Nopa achtoui carta tlen kiijkuilok Pedro
1 Na Pedro, iapóstol Jesucristo, nikintlajkuiljuilia katli elij kej sejkanok* euanij uan kampa ueli itstokej ipan tlali Ponto, Galacia, Capadocia, Asia uan Bitinia, katli kintlapejpenijtokej 2 pampa toTata Dios* ipa kimatiyaya kiampa kichiuaskia, katli kinchijtokej tlatsejtseloltikej* ika ichikaualis Dios,* para ma tlaneltokakaj uan ma kinatseljuikaj ika ieso Jesucristo:
Dios nojua más ma kinexti ueyi iyolo ika inmojuantij* uan ma inmechmaka tlaseuilistli.
3 Ma tijueyichiuakaj iDios uan iTata toTeko Jesucristo, pampa tlauel techtlasojtlatok uan yeka kichijki sampa ma titlakatikaj para ma tijchiakaj tijselisej tlen nelia temachtli pampa kichijki ma moyolkui Jesucristo, 4 uan para techaxkatis tlen amo kema nempoliui,* tlen amo sokiyo uan uejkaua para nochipa. Ya ni inmechajokuilijtokej ne iluikak para inmojuantij, 5 katli Dios inmechmanauijtok ika itetikayo pampa intlaneltokaj para uelis inmomakixtisej. Ni tlamakixtili monextis ipan itlamia tonali. 6 Yeka inmojuantij tlauel inyolpakij, maske se keski tonali moneki inmokuesojtosej pampa inkiixnamikij miak tlaouijkayotl, 7 kiampa inmotlaneltokilis tlen kiyejyekojtokej, tlen eli más ipati que oro tlen ueli nempoliui maske kiyejyekojtokej ipan tlitl, inmechpaleuis ma inmechuejkapantlalikaj uan ma inmechtlepanitakaj ipan nopa tonali kema monextis Jesucristo. 8 Maske inmojuantij amo kema inkiitakej, inkiikneliaj. Maske nama amo inkiitaj, intlaneltokaj ipan ya uan tlauel inyolpakij ika se ueyi pakilistli tlen amo aka ueli kiixtoma 9 uan inyolpakisej kema inmechmakixtisej pampa intlaneltokaj.
10 Nopa teokamanalouanij* katli tematiltijkej kenijkatsa Dios kinextiskia ueyi iyolo ika inmojuantij,* tlauel kuali momachtijkej uan kuali kitejtemolijkej kenijkatsa eliskia nopa tlamakixtili. 11 Inijuantij kuali momachtijkej kema uan ipan tlake tonali moaxitiskia ipan Cristo nopa tlamantli tlen ipa tematiltijtoya ichikaualis Dios tlen eltoya ipan inijuantij. Ichikaualis Dios ipa tematiltijtoya kenijkatsa Cristo tlaijiyouiskia uan kenijkatsa kiuejkapantlaliskiaj teipa. 12 Dios kichijki teokamanalouanij ma kikuamachilikaj tlen tematiltijtoyaj amo eliyaya para inijuantij, eliyaya para inmojuantij. Nama ni tlamantli tlen inmechmatiltijkej kichijkej sekinok katli kimoyajkej nopa kuali tlamachtili. Inijuantij kiampa kichijkej pampa kinpaleuik ichikaualis Dios tlen uala desde iluikak. Ni tlamantli hasta ángeles tlauel kinekij kimatisej.
13 Uajka xijkualchijchiuakaj inmotlalnamikilis para inkichiuasej tlen moneki, nochipa xijnextijtokaj senkistok kuali intlalnamikij uan ximotemachikaj ipan nopa tlateochiualistli tlen amo kinamiki tijselisej* tlen inmechnextilisej kema monextis Jesucristo. 14 Kej ikoneuaj Dios katli kichiuaj tlen kiniljuia, ayokmo xijchiuakaj tlen achtouia inmechyoltilanayaya kema ayamo inkiixmatiyayaj Dios; 15 más kuali, xielikaj intlatsejtseloltikej ipan nochi inmonemilis, sanse kej katli inmechnotski eli Tlatsejtseloltik, 16 pampa ijkuilijtok: “Moneki inelisej intlatsejtseloltikej pampa na nitlatsejtseloltik”.
17 Uan tlaj inmojuantij inmonechkauiaj kampa toTata katli kitlajtolsenkaua sejse maseuali ika tlen kichiua uan amo techikoita, uajka xijnextikaj inkimakasij kema nojua initstosej nikaj ipan Tlaltipaktli maske san se tlalochtli.* 18 Pampa inkimatij amo elki ika tlamantli tlen nempoliui, kej plata o oro, tlen ika inmechmakixtijkej tlen nopa nemilistli tlen amo tleno ipati tlen inmechmachtijkej inmotatauaj katli uejkajkia itstoyaj. 19 Elki ika ieso Cristo tlen nelnelia tlauel ipati, kej eliskia ieso se pilborregojtsi tlen amo kipia yon se tlamantli tlen amo kuali uan amo sokiyo. 20 Maske nelia Cristo ipa kitlapejpenijtoyaj kema ayamo tlakatiyayaj maseualmej ipan Tlaltipaktli,* monextik ipan itlamia ni tonali por inmojuantij. 21 Ika ya, inmojuantij intlaneltokaj ipan Dios, katli kiyolkuik uan kiuejkapantlalik, uan kiampa uelis intlaneltokasej uan inmotemachisej ipan Dios.
22 Uan pampa nama ya inmotlapajpakchijkej pampa inkineltokaj tlen melauak, uan nopa kichijtok ximoiknelikaj kej ineliskiaj iniknimej uan amo san intlachiuaj, uajka tlauel ximoiknelikaj se ika seyok ika nochi inmoyolo. 23 Pampa ika itlajtol nopa Dios katli yoltok uan nochipa itstok, kichijtok sampa xitlakatikaj, pero amo ika se xinachtli tlen nempoliui, eli ika se xinachtli tlen amo nempoliui. 24 Pampa “nochi maseualmej elij kej xiuitl uan nochi ininueyitilis eli kej xochitl tlen moskaltia kuatitla; nopa xiuitl pilini uan nopa xochitl tepeui, 25 pero itlajtol Jehová* uejkaua para nochipa”. Kena, nopa “tlajtoli” eli nopa kuali tlamachtili tlen inmechmatiltijtokej.