa inijuantij tlauel kiixtokasej tlen sekinok ininaxka, kitekiuisej tlajtoli tlen ika inmechkajkayauasej. Pero desde uejkajkia moijtok kintlatsakuiltisej, uan amo uejkauas para kiampa mochiuas uan nelnelia kintsontlamiltisej.
4 Dios* kintlatsakuiltik ángeles katli tlajtlakolchijkej uan kintlauisok* ipan Tártaro,* uan kinilpik ika cadenas* kampa tlauel tsintlayoua para teipa kintlajtolsenkauas. 5 Nojkia kintlatsakuiltik maseualmej katli itstoyaj ipan Tlaltipaktli kema Noé itstoya, pero kimanauik Noé, katli tepouiliyaya tlen xitlauak, uan sekinok chikomej maseualmej kema kichijki ma uetsi miak atl kema itstoyaj katli amo tlatlepanitayayaj. 6 Uan nojkia kintlatsakuiltik altepemej Sodoma uan Gomorra kema kintlamitlatik uan san mokajki kuajnextli, kiampa kinextik tlake kinpanos katli amo tlatlepanitaj. 7 Nojkia kimanauik Lot katli kichiuayaya tlen xitlauak, uan tlauel mokuesouayaya pampa katli kichiuayayaj tlen amo kuali* amo pinauayayaj tlajtlakolchiuasej, 8 pampa ni tlakatl katli kichiuayaya tlen xitlauak mojmostla moyolkokouayaya kema kiitayaya uan kikakiyaya katli nopaya itstoyaj kichiuayayaj tlen amo kuali. 9 Uajka Jehová* kimati kenijkatsa kinmanauis katli kitekipanouaj ika nochi ininyolo kema kiixnamikij tlaouijkayotl, uan katli kichiuaj tlen amo kuali kiniyokatlalijtok para kintsontlamiltis ipan nopa tonali kema tetlajtolsenkauas, 10 uan más katli kitemouaj motekasej ininuaya sekinok para kichiuasej ma sokiyoua inintlakayo uan amo kintlepanitaj katli kipiaj tlanauatili.
Pampa amo pinauaj kichiuasej se tlenijki uan tochontikej, amo majmauij kintlaijiljuisej katli Dios kinuejkapantlalijtok. 11 Pero maske ángeles elij más tetikej uan kipiaj más chikaualistli, amo kintlateljuiaj ika fiero tlajtoli pampa kitlepanitaj Jehová.* 12 Pero ni tlakamej kiijtouaj tlen amo kuali maske amo tleno kimatij, elij kej tlapialmej tlen amo tlalnamikij tlen tlakatij para kinmasiltisej uan kinmiktisej. Inijuantij kintsontlamiltisej pampa kichiuaj tlen amo kuali, 13 uan tlaijiyouisej. Nopa elis inintlaxtlauil pampa amo kuali monejnemiltiaj.
Tlauel kinekij kichiuasej tlen kiyoltilana inintlakayo, uan kiampa kichiuaj maske eli tonaya. Inijuantij elij kej manchas tlen kisokiuia tlanechikoli, uan tlauel kinpaktia tlakajkayauasej ika tlamachtili tlen amo melauak kema iljuichiuaj inmouaya. 14 Inijuantij tlauel kinekij momekatisej* uan amo uelij kikauaj tlajtlakoli, uan kinyoltilanaj katli nojua ayamo kuali tlaneltokaj para nojkia kiampa ma kichiuakaj. Ininyolo tlauel kiixtoka tlen sekinok ininaxka. Inijuantij elij tlatelchiualmej. 15 Pampa kitlauelkajtokej nopa ojtli tlen xitlauak, nama chikokistokej. Kitokilijtokej iojui Balaam ikone Beor, ya kichijki tlen amo kuali pampa tlauel kinejki ma kitlaxtlauikaj, 16 pero kitlakaualtijkej pampa kiixpanok tlen xitlauak. Se burro tlen amo ueli kamanalti, kamanaltik kej se maseuali uan kitsakuilik nopa teokamanalojketl* para amo ma kichiua se uiuiyotl.
17 Inijuantij elij kej kampa meya atl tlen uaktok uan kej ayauitl tlen se chikauak ajakatl kiuika, uan ya kiixtlalijtokej kintlalisej kampa más tsintlayoua. 18 Kiijtouaj tlajtoli tlen ika kinextiaj moueyimatij uan tlen amo tepaleuia. Inijuantij amo pinauaj tlajtlakolchiuasej, uan kichiuaj maseualmej sampa ma kinyoltilana tlen amo kuali pampa kinyololiniaj sampa ma kichiuakaj tlen ayokmo kichiuayayaj. 19 Maske kiniljuiaj itstosej kej majkajtokej,* inijuantij kitekipanouaj tlen amo kuali. Pampa kema se akajya kitlanij,* mochiua itlatekipanojka katli kitlanki. 20 Uajka, tlaj ayokmo kichiuayayaj tlamantli tlen sokiyo tlen kichiuaj ipan Tlaltipaktli pampa kuali kiixmatkej toTeko uan toTlamakixtijka* Jesucristo, uan sampa kichiuaj tlen achtouia kichiuayayaj uan ni tlamantli kintlani, nama más fiero kichiuaj que achtouia. 21 Tlauel kuali tlaj inijuantij amo senkistok kimajtoskiaj nopa ojtli tlen xitlauak uan nopa tlanauatili tlen tlatsejtseloltik tlen kinmakakej, pampa nama eli más fiero pampa maske ya kimatiyayaj, kitlauelkajtokej. 22 Kinpanotok kej kiijtoua ni tlajtoli: “Se chichi sampa kikua iisotlal, uan se pitso tlen kialtijkej,* sampa mosokimimiloua”.