Tlen kiijkuilok Juan
12 Kema poliuiyaya chikuasej tonali para peuas Pascua, Jesús asito altepetl Betania, kampa itstoya Lázaro, katli kiyolkuitoya. 2 Uan nopaya kichiuilijkej se tlakualistli. Marta kintekiliyaya tlakualistli, uan Lázaro uan sekinok tlakuayayaj iuaya Jesús. 3 Uajka María kikuik se libra* aceite tlen ajuiyak mijyotiyaya, tlen tlauel patiyo, tlachijchiuali ika senkistok nardo* uan kitekilik Jesús ipan iikxi. Teipa kiuachilik ika itsonkal. Uan kalijtik ajuiyak tlamijyotiyaya. 4 Pero se tlen itokilijkauaj Jesús, Judas Iscariote, katli nechka kitemaktiliskia, kiijtok: 5 “¿Kenke amo monamakak ni aceite tlen ajuiyak mijyotia ika 300 denarios* uan kinmakatoskiaj nopa tomij katli amo tleno kipiaj?”. 6 Pero amo kiampa kiijtok pampa nelia kinikneliyaya katli amo tleno kipiaj, kiijtok pampa eliyaya se tlachtejketl; ya kipixtoya nopa pilcajontsij kampa kitlaliyayaj tomij uan kiichtekiyaya tlen nopaya kitlaliyayaj. 7 Uajka Jesús kiijtok: “Amo tleno xikiljui; ma kichiua tlen momajtokej kichiuaj para kema nechtlalpachosej.* 8 Pampa katli amo tleno kipiaj nochipa itstokej inmouaya, pero na amo niitstos nochipa inmouaya”.
9 Uan miakej judíos kimatkej Jesús itstoya Betania uan yajkej kiitatoj, pero amo san ya kinekiyayaj kiitasej, nojkia Lázaro, katli yaya kiyolkuitoya. 10 Uajka sacerdotes katli kipiayayaj tlanauatili nama nojkia pejkej kitemoliaj kenijkatsa kimiktisej Lázaro, 11 pampa miakej judíos yauiyayaj nopaya uan peuayayaj tlaneltokaj ipan Jesús.
12 Ika ualmostla,* nopa miakej maseualmej katli yajtoyaj para iljuichiuasej kimatkej Jesús asitiauiyaya Jerusalén. 13 Uajka kikuikej imakuayo apachkuauitl uan kinamikitoj, uan pejkej chikauak kuatsajtsij: “¡Timitstlajtlaniaj Dios, xijmanaui! ¡Tlateochiuali katli uala ipan itoka Jehová,* iTlanauatijka altepetl Israel!”. 14 Kema Jesús kipantik se pilburrojtsi, tlejkok ipani, sanse kej ijkuilijtok: 15 “Amo ximajmaui, iichpoka Sion. ¡Xikita! Uala motlanauatijka, moseuijtok ipan se pilburrojtsi”. 16 Achtoui itokilijkauaj amo kikuamachilijkej nopa tlamantli. Pero kema Jesús kiselik ueyi tlanauatili, kiilnamijkej ijkuilijtoya kipanoskia ni tlamantli, uan ya nopa tlen kichiuilijkej.
17 Uan nopa miakej maseualmej katli itstoyaj kema Jesús kiiljuik Lázaro ma kisa kampa mijkaostotl uan kiyolkuik, tepouilijtiauiyayaj tlen panotoya. 18 Yeka nopa miakej maseualmej nojkia kinamikitoj, pampa kikajkej kichijtoya nopa milagro.* 19 Uajka fariseos* moiljuijkej: “Xikitakaj, amo tleno ueli tijchiuaj. ¡Nochi maseualmej kitokiliaj!”.
20 Se keskij katli euayayaj Grecia nojkia ualajtoyaj para kiueyichiuasej Dios* ipan nopa iljuitl. 21 Inijuantij kinechkauijkej Felipe, katli euayaya altepetl Betsaida tlen tlali Galilea, uan kitlajtlanijkej: “Tio, tijnekij tikitasej Jesús”. 22 Felipe kiiljuito Andrés, uajka Felipe uan Andrés kiiljuitoj Jesús.
23 Pero Jesús kinnankilik: “Asik hora para na, Katli Nieli iKone Se Maseuali,* ma nechuejkapantlalikaj. 24 Temachtli niinmechiljuia, tlaj nopa trigo iyol amo uetsi tlalchi uan amo pati,* nojua eli se trigo iyol. Pero tlaj pati, uajka temaka miak itlajka. 25 Katli kiiknelia inemilis kipolos, pero katli amo kiiknelia inemilis ipan ni Tlaltipaktli, kipias nemilistli tlen amo kema tlamis.* 26 Tlaj se akajya kineki nechtekipanos, ma nechtokili; uan kampa na niitstos, nopaya nojkia itstos notlatekipanojka. Tlaj se akajya nechtekipanos, noTata kiuejkapantlalis. 27 Nama tlauel nimotekipachoua. Uan, ¿tlake ueliskia nikijtos? Papá, xinechmakixti ipan ni hora tlen tlauel ouij. Pero yeka niasiko ipan ni hora. 28 Papá, xijueyichiua motoka”. Uajka ipan iluikak kakistik se akajya kiijtok: “Nijueyichijtok uan sampa nijueyichiuas”.
