Nopa achtoui carta tlen kiijkuilok Pedro

4 Pampa Cristo tlaijiyouik kema eliyaya se maseuali, inmojuantij nojkia ximokualchijchiuakaj para inkipiasej sanse inmotlalnamikilis kej Cristo, pampa tlaj se maseuali tlaijiyouijtok, ya kitlauelkajtok tlajtlakoli, 2 kiampa kema nojua yoltos ayokmo kichiuas tlen kinyoltilana maseualmej, nama kichiuas tlen Dios* kineki. 3 Pampa ya miak tonali inkichijtokej tlen maseualmej kinekij, amo inpinauayayaj intlajtlakolchiuasej,* tlauel inmechyoltilanayaya inkichiuasej tlen amo kuali, tlauel intlaiyayaj, inkichiuayayaj iljuitl kampa san tlemach intlachiuayayaj, iniljuichiuayayaj para intlaisej uan nojkia inkinueyichiuayayaj tlamantli tlen tlauel fiero tlen maseualmej kinueyichiuaj.* 4 Inijuantij mosentlachiliaj pampa kiitaj ayokmo inkichiuaj tlen amo kuali sanse kej inijuantij, yeka tlauel inmechtlaijiljuiaj. 5 Pero ni maseualmej kimakasej cuentas katli kuali mokualchijchijtok para kintlajtolsenkauas katli yoltokej uan katli miktokej. 6 Yeka, nojkia kinmatiltijkej nopa kuali tlamachtili katli miktokej, kiampa maske kintlajtolsenkauasej kej maseualmej kintlajtolsenkauaj, uelis itstosej pampa ichikaualis Dios* kinyakana.

7 Pero itlamia nochi tlamantli ya monechkauijtok. Uajka, xijnextikaj kuali intlalnamikij uan nochipa xikilnamikikaj inmomaijtosej.* 8 Pero más ipati, ximoiknelikaj se ika seyok pampa katli teiknelia nochipa kineki tetlapojpoljuis. 9 Kuali ximoselikaj se ika seyok uan amo xikitakaj kej se tlamamali.* 10 Ika nopa yajatili* tlen inmechmakatokej, xijtekiuikaj para inmopaleuisej se ika seyok, kej kuali tlatekipanouanij katli kinpaleuiaj sekinok ma kiselikaj tlateochiualistli tlen amo kinamiki tijselisej* tlen monextia ika miak tlamantli. 11 Tlaj se akajya kamanalti, ma kichiua kej se katli tematiltia tlen Dios kiijtoua, uan tlaj se akajya kintekipanoua sekinok, ma kichiua kej se katli motemachia ipan itetikayo Dios, kiampa kiueyichiuasej Dios ipan nochi tlamantli ika Jesucristo. San yaya kinamiki ma kiuejkapantlalikaj uan ma kipia tetikayotl para nochipa uan amo kema ma tlami. Amén.*

12 Noikniuaj katli niinmechiknelia, amo ximosentlachilikaj kema inkiixnamikij tlaouijkayotl kej eliskia tlitl, kejuak inmechpanoskia se tlamantli tlen amo kema inmechpanotok. 13 Más kuali, nojua xiyolpaktokaj kema intlaijiyouiaj sanse kej Cristo, kiampa nojkia initstosej ika miak pakilistli kema nesis iueyitilis. 14 Tlaj inmechtlaijiljuiaj pampa inelij Cristo itokilijkauaj, inyolpakij pampa nopa kinextia inkipiaj nopa chikaualistli tlen tlauel yejyektsi, nopa kiijtosneki ichikaualis Dios.

15 Uajka, yon se tlen inmojuantij ma tlaijiyoui pampa temiktik, tlachtejki, kichijki tlen amo kuali o mokalakik kampa amo icuenta. 16 Pero tlaj se akajya tlaijiyouia pampa eli Cristo itokilijka, amo ma pinaua; más kuali, nojua ma kiueyichijto Dios pampa monejnemiltia kej Cristo itokilijka. 17 Pampa ya ni eli nopa tonali tlen kiixtlalijtokej para kintlajtolsenkauasej uan peuas ipan ialtepe Dios.* Pero tlaj achtoui peuas ika tojuantij, ¿tlake kinpanos katli amo kineltokaj nopa kuali tlamachtili tlen Dios? 18 “Uan tlaj se katli kichiua tlen xitlauak moneki kichiuas kampeka para ma kimanaui* Dios, ¿tlake kinpanos katli amo tlatlepanitaj uan tlajtlakolchiuaj?”. 19 Uajka, katli tlaijiyouijtokej pampa kichiuaj tlen Dios kineki, nojua ma mokauakaj imako Katli Kichijchijki Nochi uan uelis motemachisej ipan ya kema kichiuaj tlen kuali.