Nopa achtoui carta tlen kititlanilijkej Timoteo
1 Na niPablo, se iapóstol Cristo Jesús pampa kiampa tlanauatik toTlamakixtijka* Dios* uan nojkia Cristo Jesús, katli kichiua ma tijchiakaj tijselisej tlen kuali, 2 nimitstlajkuiljuilia ta, Timoteo,* katli nelnelia tieli kej se nokone pampa nojkia titlaneltoka sanse kej na:
ToTata Dios uan toTeko Cristo Jesús ma kinextikaj ueyi ininyolo ika ta,* ma mitstlasojtlakaj uan ma mitsmakakaj tlaseuilistli.
3 Kema nechka niaskia Macedonia, nimitsyololinik ximokaua ipan Éfeso, uan nama sampa kiampa nijchiua para xikinnauati se keskij maseualmej amo ma tlamachtikaj seyok tlamachtili 4 yon ma kichiuilikaj cuenta tlapoualistli tlen amo melauak yon ma kitemokaj ajkia elkej inintatauaj katli uejkajkia itstoyaj. Nopa amo tepaleuia, san kichiua ma kiijtokaj tlen amo uelij kinextiaj para melauak uan amo eli se tlamantli tlen Dios temaka para kichiuas más ma titlaneltokakaj. 5 Nitemaka ni tlanauatili para nochi ma tijnextikaj tlaiknelili pampa techyololinia toyolo tlapajpaktik, pampa tijpiaj kuali totlalnamikilis uan nelnelia kuali titlaneltokaj uan amo san titlachiuaj. 6 Se keskij ayokmo kichiuaj ni tlamantli, yeka san tlapik mokamaijixnamikij ika tlen amo tepaleuia. 7 Kinekij tlamachtisej nopa tlanauatili, pero amo kikuamachiliaj tlen kiijtouaj yon tlen tlauel kinekij ma mochiua.
8 Tojuantij tijmatij nopa Tlanauatili tlauel tlapaleuia tlaj tijchiuaj kej kinamiki 9 uan kuali tijmatij para nopa tlanauatili amo kitlalijtokej para katli elij xitlauakej, kitlalijtokej para katli kiixpanoj tlanauatili uan katli tlaijixnamikij, katli amo tlatlepanitaj uan katli tlajtlakolchiuaj, katli tetlauelkauaj uan katli kiixpanoj tlamantli tlen kiiyokatlalijtokej para Dios,* katli kinmiktiaj inintatauaj uan katli kinmiktiaj ininnanauaj, maseualmej katli temiktiaj, 10 katli auilnemij,* tlakamej katli motekaj ininuaya sekinok tlakamej, katli kinichtekij maseualmej, katli istlakatij uan katli tlatestigojketsaj pero amo kichiuaj tlen kiijtouaj, uan nojkia para nochi tlamantli tlen kiijixnamiki nopa tlamachtili tlen tepaleuia, 11 tlen mouika ika nopa kuali tlamachtili tlen nechmakatokej, tlen onpano yejyektsitsij uan iaxka Dios katli yolpaki.
12 Nijtlaskamatilia toTeko Cristo Jesús, katli nechmakak tetikayotl, pampa kiitak nieli temachtli uan yeka nechmakak se tekitl, 13 maske achtouia tlauel nikixpanoyaya Dios ika tlen nikijtouayaya, nikintlatsakuiltiyaya itekipanojkauaj uan nimoueyimatiyaya. Pero Cristo nechtlasojtlak pampa amo nijmatiyaya tlake nijchiuayaya uan amo nitlaneltokayaya. 14 Pero toTeko kinextik tlauel ueyi iyolo ika na,* kichijki ma nitlaneltoka uan nechnextilik nopa tlaiknelijkayotl tlen eltok ipan Cristo Jesús. 15 Tlen nikijtoua eli temachtli uan nochi kinamiki kiselisej: Cristo Jesús ualajki ipan Tlaltipaktli para kinmakixtis katli tlajtlakolejkej. Uan na nieli katli más tlajtlakole tlen nochi inijuantij. 16 Pero nechtlasojtlak maske nieli katli más tlajtlakole uan kiampa ika na, Cristo Jesús kinextik kipia iyolo pampa kitekiuik tlen nechpanok para kinpaleuis katli tlaneltokasej ipan ya, para kipiasej nemilistli tlen amo kema tlamis.*
17 Nopa Tlanauatijketl katli nochipa tlanauatijtos, katli amo ueli miki, katli amo ueli tikitaj, katli iyojtsi Dios, yaya ma kiuejkapantlalikaj uan ma kiueyichiuakaj para nochipa uan amo kema ma tlami. Amén.*
18 Nokone Timoteo, nimitsnauatia ni tlamantli tlen mouika ika tlen teokamanalouanij* kiijtojkej tijchiuaskia, kiampa tlaj tijtokilis uelis kejuak nojua titlateuijtos kej se kuali soldado, 19 kuali titlaneltokas uan tijpias kuali motlalnamikilis, tlen se keskij ayokmo kipatiitakej uan yeka ayokmo tlaneltokakej. 20 Kej nopa kichijtokej Himeneo uan Alejandro, yeka nopa tlakamej ya nijmaktilijtok Satanás, kiampa ika nopa tlatsakuiltili tlen kiselisej, kiyekosej amo kiixpanosej Dios ika tlen kiijtosej.