Nopa carta tlen kintitlanilijkej Cristo itokilijkauaj tlen Éfeso

1 Na niPablo, se iapóstol Cristo Jesús pampa Dios* kiampa nechtekimakak, niinmechtlajkuiljuilia inmojuantij katli Dios inmechiyokatlalijtok* katli initstokej ipan Éfeso uan inelij itokilijkauaj Cristo Jesús katli amo kema inkitlauelkauaj:

2 ToTata Dios uan toTeko Jesucristo ma kipiakaj ueyi ininyolo ika inmojuantij* uan ma inmechpaleuikaj kuali ximouikakaj ininuaya.

3 Ma tijueyichiuakaj iDios uan iTata toTeko Jesucristo, pampa ipan iluikak techmakatok nochi tlamantli tlateochiualistli tlen ya temaka ika ichikaualis* pampa tiitstokej iuaya Cristo, 4 pampa ipa techtlapejpenijtoya kema ayamo tlakatiyayaj maseualmej* ipan Tlaltipaktli para ma tiitstokaj iuaya Cristo, para ma tijnextikaj titeikneliaj, ma tielikaj titlatsejtseloltikej* uan amo ma tijpiakaj yon se tlajtlakoli iixpa. 5 Dios ipa techtlapejpenijtoya para techselis kej tiikoneuaj ika Jesucristo, sanse kej ya kipaktia uan kej ya kineki, 6 para ma tijueyichiuakaj pampa kitekiuik iKone katli kiiknelia para kinextis ueyi iyolo ika tojuantij.* 7 Dios tlaxtlajki para techmakixtis ika iKone ieso, kena, techtlapojpoljuik totlajtlakoljuaj pampa kinextia ueyi iyolo ika tojuantij.

8 Ya tlauel kinextik ueyi iyolo ika tojuantij* pampa techmakak miak tlalnamikilistli uan kichijki nochi ma tijkuamachilikaj 9 para techmatiltis tlen ya kineki kichiuas tlen ayamo tematiltijtoya.* Sanse kej ya kipaktia, moiljuik 10 kenijkatsa kiyakanas nochi tlamantli kema moaxitis nopa tonali tlen ya kiixtlalijtok, kiampa uelis kinsentilis nochi tlamantli tlen iluikak uan nochi tlamantli tlen Tlaltipaktli para nochi ma kiyakana Cristo. 11 Tojuantij tiitstokej iuaya Cristo, uan Dios techtlapejpenik para tijselisej tlen techtenkauilik. Ya ipa techtlapejpenijtoya pampa kiampa mosentlalijtoya kichiuas, pampa ya kichiua nochi kej kitlapejpenia uan kej kineki. 12 Kiampa tojuantij, katli achtoui timotemachijkej ipan Cristo, tijchiuasej ma kiueyichiuakaj Dios katli tlauel ueyi. 13 Pero inmojuantij nojkia inmotemachijkej ipan ya kema inkikajkej nopa tlajtoli tlen melauak, nopa kuali tlamachtili tlen kiijtoua kenijkatsa techmakixtis. Kema ya intlaneltokatoyaj, Dios kitekiuik Cristo para inmechtlalilis se sello ika ichikaualis* tlen kitenkajtoya, 14 tlen kinextia temachtli tijselisej* tlen Dios techtenkauilik uan kiampa tlen iaxka Dios ayokmo ilpitos pampa tlaxtlajki para kimakixtis, uan nopa kichiuas tlauel ma kiueyichiuakaj.

15 Yeka na nojkia, desde kema nijkajki kenijkatsa intlaneltokatokej ipan toTeko Jesús uan kenijkatsa inkinikneliaj nochi katli Dios kiniyokatlalijtok, 16 nochipa nijtlaskamatilia Dios pampa kiampa inkichiuaj. Nojua niinmechilnamiki kema nimomaijtoua,* 17 para iDios toTeko Jesucristo, toTata katli tlauel ueyi, ma inmechmaka chikaualistli para inkipiasej tlalnamikilistli uan ma inmechpaleui inkikuamachilisej tlen ya tematiltia uan kiampa kuali inkiixmatisej. 18 Dios kitlapojtok inmoyolo para uelis inkiitasej uan inkimatisej tlake tlamantli pejki inkichiaj kema yaya inmechnotski, para xijmatikaj tlake yejyektsitsij tlateochiualistli kitenkajtok kinmakas katli kiniyokatlalijtok 19 uan para xijmatikaj onpano ueyi nopa tetikayotl tlen technextilia tojuantij katli titlaneltokaj. Nopa nesi ika tlen kichijtok ika iueyichikaualis 20 tlen kitekiuik kema kiyolkuik Cristo uan kiseuik ika imanejmak nepa ipan iluikak, 21 kampa más uejkapa tlen nochi tekiuejkayotl, tlanauatili, chikaualistli uan tlayakananij, uan kampa más uejkapa tlen nochi tokajyotl tlen uelis tikijtosej, amo san ipan ni tonali,* nojkia ipan nopa tonali tlen ualas. 22 Dios nojkia kitlalik nochi tlamantli iikxitla Cristo para ma kinauati uan kitekimakak ma kiyakana tlanechikoli, 23 tlen eli itlakayo uan ya kitemitia uan kichiua ma eli senkistok uan amo tleno ma kipolo.