Hechos (Tlen apóstoles kichijkej)
19 Kema Apolos itstoya Corinto, Pablo panotiajki ipan nopa ojtli tlen mokaua uejka tlen mar uan ixtemok para altepetl Éfeso. Nopaya kinpantik se keskij Jesús itokilijkauaj 2 uan kintlatsintokik: “¿Inkiselijkej ichikaualis Dios* kema pejkej intlaneltokaj?”. Inijuantij kinankilijkej: “Amo kema tijkaktokej kenijkatsa uelis tijselisej ichikaualis Dios”. 3 Ya kiniljuik: “Uajka, ¿kenijkatsa inmechatsonpoliuiltijkej?”. Inijuantij kinankilijkej: “Techatsonpoliuiltijkej kej Juan tlamachtik”. 4 Pablo kiniljuik: “Juan teatsonpoliuiltik para kinextisej moyolkueptoyaj uan kiniljuiyaya maseualmej ma kineltokakaj katli ualaskia más teipa que ya: Jesús”. 5 Kema kikajkej nopa, moatsonpoliuiltijkej ipan itoka toTeko Jesús. 6 Kema Pablo kitlalik imax ininpani, Dios kinmakak ichikaualis uan pejkej kamanaltij ipan sekinok tlajtoli uan tematiltiyayaj tlen Dios kiniljuiyaya. 7 Elkej se 12 tlakamej.
8 Uajka, Pablo yajki kampa tlaueyichiuaj judíos uan eyi metstli kinmachtik uan kitemolik kenijkatsa kinpaleuiskia ma tlaneltokakaj ipan iTlanauatijkayo Dios, uan amo majmauiyaya. 9 Pero se keskij eliyayaj tochontikej uan amo kinejkej kineltokasej, uan ininixpa maseualmej amo kuali kamanaltiyayaj tlen iOjui toTeko. Yeka, Pablo kinkajtejki uan kinuikak Jesús itokilijkauaj. Uan mojmostla tlamachtiyaya ipan escuela tlen iaxka Tirano. 10 Ipan ome xiuitl kiampa kichijki, yeka nochi katli itstoyaj ipan tlali Asia, judíos uan nojkia griegos kikajkej itlajtol toTeko.
11 Uan Dios kitekiuik Pablo para nojua kichiuas uejueyi milagros. 12 Hasta kikuiyayaj ipayos uan imandiles Pablo uan kinuikiliyayaj katli mokokouayayaj. Inijuantij mochikauayayaj uan amo kuali ajakamej* kisayayaj tlen inijuantij. 13 Pero se keskij judíos katli yauiyayaj kampa ueli para kinkixtisej amo kuali ajakamej, nojkia kinejkej kitekiuisej itoka toTeko Jesús para kinkixtisej nopa amo kuali ajakamej. Kiijtouayayaj: “Na niinmechnauatia ika itoka Jesús, katli Pablo tematiltia, xikisakaj”. 14 Kiampa kichiuayayaj chikomej ikoneuaj nopa sacerdote katli kipiayaya más tlanauatili, katli motokaxtiyaya Esceva. 15 Pero se amo kuali ajakatl kinnankilik: “Nikixmati Jesús uan nijmati ajkia eli Pablo. Pero, ¿ajkia inelij inmojuantij?”. 16 Uajka nopa tlakatl katli kipixtoya nopa amo kuali ajakatl momajkajki ininpani nopa tlakamej uan sesentsitsij kinteuijtiajki hasta kema nochi kintlanki. Uan inijuantij cholojkej tlen nopa kali xolotikej* uan kokojtokej. 17 Nochi katli itstoyaj ipan Éfeso, katli eliyayaj judíos uan griegos, kimatkej tlen panotoya. Uajka nochi momajmatijkej, uan itoka toTeko Jesús nojua moueyichijki. 18 Uan miakej katli pejtoyaj tlaneltokaj, yauiyayaj uan kiijtouayayaj nochi inintlajtlakoljuaj ininixpa miakej uan tepouiliyayaj nochi tlen kichijtoyaj. 19 Miakej katli kitekiuiyayaj magia kisentilijkej ininlibros uan kitlatijkej ininixpa miakej. Uan kiitakej nochi nopa libros ipati eliyaya 50 mil platatomij. 20 Uajka itlajtol Jehová* nojua momoyajtiajki ipan sekinok altepemej uan miakej maseualmej kineltokakej.*
21 Kema panok nochi ni tlamantli, Pablo moiljuik panoskia Macedonia uan Acaya, uan teipa yaskia Jerusalén. Nojkia kiijtok: “Kema ya nipanotos nopaya, nojkia moneki nias Roma”. 22 Uajka kintitlanki omej katli kipaleuiyayaj ma yakaj Macedonia: Timoteo uan Erasto. Pero ya mokajki se keski tonali ipan tlali Asia.
