Apocalipsis
7 Teipa nikinitak nauij ángeles ijkatokej ipan naui lados tlen Tlaltipaktli. Kitsakuilijtoyaj nopa naui ajakatl tlen uala ipan naui lados tlen Tlaltipaktli, para amo ma tlaajaka ipan Tlaltipaktli yon ipan mar yon ipan se kuauitl. 2 Nojkia nikitak seyok ángel katli tlejkoyaya desde kampa kisa Tonati uan kiuikayaya se tlamantli tlen Dios* kimakatoya para ma kintlalili maseualmej se marca, uan chikauak kinkuatsajtsilik nopa nauij ángeles katli kinmakakej tlanauatili para ma kinempolokaj Tlaltipaktli uan mar. 3 Kiniljuik: “¡Amo xijnempolokaj Tlaltipaktli yon mar yon kuauitl hasta kema tikintlalilisej ininkuaixpa nopa marca itekipanojkauaj toDios!”.
4 Uan nijkajki keskij eliyayaj katli kintlalilijkej nopa marca: 144 mil katli kinmarcarojkej, nochi tlen nopa uejueyi familias* tlen ikoneuaj Israel.
5 Tlen nopa ueyi familia tlen Judá, 12 mil kintlalilijkej nopa marca;
tlen nopa ueyi familia tlen Rubén, 12 mil;
tlen nopa ueyi familia tlen Gad, 12 mil;
6 tlen nopa ueyi familia tlen Aser, 12 mil;
tlen nopa ueyi familia tlen Neftalí, 12 mil;
tlen nopa ueyi familia tlen Manasés, 12 mil;
7 tlen nopa ueyi familia tlen Simeón, 12 mil;
tlen nopa ueyi familia tlen Leví, 12 mil;
tlen nopa ueyi familia tlen Isacar, 12 mil;
8 tlen nopa ueyi familia tlen Zabulón, 12 mil;
tlen nopa ueyi familia tlen José, 12 mil;
tlen nopa ueyi familia tlen Benjamín, 12 mil kintlalilijkej nopa marca.
9 Teipa nikinitak tlauel miakej maseualmej tlen amo aka ueliyaya kinpoua. Eliyayaj maseualmej tlen nochi altepemej, uejueyi familias, pilaltepetsitsij, maseualmej katli kamanaltij sekinok tlajtoli, inijuantij ijkatoyaj iixpa nopa ueyi silla uan iixpa nopa Pilborregojtsi. Moyoyontijtoyaj ika se yoyomitl ueueyak* uan chipauak uan kiitskitiauiyayaj imakuayo apachkuauitl. 10 Uan chikauak kitlaskamatiliyayaj uan kiijtouayayaj: “¡ToDios, katli moseuijtok ipan nopa ueyi silla, uan nopa Pilborregojtsi, inijuantij techmakixtijtokej!”.*
11 Nochi ángeles ijkatoyaj uan kiyaualojtoyaj nopa ueyi silla, uan nojkia kinyaualojtoyaj nopa ueuejtlakamej uan nopa nauij ángeles; uan motlankuaketskej iixpa nopa ueyi silla uan kiueyichijkej Dios. 12 Kiijtojkej: “¡Amén!* ToDios katli kipia tlalnamikilistli, tlanauatili uan tetikayotl, moneki ma kiueyichiuakaj, ma kiuejkapantlalikaj, nochi ma kitlepanitakaj uan nochipa ma kitlaskamatilikaj. Amén”.
13 Uajka, se tlen nopa ueuejtlakamej nechtlatsintokik: “¿Ajkia elij katli moyoyontijtokej ika ininyoyo ueueyak* uan chipauak? ¿Uan kanke euaj?”. 14 Uajka nimantsi nijnankilik: “NoTeko, nopa ta tijmati”. Uajka ya nechiljuik: “Inijuantij elij katli momanauiaj tlen nopa ueyi tlaijiyouilistli; kichikuenijtokej ininyoyo tlen ueueyak uan kichipajtokej ika ieso nopa Pilborregojtsi. 15 Yeka itstokej iixpa ipan iueyi silla Dios uan kitekipanouaj tonaya uan tlayoua ipan nopa teokali. Uan katli moseuijtok ipan nopa ueyi silla kinchijchiuilis se yoyonkali para kinmanauis. 16 Ayokmo kinpolos tlen kikuasej yon tlen kiisej; nojkia Tonati ayokmo tleno kinchiuilis yon tonaltlatlasej. 17 Pampa nopa Pilborregojtsi tlen itstok tlatlajko kampa nopa ueyi silla, kej se tlapialmokuitlauijketl kinmokuitlauis uan kinyakanas kampa meya* miak atl tlen temaka nemilistli. Uan Dios kiuatsas ininixayo”.