Hechos (Tlen apóstoles kichijkej)
12 Nojkia ipan nopa tonali, tlanauatijketl Herodes* pejki kintlaijiyouiltia se keskij toikniuaj tlen tlanechikoli. 2 Kimiktik Santiago iikni Juan ika espada,* 3 uan kema kiitak judíos kinpaktik tlen kichijki, nojkia kitsajki Pedro. (Nochi ni panok ipan nopa tonali kema mochiua Nopa Iljuitl Tlen Pantsi Tlen Amo Kipia Levadura).* 4 Uajka kiitskik Pedro, kitsajki uan kintlalik nauij grupos tlen mopajpatlaskiaj para kimokuitlauisej. Ipan sejse grupo itstoyaj nauij soldados. Kiampa kichijki pampa kinekiyaya kitlajtolsenkauas ininixpa maseualmej kema ya panoskia nopa Pascua iljuitl. 5 Yeka kikajkej Pedro ma tsakto. Uan toikniuaj tlen tlanechikoli nochipa momaijtouayayaj* ipan Dios* ika nochi ininyolo para ma kipaleui.
6 Ipan nopa tlayoua kema ika ualmostla* Herodes kitlajtolsenkauaskia ininixpa maseualmej, Pedro kochtoya ilpitok ika ome cadenas tlatlajko tlen omej soldados, uan itstoyaj soldados katli kimokuitlauiyayaj puerta kampa tsaktoya. 7 Pero nimantsi iángel Jehová* monextik nopaya uan se tlauili tlauik kampa tsaktoya. Uajka kielchikiolinito Pedro para kiixitis uan kiiljuik: “¡Nimantsi ximeua!”. Uan nopa cadenas tlen ika kimailpitoyaj, tojtonki. 8 Nopa ángel kiiljuik: “Ximoyoyonti uan ximotlalili mohuaraches”. Pedro nimantsi kichijki tlen kiiljuik. Teipa nopa ángel kiiljuik: “Ximotlalili tlen ika timoajkoluijkoma* uan xinechtokili”. 9 Pedro kiski uan kitokilik, pero amo kimatiyaya tlaj nelia panoyaya tlen nopa ángel kichiuayaya. Hasta moiljuik kiitayaya se tlanextilili. 10 Panokej kampa nopa achtoui grupo soldados uan teipa nopa ompa grupo, asitoj kampa nopa tepospuerta kampa kisaj para asitij ipan altepetl uan nopa puerta motlapok iselti. Uajka kiskej uan yajkej ipan se calle. Uan nimantsi nopa ángel kikajtejki. 11 Ipan nopa tlalochtli,* Pedro kiitak tlen panotoya uan kiijtok: “Nama temachtli nijmati Jehová* kiualtitlanki iángel uan nechmakixtik tlen imako Herodes uan nojkia nochi tlen judíos kinekiyayaj ma nechpano”.
12 Kema kiitak tlen panotoya, yajki ichaj María inana Juan, katli kitokaxtiyayaj Marcos, nopaya mosentilijtoyaj miakej Jesús itokilijkauaj uan momaijtouayayaj. 13 Kema kaltajtakanik, se ichpokatl katli nopaya tlatekipanouayaya uan motokaxtiyaya Rode, yajki kiitato ajkia kaltajtakaniyaya. 14 Kema kitoskajki* Pedro, tlauel yolpajki, yeka amo kikaltlapok uan motlalojtejki kalijtik para teiljuis Pedro itstoya kalteno. 15 Inijuantij kiiljuijkej: “Titsonuiuitia”. Pero ya nojua kiniljuiyaya Pedro nelia itstoya kalteno, yeka pejkej kiijtouaj: “Eli iángel”. 16 Uan Pedro nojua kaltajtakaniyaya. Kema kaltlapotoj uan kiitakej, tlauel mosentlachilijkej. 17 Pedro tlamajmanextik para amo tleno ma kiijtokaj uan kinpouilik nochi kenijkatsa Jehová* kikixtijtoya kampa tsaktoya. Uajka kiniljuik: “Xikiniljuikaj ni tlamantli Santiago uan toikniuaj”. Kema kiijtok nopa, kiski uan yajki sejkanok.*
18 Kema tlaneski, nopa soldados amo kimatiyayaj tlake kichiuasej, pampa amo kimatiyayaj tlake panotoya ika Pedro. 19 Uan maske Herodes kuali kitemok, amo kipantik, yeka kintlatsintokik katli tlamokuitlauiyayaj uan teipa tlanauatik ma kintlatsakuiltikaj. Teipa kistejki Judea uan ixtemok para Cesarea uan nopaya mokajki se keski tonali.
20 Herodes tlauel kualantoya ika nopa maseualmej katli itstoyaj ipan Tiro uan Sidón. Uajka inijuantij mosentilijkej para yasej kampa ya itstoya, kitlajtlanijkej Blasto ma kintenpaleui, ya eliyaya katli kitekimakatoyaj ma tlayakana ichaj tlanauatijketl, uan tlajtlankej para Herodes ma moyoltlali ininuaya, pampa maseualmej tlen nopa altepemej kikouayayaj tlakualistli tlen ialtepe tlanauatijketl Herodes. 21 Kema asik nopa tonali tlen kiixtlalijtoyaj para mokamanaljuisej, Herodes mokentik iyoyo kej tlanauatianij kitekiuiaj, moseuik kampa tetlajtolsenkauayaya uan pejki kinkamanaljuia maseualmej. 22 Uajka nochi katli nopaya mosentilijtoyaj pejkej chikauak kitsajtsiliaj: “¡Kamanaltitok se dios, uan amo se tlakatl!”. 23 Nimantsi iángel Jehová* kichijki ma mokoko pampa amo kiueyichijki Dios. Uan okuilojki* uan mijki.
24 Pero itlajtol Jehová* nojua momoyajtiajki uan tlauel miakej pejkej tlaneltokaj.
25 Kema Bernabé uan Saulo kintlamimajmakakej toikniuaj ipan Jerusalén tlen kinuikilijtoyaj, tlakuepilijkej uan kiuikakej Juan, katli nojkia kiiljuiyayaj Marcos.