Tlen kiijkuilok Mateo
4 Uajka ichikaualis Dios* kiyakanki Jesús ma yaui ipan uaktok tlali uan nopaya Diablo kinejki kichiuas ma tlajtlakolchiua. 2 Jesús amo tlakuajtoya 40 tonali uan 40 youali, yeka mayanayaya. 3 Uan Diablo kinechkauik uan kiiljuik: “Tlaj tiiKone Dios,* xijchiua ni tetl ma mokuepa tlakualistli”.* 4 Uan Jesús kinankilik: “Ijkuilijtok: ‘Amo san tlakualistli kipaleuia ma yolto se akajya, nojkia moneki kikakis nochi tlen Jehová* kiijtoua’ ”.
5 Uajka Diablo kiuikak Jerusalén, kiketski kampa más tlauejkapa ipan teokali, 6 uan kiiljuik: “Tlaj tiiKone Dios, ximotlauiso,* pampa ijkuilijtok: ‘Ya kinualtitlanis iángeles ma mitspaleuikij’, uan ‘Mitsmatsakuilisej, kiampa amo timoikxikokos ika se tetl’ ”. 7 Jesús kinankilik: “Nojkia ijkuilijtok: ‘Amo xijchiua se tlamantli san pampa tijneki tikitas tlaj moDios Jehová* mitspaleuis’ ”.
8 Teipa Diablo kiuikak ipan se tepetl uan kinextilik nochi altepemej tlen onka uan ininricojyo. 9 Uan kiiljuik: “Nimitsmakas nochi ni, tlaj timotlankuaketsas noixpa uan san sempatsi tinechueyichiuas”. 10 Jesús sampa kinankilik: “¡Xia Satanás! Pampa ijkuilijtok: ‘Xijueyichiua Jehová* moDios uan san yaya xijtekipano’ ”. 11 Uajka Diablo kikajtejki, uan ualajkej se keskij ángeles uan kipaleuikoj.
12 Kema Jesús kimatki kitsaktoyaj Juan, yajki Galilea. 13 Teipa kistejki Nazaret uan mokauato Capernaúm, tlen mokaua nechka mar, ipan inintlal Zabulón uan Neftalí. 14 Nochi ni tlamantli panok para ma moaxiti tlen Dios kiijtojtoya ika teokamanalojketl* Isaías: 15 “¡Galilea kampa itstokej tlen kampa ueli euaj, inintlal Zabulón uan Neftalí, nopaya pano nopa ojtli tlen onasi mar, tlen eltok seyok nali ueyatl Jordán!* 16 Nopa maseualmej katli itstoyaj kampa tsintlayoua kiitakej se ueyi tlauili, uan katli itstoyaj ipan iekauil mikilistli, motlananki ipan inijuantij se tlauili”. 17 Ipan nopa tonali, Jesús pejki kimoyaua ni tlamachtili: “Ximoyolpatlakaj pampa nopa Tlanauatijkayotl tlen eltok iluikak, ya monechkauijtok”.
18 Kema nejnentiauiyaya iteno mar tlen Galilea, kinitak omej iknimej kimajkauayayaj ininmatla pampa eliyayaj michtlajtlamanij. Se itoka eliyaya Simón, katli nojkia kiiljuiyayaj Pedro, uan nopa seyok itoka eliyaya Andrés. 19 Uan Jesús kiniljuik: “Xinechtokilikaj uan na niinmechpaleuis xikintemokaj maseualmej sanse kej kema inmichtlajtlamaj”. 20 Inijuantij nimantsi kikajtejkej ininmatla uan kitokilijkej. 21 Teipa kinitak sekinok omej iknimej: Santiago ikone Zebedeo uan iikni Juan. Itstoyaj ipan barco* iuaya inintata uan kiijtsomayayaj* ininmatla. Jesús kinnotski 22 uan inijuantij nimantsi kikajtejkej ininbarco uan inintata, uan kitokilijkej.
23 Jesús yajki ipan nochi tlali Galilea uan tlamachtijtiajki kampa tlaueyichiuayayaj judíos uan kimoyajtiajki nopa kuali tlamachtili tlen iTlanauatijkayo Dios. Uan kinchikauayaya katli kipixtoyaj tlen ueli kokolistli uan katli tlakayokuajkualoyayaj. 24 Ipan nochi Siria kimatkej tlen kichiuayaya. Kiuikiliyayaj nochi katli mokokouayayaj uan katli tlauel tlakayokuajkualoyayaj, katli kinpiayayaj amo kuali ajakamej,* katli tlapolouayayaj uan katli amo ueliyayaj moojoliniaj. Uan ya kinchikauayaya. 25 Yeka kitokiliyayaj miakej maseualmej tlen Galilea, Decápolis,* Jerusalén, Judea uan katli itstoyaj ipan ne seyok nali tlen ueyatl Jordán.