Nopa achtoui carta tlen kiijkuilok Juan
5 Nochi katli kineltokaj Jesús eli Cristo, elij ikoneuaj Dios.* Uan nochi katli kiikneliaj Dios, kinikneliaj ikoneuaj Dios. 2 Ika ni tlamantli tijmatij para tikinikneliaj ikoneuaj Dios: tlaj tikikneliaj Dios uan tijneltokaj itlanauatiljuaj. 3 Tikiknelisej Dios kiijtosneki ma tijneltokakaj itlanauatiljuaj; uan itlanauatiljuaj amo eli se tlamamali, 4 pampa nochi katli elij ikoneuaj Dios kintlantokej katli kichiuaj tlen amo kuali ipan Tlaltipaktli. Uan totlaneltokilis techpaleuijtok ma titlatlanikaj.
5 ¿Ajkia uelis kintlanis katli kichiuaj tlen amo kuali ipan Tlaltipaktli? Katli kineltoka Jesús eli iKone Dios. 6 Jesucristo ualajki ika atl uan estli; ya amo san ualajki ika atl, ualajki ika atl uan estli. Uan ichikaualis Dios* tematiltia nopa, pampa ichikaualis eli melauak. 7 Pampa onka eyi tlamantli tlen kinextia ajkia eli Jesús: 8 ichikaualis Dios, atl uan estli, uan nochi nopa eyi kinextia sanse tlamantli.
9 Tlaj tojuantij tijneltokaj tlen maseualmej kiijtouaj, uajka tlen Dios tematiltia eli más kuali, pampa ya tematiltia ajkia eli iKone. 10 Katli tlaneltoka ipan iKone Dios kinextia para kipia ipan iyolo tlen Dios kimachtijtok. Se akajya katli amo tlaneltoka ipan Dios, kichiua ma nesi Dios kej se istlakatiketl, pampa amo tlaneltokatok ika tlen Dios tematiltik tlen iKone. 11 Uan ya ni tlen Dios tematiltia: ya temakak nemilistli tlen amo kema tlami,* uan tijseliaj nopa nemilistli ika iKone. 12 Katli mouika iuaya iKone, kipia nemilistli tlen amo kema tlami; uan katli amo mouika iuaya iKone Dios, amo kipia nopa nemilistli.
13 Niinmechtlajkuiljuilia ni tlamantli katli intlaneltokaj ipan itoka iKone Dios, para inkimatisej inkipiaj nemilistli tlen amo kema tlamis. 14 Uan timotemachiaj tlaj tijtlajtlaniaj Dios tlen ueli tlamantli tlen ya kipaktia, ya techtlakakilia. 15 Uan pampa tijmatij techtlakakilia kema tijtlajtlaniaj tlen ueli tlamantli, timotemachiaj techmakas tlen tijtlajtlaniaj pampa yaya tijtlajtlanijkej.
16 Tlaj se akajya kiita iikni tlajtlakolchiua, pero nopa tlajtlakoli amo kichiua para ma miki, moneki momaijtos* por ya, uan Dios kimakas nemilistli. Ni eli para katli amo kichiuaj se tlajtlakoli tlen kichiua ma mikikaj. Pero kena onka se tlajtlakoli tlen kichiua ma mikikaj. Yeka amo aka nikiljuia ma momaijto por katli kichiua nopa tlajtlakoli. 17 Nochi tlen amo xitlauak eli tlajtlakoli. Pero onka se tlajtlakoli tlen amo kichiua ma timikikaj.
18 Tijmatij yon se katli eli ikone Dios tlajtlakolchijtinemi, uan pampa iKone Dios kimokuitlauia, Axkualtlakatl amo uelis kichiuilis yon se tlamantli. 19 Tijmatij tojuantij tielij iaxkauaj Dios, pero nochi Tlaltipaktli eltok imako Axkualtlakatl. 20 Uan tijmatij iKone Dios ualajtok uan techpaleuijtok ma tijpiakaj tlalnamikilistli para kiampa uelis tikixmatisej Dios katli eli melauak. Uan pampa techpaleuia iKone Jesucristo, tojuantij tiitstokej iuaya Dios. Kena, ya eli Dios katli melauak uan katli temaka nemilistli tlen amo kema tlamis. 21 Nopilkoneuaj, ximomokuitlauikaj para amo inkinueyichiuasej teteyomej.*