23 Ipan nopa tonali, se keskij maseualmej kichijkej ma kipiakaj miak kuesoli katli kitokiliyayaj iOjui toTeko. 24 Se tlakatl katli motokaxtiyaya Demetrio, katli tekitiyaya ika plata, kichijchiuayaya pilteopantsitsij kampa kitlaliyayaj iixkopinka nopa diosa Ártemis. Demetrio kichiuayaya ma kitlanikaj miak tomij katli tekitiyayaj iuaya. 25 Uajka kinsentilik katli tekitiyayaj iuaya uan katli kichiuayayaj sanse tekitl kej ya, uan kiniljuik: “Tlakamej, inmojuantij kuali inkimatij ika ni tekitl tlen tijchiuaj, tijtlanij miak tomij. 26 Uan nama inkiitaj uan inkikakij, amo san ipan Éfeso, nojkia nechka nochi tlali Asia, ne Pablo kichijtok miakej maseualmej ma kipatlakaj tlen moiljuiaj pampa kiijtoua nopa dioses katli san tikinmachijchiuaj amo nelnelia elij dioses. 27 Uan amo san uelis kichiuas ayokmo kuali ma kiitakaj nopa tekitl tlen tijchiuaj, nojkia ayokmo kitlepanitasej iteopa nopa diosa Ártemis. Uan nochi katli kiueyichiuaj ipan tlali Asia uan kampa ueli, ayokmo kiueyichiuasej”. 28 Kema nopa tlakamej kikajkej nopa, tlauel kualankej uan kuatsajtsikej: “¡Ipan Éfeso, tlauel ueyi todiosa Ártemis!”.
29 Uajka moajkomankej* maseualmej tlen nopa altepetl, uan nochi sansejko motlalojtiajkej uan kalakitoj kampa teatro* uan kinuauatatstiajkej Gayo uan Aristarco, katli euayayaj Macedonia uan nemiyayaj iuaya Pablo. 30 Pero Pablo kinekiyaya kalakis kampa itstoyaj nopa maseualmej, uan Jesús itokilijkauaj amo kikajkej. 31 Nojkia se keskij katli tlayakanayayaj kema iljuichiuayayaj uan kema mauiltiyayaj, uan kuali kiitayayaj Pablo, tlatitlankej ma kiiljuitij amo ma yaui kampa teatro. 32 Uan sekij kiijtouayayaj se tlamantli uan sekinok seyok, pampa katli mosentilijtoyaj nopaya amo kimatiyayaj tlake panoyaya uan miakej amo kimatiyayaj kenke mosentilijtoyaj. 33 Alejandro itstoya nopaya uan judíos kikuatopejkej tlaixpa. Uan Alejandro pejki momaojolinia pampa kinekiyaya kiijtos ininixpa nopa maseualmej nochi tlen panotoya. 34 Pero kema kimatkej ya eliyaya judío, nochi sansejko pejkej kuatsajtsij. Uan ome hora uejkajkej kiijtouaj: “¡Ipan Éfeso, tlauel ueyi todiosa Ártemis!”.
35 Kema nopa tlayakanketl tlen nopa altepetl uelki kinyoltlalik, kiijtok: “Tlakamej tlen Éfeso, ¿amo inkimatij nochi katli tiitstokej Éfeso tijmokuitlauiaj iteopa nopa ueyi diosa Ártemis uan iixkopinka tlen uetski tlen iluikak? 36 Nochi kimatij nopa, yeka ayokmo xikualanikaj uan amo xijchijtiuetsikaj se tlamantli. 37 Ni tlakamej katli inkinualikatokej nikaj amo tlachtekij ipan teopamitl yon kiixpanotokej todiosa ika tlen kiijtojkej. 38 Yeka tlaj Demetrio uan katli tekitij iuaya kinekij kiteljuisej se akajya ika se tlamantli, onka se keski tonali kema monechikouaj katli tetlajtolsenkauaj uan yeka itstokej gobernadores. Uajka nopaya ma kiijtokaj ika tlake kinekij kinteljuisej. 39 Pero tlaj inkinekij inkichiuasej seyok tlamantli, ni kuesoli moneki mosenkauas kej kiijtoua totlanauatiljuaj. 40 Ika tlen panotok namantsi, uelis kiijtosej tijnekij titlaijixnamikisej, pampa amo uelis tikijtosej kenke mochijtok ni kualantli”. 41 Kema tlanki kiijtoua nopa, nochi kistejkej.