Apocalipsis

14 Uajka nikitak nopa Pilborregojtsi ijkatok ipan tepetl Sion, ininuaya 144 mil katli ijkuilijtok ininkuaixpa itoka nopa Pilborregojtsi uan itoka iTata. 2 Nijkajki kakistiyaya se tlamantli ipan iluikak; kakistiyaya kej kema motepexiuia miak atl uan kej kema chikauak tlatomoni. Tlen nijkajki kakistiyaya kej kema uikaj katli kitsotsonaj arpas. 3 Inijuantij uikaj iixpa nopa ueyi silla, ininixpa nopa nauij ángeles uan ininixpa ueuejtlakamej, uan kakistiyaya kejuak se yankuik uikatl. San nopa 144 mil katli Dios* kinkojki tlen ni Tlaltipaktli ueliyayaj uikaj nopa uikatl. 4 Inijuantij amo auilnentokej ika siuamej, uan elij kej katli amo kema motektokej iuaya se akajya. Inijuantij yauij kampa ueli kampa yaui nopa Pilborregojtsi. Elij katli achtoui kinkojkej tlen nochi maseualmej, kej achtoui pixkistli tlen kimaktiliaj Dios uan nopa Pilborregojtsi, 5 uan amo kiijtojkej yon se tlamantli tlen ika tlakajkayajkej, amo kipiaj yon se tlamantli tlen amo kuali.

6 Nikitak seyok ángel patlantinemiyaya tlatlajko tlen iluikaktli. Kipixtoya kuali tlamachtili tlen uejkauas para nochipa tlen monekiyaya kinmatiltis katli itstokej ipan Tlaltipaktli: nochi altepemej, uejueyi familias,* nochi maseualmej katli kamanaltij sekinok tlajtoli uan pilaltepetsitsij. 7 Chikauak kiijtouayaya: “Xijmakasikaj Dios uan xijueyichiuakaj pampa ya asik hora para kintlajtolsenkauasej maseualmej. Yeka, xijueyichiuakaj katli kichijchijki iluikaktli, Tlaltipaktli, mar uan kampa meya miak atl”.*

8 Teipa ualajki nopa ompa ángel tlen kiijtouayaya: ¡Ya uetski! ¡Ya uetski Ueyi Babilonia! Ya kichiua nochi altepemej ma kiikaj ivino, nopa eli kema tlauel kineki auilnemis.*

9 Uan nopa expa ángel kintokilik, uan chikauak kiijtouayaya: “Tlaj se akajya kiueyichiua nopa fiero tlapiali uan iixkopinka, uan kiselia se marca ikuaixpa o ipan imax, 10 nojkia kiis Dios ivino, tlen eli ikualankayo. Ni eli senkistok vino tlen Dios kitejki ipan nopa copa tlen eli ikualankayo, uan kitlaijiyouiltisej ika tlitl uan azufre ininixpa nopa ángeles katli tlatsejtseloltikej uan iixpa nopa Pilborregojtsi. 11 Para nochipa tlejkos nopa poktli tlen kisa kampa kintlaijiyouiltiaj.* Uan katli kiueyichiuaj nopa fiero tlapiali uan iixkopinka uan katli kiseliaj nopa marca tlen ya itoka, amo mosiajketsasej tonaya uan tlayoua. 12 Yeka, katli Dios kiniyokatlalijtok,* katli kichiuaj Dios itlanauatiljuaj uan katli nojua kuali tlaneltokaj ipan* Jesús, moneki kiijiyouisej nochi”.

13 Uan nijkajki se akajya desde iluikak kiijtok: “Xikijkuilo ni: ‘Desde nama ma pakikaj itokilijkauaj toTeko katli mikij; kena, ichikaualis Dios* kiijtoua, ma mosiajketsakaj ika nopa tekitl tlen kichiuayayaj, pampa Dios amo kiilkauas nochi tlen kichijkej’ ”.*

14 Uajka nikitak se mixtli chipauak, uan nopaya itstoya se akajya katli nesiyaya kej ikone se maseuali* katli moseuijtoya ipan mixtli; kipixtoya ipan itsonteko se corona tlachijchiuali ika oro uan kiitskitoya se tepostli tlen eli kej se cuchillo uijkoltik* tlen kuali tlatentili.

15 Seyok ángel kiski tlen nopa teokali* uan chikauak kitsajtsilik katli moseuijtoya ipan mixtli: “¡Peua xijtekiui nopa tepostli uijkoltik uan xipixka pampa ya asik tonali para tipixkas, pampa ya chikauixtok nochi tlen tijpixkas!”. 16 Uan katli moseuijtoya ipan nopa mixtli, kikalakik nopa tepostli uijkoltik ipan Tlaltipaktli uan kipixkak tlen nopaya toktoya, uan kiampa pixkakej ipan Tlaltipaktli.

17 Seyok ángel kiski tlen nopa teokali tlen eltoya iluikak; ya nojkia kipixtoya se tepostli uijkoltik tlen kuali tlatentili.

18 Uan ipan nopa tlaixpamitl kiski seyok ángel katli kimakatoyaj tlanauatili para ma kinauati tlitl. Uan chikauak kikuatsajtsilik katli kipixtoya nopa tepostli tlen kuali tlatentili: “¡Peua xijtekiui nopa tepostli uijkoltik tlen kuali tlatentili uan xijsentili nopa uvatsontli kampa tlaktok tlen eltok ipan Tlaltipaktli, pampa nopa uvas ya iksitok!”. 19 Nopa ángel kikalakik nopa tepostli uijkoltik ipan Tlaltipaktli uan kitsontejki nopa uvakuauitl, uan kitlauisok* kampa kipatskaj nopa uvas, tlen kiixnextia ikualankayo Dios. 20 Kauayojmej ipan mokejketskej nopa uvas iteno nopa altepetl, uan nopa estli tlen kiski nopaya, tlamiyaya hasta ipan ininkamachal nopa kauayojmej uan moxoyajki se 296 kilómetros.*