Tlen kiijkuilok Mateo
3 Ipan nopa tonali, Juan Katli teAtsonpoliuiltiyaya pejki tlajtolmoyaua* ipan uaktok tlali tlen Judea. 2 Kiijtouayaya: “Ximoyolpatlakaj pampa nopa Tlanauatijkayotl tlen eltok iluikak monechkauijtok”. 3 Kena, teokamanalojketl* Isaías kamanaltitoya tlen Juan kema kiijtok: “Se akajya chikauak kiijtoua* ipan uaktok tlali: ‘¡Xijkualtlalikaj* iojui Jehová!* Xijchiuakaj kuali ma elto’ ”. 4 Juan moyoyontiyaya ika iijuiyo camello uan motsinkechilpiyaya ika se kuetlaxtli, kinkuayaya chapolimej uan nektli tlen kampa ueli onka. 5 Uan nochi maseualmej katli euayayaj Jerusalén, nochi katli itstoyaj Judea uan ipan nochi pilaltepetsitsij tlen eltoya nechka ueyatl Jordán, yauiyayaj kiitaj. 6 Ya kinatsonpoliuiltiyaya ipan ueyatl Jordán, uan inijuantij kiijtouayayaj inintlajtlakoljuaj ininixpa sekinok.
7 Kema kiitak ualayayaj miakej fariseos* uan saduceos* kampa teatsonpoliuiltiyaya, Juan kiniljuik: “Inmojuantij inelij ininkoneuaj kouamej,* pampa inkichiuaj tlen amo kuali, ¿ajkia inmechiljuik uelis inmomanauisej* kema asis ikualankayo Dios?* 8 Achtoui, ika tlen inkichiuaj xijnextikaj nelnelia inmoyolkueptokej. 9 Amo ximoiljuikaj: ‘ToTata eli Abrahán’, pampa niinmechiljuia Dios uelis kichiuas ipan ni tetl ma kisakaj ikoneuaj Abrahán. 10 Nopa hacha ya eltok itsintla nopa kuauitl. Yeka, nochi kuauitl tlen amo temaka itlajka kitsontekisej uan kitlatisej. 11 Na niinmechatsonpoliuiltia ika atl pampa inmoyolkueptokej. Pero katli ualas teipa kipia más tlanauatili que na. Uan amo kinamiki nijkixtilis ihuaraches. Yaya inmechatsonpoliuiltis ika ichikaualis Dios* uan ika tlitl.* 12 Kipixtok imako tlen ika kiajkomajkaua trigo uan kikixtilis itlasolo kampa tlayejyektiaj.* Kinechikos itrigo uan kitlalis kampa kiajokui. Uan itlasolo kitlatis ika tlitl tlen amo kema seuis”.
13 Uajka Jesús, katli itstoya Galilea, yajki ueyatl Jordán pampa kinekiyaya Juan ma kiatsonpoliuilti. 14 Pero Juan amo kinekiyaya. Kiiljuik: “Kinamiki ta tinechatsonpoliuiltis uan amo na”. 15 Jesús kinankilik: “Xijkaua san nama kiampa ma mochiua pampa kinamiki ma tijchiuakaj nochi tlen Dios kineki”. Uajka Juan kinejki kiatsonpoliuiltis. 16 Kema Jesús kiatsonpoliuiltijkej uan pankisako atitla, nimantsi motlapok iluikak uan Juan kiitak ichikaualis Dios ualtemoyaya kej se paloma itsonixko* Jesús. 17 Uajka, kakistik Dios kiijtok ipan iluikak: “Ni eli noKone katli tlauel nikiknelia, ya kichiua ma niyolpaki”.