Apocalipsis

22 Uajka ya nechnextilik se ueyatl tlen temaka nemilistli, tsalantik uan petlaniyaya, tlen kisayaya ipan iueyi silla Dios* uan tlen nopa Pilborregojtsi, 2 uan nopa ueyatl yauiyaya tlatlajko tlen nopa ueyi ojtli tlen nopa altepetl. Ipan sejse lado tlen nopa ueyatl onkayaya kuatinij tlen temaka nemilistli, uan nopa kuatinij temakayayaj inintlajka 12 ueltas ipan se xiuitl, kiijtosneki sejse metstli tlakiyaya. Uan ixiuiyo nopa kuatinij kinchikauayaya altepemej.

3 Uan Dios ayokmo kitelchiuas nopa altepetl, pampa iueyi silla Dios uan nopa Pilborregojtsi eltos ipan nopa altepetl. Uan itekipanojkauaj kitekipanosej, 4 kiitasej ixayak uan ininkuaixpa ijkuilijtos itoka. 5 Nojkia ayokmo onkas youali, uan ayokmo monekis ma kintlauili se tlauili yon monekis ma kintlauili Tonati, pampa Jehová* Dios kintlauilis uan inijuantij tlanauatisej para nochipa.

6 Nopa ángel nechiljuik: “Ni tlajtoli eli temachtli uan melauak. Kena, Jehová* Dios, katli kichijki ma kamanaltikaj nopa teokamanalouanij,* kititlantok iángel para kinnextilis itekipanojkauaj tlen nechka panos. 7 Xikita, nechka niualas. Yolpaki katli kichiua tlen Dios tematiltik ipan ni amamimili”.

8 Na niJuan, nijkajki uan nikitak ni tlamantli. Kema ya nikitstoya uan ya nijkaktoya, nimotlankuaketski iixpa nopa ángel katli nechnextilik ni tlamantli para nijueyichiuas. 9 Pero ya nechiljuik: “¡Amo! ¡Amo xijchiua nopa! Na san nieli se tlatekipanojketl kej ta uan nojkia moikniuaj, katli elij teokamanalouanij uan kej katli kichiuaj tlen kiijtoua ni amamimili. Xijueyichiua Dios”.

10 Uan nojkia kiijtok: “Amo xijtlati tlen Dios tematiltijtok ipan ni amamimili, pampa monechkauia nopa tonali tlen kiixtlalijtok. 11 Katli kichiua tlen amo xitlauak nojua ma kichiua tlen amo xitlauak, uan katli kichiua tlen sokiyo nojua ma kichiua tlen sokiyo. Pero katli kichiua tlen xitlauak nojua ma kichiua tlen xitlauak, uan katli kichiua tlen tlatsejtseloltik nojua ma kichiua tlen tlatsejtseloltik.

12 ”‘¡Xitlakaki! Nimantsi niualas, uan nijualikas tlen nikinmakas sejse maseualmej por tlen kichijkej. 13 Na nieli Ipejya Uan Itlamia.* 14 Yolpakij katli kichikueniaj ininyoyo ueueyak* para uelis kikuasej itlajka nopa kuatinij tlen temaka nemilistli, uan para kalakisej kampa ipuertas nopa altepetl. 15 Kalteno itstokej maseualmej katli elij kej chichimej,* katli tetlajchiuiaj,* katli auilnemij,* katli temiktiaj, katli kinueyichiuaj teteyomej* uan nochi katli kinpaktia istlakatisej ika tlen kiijtouaj uan ika tlen kichiuaj’.

16 ”‘Na niJesús, nijtitlanki noángel para niinmechmatiltis ni tlamantli tlen kinpaleuis tlanechikolmej. Na nieli tlen ichampoyouaj* David uan iteipaixui, uan nieli nopa sitlali tlen kualka tlauia’ ”.*

17 Dios ika ichikaualis* uan nojkia katli monamiktis, nochipa kiijtojtokej “¡Xiuala!”. Uan nochi katli kikakisej ma kiijtokaj “¡Xiuala!”. Uan nochi katli amikij ma ualakaj. Nochi katli kinekisej, ma ualakaj kiikij nopa atl tlen temaka nemilistli uan amo kininamasej.

18 “Nochi katli kikakisej tlen Dios tematiltijtok ipan ni amamimili, na nikiniljuia: tlaj se akajya kipiuilia se tlamantli tlen nikaj ijkuilijtok, Dios kimakas nopa tlaijiyouilistli tlen fiero tlen ijkuilijtok ipan ni amamimili; 19 uan tlaj se akajya kikixtilis nopa tlajtoli tlen Dios tematiltia ipan ni amamimili, Dios amo kikauas ma kiseli nopa kuali tlamantli tlen ijkuilijtok ipan ni amamimili. Kineki kiijtos Dios amo kikauas ma kikua itlajka nopa kuatinij tlen temaka nemilistli uan amo kikauas ma kalaki ipan nopa altepetl tlen tlatsejtseloltik.

20 ”Katli tematiltia ni tlamantli kiijtoua: ‘Kena, nimantsi niualas’ ”.

“¡Amén!* Xiuala noTeko Jesús”.

21 ToTeko Jesús ma kinexti ueyi iyolo* ika katli elij tlatsejtseloltikej.*