Tlen kiijkuilok Marcos
10 Teipa kistejki nopaya uan asito kampa peua Judea, seyok nali ueyatl Jordán. Sampa kinechkauijkej miakej maseualmej. Uan pejki kinmachtia kej momajtoya kichiua. 2 Uajka kinechkauijkej se keskij fariseos* katli kinekiyayaj ma motenkuapolo, uan kitlatsintokijkej tlaj se tlakatl kinamikiyaya kikauas isiua. 3 Ya kinnankilik: “¿Tlake inmechnauatik Moisés?”. 4 Inijuantij kiijtojkej: “Moisés kikajki se tlakatl ma kimaka isiua se amatl kampa nesi mokauaj, uan ma kikixti”.* 5 Uajka Jesús kiniljuik: “Moisés kiijkuilok nopa tlanauatili pampa tlauel inyoltetikej.* 6 Pero kema Dios* kinchijchijki maseualmej, ‘kinchijki tlakatl uan siuatl’ 7 uan ‘yeka, se tlakatl kikauas itata uan inana, 8 uan omej elisej san se inintlakayo’, uajka ayokmo elij omej, nama elij san se inintlakayo.* 9 Yeka, tlen Dios kisansejkotilijtok, amo aka ma kixelo”. 10 Kema sampa itstoyaj kalijtik, itokilijkauaj pejkej kitlatsintokiaj tlen nopa tlamantli. 11 Ya kiniljuik: “Tlaj se akajya kikaua isiua uan sampa mosiuajtia, momekatia,* pampa kiixpano katli achtoui eliyaya isiua. 12 Uan tlaj se siuatl kikaua iueue uan monamiktia iuaya seyok, nojkia momekatia”.
13 Uajka kiualikilijkej se keskij konemej para ma kinteochiua, pero itokilijkauaj kinajuakej. 14 Kema Jesús kiitak nopa, amo kipaktik uan kiniljuik: “Xikinkauakaj konemej ma nechnechkauikaj. Amo xikintsakuilikaj, pampa iTlanauatijkayo Dios eli ininaxka katli elij kej inijuantij. 15 Temachtli niinmechiljuia, katli amo kiselis iTlanauatijkayo Dios kej se konetl, amo kema kalakis nopaya”. 16 Uan kinnajnauajki nopa konemej uan kitlalik imax ininpani para kinteochiuas.
17 Kema yauiyaya ipan ojtli, motlalojtiualajki se tlakatl, motlankuaketski iixpa uan kitlatsintokik: “Tikuali Tlamachtijketl, ¿tlake moneki nijchiuas para nijpias nemilistli tlen amo kema tlamis?”.* 18 Jesús kiiljuik: “¿Kenke tinechiljuia nikuali? Itstok san setsi katli kuali: Dios. 19 Ta tijmati tlen kiijtoua nopa tlanauatili: amo xitemikti, amo ximomekati, amo xitlachteki, amo xiteistlakaui, amo xitlakajkayaua para timoaxkatis tlen teaxka, xijtlepanita motata uan monana”. 20 Nopa tlakatl kiiljuik: “Tlamachtijketl, nijneltokatiualajtok nochi ni tlanauatili desde kema nieliyaya nitelpokatl”. 21 Jesús kiixtlachilik, uan pampa kiiknelik, kiiljuik: “Mitspoloua se tlamantli: xia xijnamakati nochi tlen tijpixtok uan xikinmaka nopa tomij katli amo tleno kipiaj, kiampa tijpias tlen tlauel patiyo ipan iluikak. Teipa xiuala uan xinechtokili”. 22 Kema nopa telpokatl kikajki tlen kiiljuik, tlauel moyolkuesok uan mokuesojtiajki pampa kipixtoya miak tlamantli.
23 Kema Jesús kintlachilik katli nopaya itstoyaj, kiniljuik itokilijkauaj: “¡Katli tlatominpiaj tlauel ouij kalakisej ipan iTlanauatijkayo Dios!”. 24 Pero itokilijkauaj mosentlachilijkej ika tlen kiijtok. Uajka Jesús kiniljuik: “Nokoneuaj, ¡tlauel ouij se kalakis ipan iTlanauatijkayo Dios! 25 Más amo ouij kalakis se camello ipan iixteyol se uitsmalotl* que se katli tlatominpia kalakis ipan iTlanauatijkayo Dios”. 26 Nopa kichijki nojua tlauel ma mosentlachilikaj, uan kiiljuijkej:* “Uajka, ¿ajkia uelis momanauis?”.* 27 Jesús kinixtlachilik uan kiniljuik: “Maseualmej moiljuiaj ni amo uelis mochiuas, pero Dios amo kiampa moiljuia, pampa ya nochi ueli kichiua”. 28 Pedro pejki kiiljuia: “Xikita, tojuantij tijkajtejkej nochi pampa timitstokilijkej”. 29 Jesús kiniljuik: “Temachtli niinmechiljuia, katli kikajtejtok ichaj, iikniuaj, isiuaikniuaj, inana, itata, ikoneuaj o itlal pampa eli notokilijka uan kineltoka nopa kuali tlamachtili, 30 kiselia ipan ni tonali 100 imiakpa: ichaj, iikniuaj, isiuaikniuaj, inana, ikoneuaj o itlal, maske kitlaijiyouiltiaj; uan ipan nopa tonali* tlen uala kiselis nemilistli tlen amo kema tlamis.* 31 Pero miakej katli tlayakanaj, mokauasej hasta tlatepotsko,* uan miakej katli yauij tlatepotsko, tlayakanasej”.