29 Nochi katli nopaya itstoyaj kikajkej nopa, uan sekij pejkej kiijtouaj tlatomontoya. Sekinok kiijtojkej: “Se ángel kikamanaljuik”. 30 Uajka Jesús kiijtok: “Tlen kakistik amo elki para na nechpaleuis, elki para inmojuantij inmechpaleuis. 31 Nama kintlajtolsenkauaj katli itstokej ipan Tlaltipaktli; nama kikixtisej katli tlanauatia ipan Tlaltipaktli. 32 Pero na, kema nechtlananasej tlen Tlaltipaktli,* nikinyoltilanas kampa na maseualmej tlen kampa ueli euaj”. 33 Kiijtok nopa para kinextis kenijkatsa mikiskia. 34 Uajka nopa miakej maseualmej kinankilijkej: “Tijmatij nopa Tlanauatili kiijtoua Cristo nochipa itstos. ¿Kenke ta tikijtoua Katli Eli iKone Se Maseuali moneki kitlananasej? ¿Ajkia eli nopa iKone Se Maseuali?”. 35 Uajka Jesús kiniljuik: “Nopa tlauili nojua itstos inmouaya se kentsi tonali. Xinejnemikaj kema nojua inkipixtokej nopa tlauili, kiampa amo inmechtlanis tsintlayouilotl; katli nejnemi kampa tsintlayouilotl amo kimati kanke yaui. 36 Kema nojua inkipixtokej tlauili, xitlaneltokakaj ipan nopa tlauili, kiampa inelisej ikoneuaj tlauili”.
Kema tlanki kiijtoua ni tlamantli, Jesús yajki uan motlatito.* 37 Maske kichijtoya miak milagros* ininixpa, inijuantij amo tlaneltokayayaj ipan ya, 38 kiampa moaxitiskia tlen kiijkuilok teokamanalojketl* Isaías kema kiijtok: “Jehová,* ¿ajkia tlaneltokatok ipan tlen titlayolmelauaj? ¿Uan ajkia kiitstok nopa chikaualistli tlen kipia iajkol Jehová?”.* 39 Isaías nojkia kiijtok kenke amo ueliyayaj tlaneltokaj: 40 “Kinixteyoltsaktok uan kichijtok tetik ininyolo, kiampa amo tlachiasej ika ininixteyol yon kikuamachilisej ika ininyolo yon tlakuepilisej kampa na para ma nikinchikaua”. 41 Isaías kiijtok ni tlamantli pampa kiitak iueyitilis, uan kamanaltik tlen ya. 42 Maske kiampa kiijtok, miakej inintlayakankauaj judíos tlaneltokakej ipan Jesús; pero amo kiijtouayayaj ininixpa sekinok pampa kinmakasiyayaj fariseos, para amo ma kinkixtikaj kampa tlaueyichiuaj judíos, 43 pampa más kinekiyayaj maseualmej ma kinuejkapantlalikaj uan amo Dios ma kinuejkapantlali.
44 Pero Jesús chikauak kiijtok: “Katli tlaneltoka ipan na, amo san na nechneltoka, nojkia tlaneltoka ipan katli nechualtitlanki; 45 uan katli nechita, nojkia kiita katli nechualtitlanki. 46 Niualajtok ipan Tlaltipaktli kej se tlauili, kiampa nochi katli tlaneltokasej ipan na ayokmo itstosej ipan tsintlayouilotl. 47 Uan tlaj se akajya kikaki notlajtol pero amo kichiua, na amo nijtlajtolsenkauas,* pampa amo niualajtok para nikintlajtolsenkauas katli itstokej ipan Tlaltipaktli, niualajtok para nikinmakixtis. 48 Katli nechuejkamajkaua uan amo kiselia notlajtol, kipia tlen ika kitlajtolsenkauasej: tlen nikijtojtok kitlajtolsenkauas kema asis nopa tonali. 49 Pampa amo nikijtojtok san tlen na nimoiljuia, elki noTata katli nechualtitlanki, yaya nechnauatik tlen moneki nikijtos uan tlen moneki nitlamachtis. 50 Uan nijmati tlen nechiljuik kichiua maseualmej ma kipiakaj nemilistli tlen amo kema tlamis.* Yeka nochi tlen nikijtoua, nikijtoua sanse kej noTata nechiljuijtok”.