32 Uajka, nochi ixtlejkotiauiyayaj ipan nopa ojtli tlen yaui Jerusalén. Jesús tlayakantiauiyaya uan itokilijkauaj yauiyayaj itepotsko uan mosentlachiliyayaj, uan katli ualayayaj tlaika majmajkej. Jesús sampa kinuikak iyoka nopa 12 apóstoles uan pejki kinilnamikilia tlake nechka kipanoskia. 33 Kiniljuik: “Xikitakaj, tiixtlejkotiauij para Jerusalén, uan nopaya Katli Eli iKone Se Maseuali* kitemaktilisej ininmako sacerdotes katli kipiaj tlanauatili uan escribas.* Tlanauatisej ma kimiktikaj uan kitemaktilisej ininmako katli euaj ipan seyok altepetl. 34 Inijuantij kipinajtisej, kichajchasej, kiuitekisej uan kimiktisej; uan ipan eyi tonali moyolkuis”.*
35 Santiago uan Juan, ikoneuaj Zebedeo, kinechkauijkej uan kiiljuijkej: “Tlamachtijketl, tijnekij xijchiua tlen timitstlajtlanisej”. 36 Ya kintlatsintokik: “¿Tlake inkinekij ma nijchiua?”. 37 Inijuantij kinankilijkej: “Xitechkaua ma timoseuikaj mouaya kema titlanauatijtos ipan moTlanauatijkayo, se ika momanejmak uan se ika momaarraves”.* 38 Jesús kiniljuik: “Inmojuantij amo inkimatij tlake intlajtlanij. ¿Uelis inkiisej nopa copa kampa na niki o uelis inmechatsonpoliuiltisej kej na nechatsonpoliuiltiaj?”. 39 Inijuantij kinankilijkej: “Kena tiuelij”. Uajka Jesús kiniljuik: “Inmojuantij inkiisej nopa copa kampa na niki, uan inmechatsonpoliuiltisej kej na nechatsonpoliuiltiaj. 40 Pero na amo nikijtoua ajkia inijuantij moseuisej ika nomanejmak uan ika nomaarraves, san noTata kintlapejpenis ajkia inijuantij moseuisej nopaya”.
41 Kema nopa sekinok matlaktli kimatkej, kualankej ininuaya Santiago uan Juan. 42 Pero Jesús nochi kinsentilik uan kiniljuik: “Inkimatij katli kinitaj kej tekichiuanij, tlanauatiaj ipan altepemej kej inijuantij kinekij, uan katli kipiaj tlanauatili kinchiualtiaj maseualmej ma kinneltokakaj. 43 Inmojuantij amo kinamiki kiampa inkichiuasej. Más kuali, katli kineki kipias tlanauatili, moneki kintekipanos sekinok 44 uan katli kineki tlayakanas, moneki elis inintlatekipanojka sekinok. 45 Pampa yon Katli Eli iKone Se Maseuali ualajki para ma kitekipanokaj, ya ualajki para kintekipanos sekinok uan temakas inemilis* uan kiampa tlaxtlauas para kinmakixtis miakej maseualmej”.
46 Uajka, kalajkej Jericó. Kema Jesús uan itokilijkauaj kistiauiyayaj Jericó ininuaya miakej maseualmej, moseuijtoya ojteno Bartimeo (ikone Timeo), se katli amo tlachiayaya uan motlaejeuiliyaya.* 47 Kema kikajki katli panotiauiyaya eliyaya Jesús, katli euayaya Nazaret, pejki kitsajtsilia: “¡Jesús, tiiKone David! ¡Xinechtlasojtla!”. 48 Uajka miakej pejkej kitlakaualtiaj uan kiiljuiyayaj ayokmo ma tlauejchiua, pero ya más chikauak kuatsajtsiyaya: “¡TiiKone David, xinechtlasojtla!”. 49 Yeka Jesús moketski uan kiniljuik: “Xijnotsakaj, ma uala nikaj”. Inijuantij kiiljuijkej nopa tlakatl: “¡Amo ximajmaui! Ximoketsa pampa mitsnotsa”. 50 Nimantsi mokixtilik iyoyo tlen ika moajkoluijkontoya,* moketstiuetski uan yajki kampa itstoya Jesús. 51 Uajka Jesús kitlatsintokik: “¿Tlake tijneki ma nimitschiuili?”. Ya kinankilik: “Tlamachtijketl,* nijneki sampa nitlachias”. 52 Uan Jesús kiiljuik: “Xia, timochikajki pampa kuali titlaneltoka”. Nimantsi nopa tlakatl sampa tlachixki uan pejki kitokilia Jesús ipan ojtli.