Nopa carta tlen kintitlanilijkej hebreos

12 Ni elij tlauel miakej maseualmej kejuak eliskiaj se ueyi mixtli tlen techyaualouaj, inijuantij tematiltiaj* tlen kiitstokej uan tlen kikaktokej. Yeka ma timokixtilikaj nochi tlamamali uan nopa tlajtlakoli tlen amo ouij techuijkoma, uan amo ma tisiauikaj timotlalosej ipan nopa ojtli tlen eltok toixpa kampa nochi motlalojtiauij 2 uan kuali ma tijtlachilikaj Jesús, Nopa Tlayakanketl Katli Más Ueyi uan Katli Kichiua Ma Elto Asitok* Totlaneltokilis. Ya kimatiyaya teipa tlauel yolpakiskia, yeka kiijiyouik se kuauitl kampa kitlaijiyouiltijkej* uan amo kenijki kiitak kema kipinajtijkej, uan moseuijtok ika imanejmak iueyi silla Dios.* 3 Kena, kuali ximoyoliljuikaj ipan katli kiijiyouik miak tlajtoli* tlen ika kitlaijiljuiyayaj nopa tlajtlakolchiuanij katli ininseltitsitsij mochiuiliyayaj tlen amo kuali, kiampa amo insiauisej yon inmoyolkokosej.

4 Maske kejuak inmoteuiaj ika nopa tlajtlakoli, inmojuantij ayamo inkiijiyouijtokej hasta para inmechmiktisej. 5 Uan inmojuantij inkitlamiilkajtokej nopa consejo tlen Dios inmechmakak sanse kej se tetaj kinnojnotsa ikoneuaj: “Nokone, amo ximoiljui amo ipati kema Jehová* mitstlalnamiktia uan amo ximoyolkoko kema mitstlakaualtia, 6 pampa Jehová* kintlalnamiktia katli kiniknelia. Kena, ya kintlatsakuiltia* nochi katli kinselia kej ikoneuaj”.

7 Inmojuantij moneki inkiijiyouisej nochi, pampa ika nopa tlamantli, Dios nojkia inmechtlalnamiktia.* Ya inmechita kej ikoneuaj, ¿uan inmoiljuiaj itstok se konetl katli itata amo kema kitlalnamiktijtok? 8 Pero tlaj inmojuantij amo inmechtlalnamiktijkej sanse kej nochi kinamiki ma techtlalnamiktikaj, uajka amo nelnelia inelij ikoneuaj, inelij ikoneuaj seyok tetaj.* 9 Nojkia, totatauaj techtlalnamiktiyayaj uan tojuantij tikintlepanitayayaj. ¿Amo inmoiljuiaj más kinamiki tijkauasej ma techyakana toTata katli kiyakana tonemilis ika ichikaualis* para ma tiyoltokaj? 10 Pampa totatauaj techtlalnamiktijkej san se keski tonali uan kichijkej kej inijuantij kiitakej kuali, pero Dios techtlalnamiktia para techpaleuis uan kiampa uelis tielisej titlatsejtseloltikej* kej ya. 11 Kema techtlalnamiktiaj, nelia amo techpaktia, pampa ipan nopa tlalochtli* kichiua ma timoyolkokokaj.* Pero katli kikauaj ma kintlalnamiktikaj, teipa kinpaleuia para ma kichiuakaj tlen xitlauak uan para ma kipiakaj tlaseuilistli.

12 Yeka xijtetilikaj inmomax tlen uetstok uan inmotlankuax tlen ayokmo tetik, 13 uan nojua xijchijtokaj ma elto xitlauak nopa ojtli kampa innejnemisej, kiampa katli metskuachotik mochikauas uan ayokmo molekuenis. 14 Xijtemolikaj kenijkatsa initstosej ika tlaseuilistli ika nochi maseualmej uan kenijkatsa inmochiuasej intlatsejtseloltikej, pampa katli amo eli tlatsejtseloltik amo uelis kiitas toTeko. 15 Kuali xijtlachilikaj para nochi ma mopaleuikaj kema Dios kinextia ueyi iyolo ika tojuantij,* uan ximomokuitlauikaj para amo aka ma mochiua kej ineljuayo se xiuitl tlen eli veneno tlen peua chamani. Nopa maseuali kichiua ma onka kuesoli uan kinsokiuia miakej; 16 uan kuali xijtlachilikaj para amo ma itsto kampa inmojuantij yon se katli auilnemi,* uan yon se katli amo kipatiita tlamantli tlen iaxka Dios, sanse kej Esaú, katli ika se tlakualistli kipatlak tlen kinamikiyaya kiselis pampa eliyaya achtouiejketl. 17 Pampa inmojuantij inkimatij, kema kinejki kiselis nopa tlateochiualistli, ayokmo kimakakej. Maske mochokilik uan kichijki kampeka kipatlas tlen itata kitlapejpenijtoya, elki san tlapik.

18 Pampa inmojuantij amo inmonechkauijtokej ika se tlamantli tlen amo uelis inkiitskisej uan lementok, yon ika se mixtli tlen yayauixtok yon ika se ueyi tsintlayouilotl, yon ika se chikauak ajakatl 19 yon inmonechkauijtokej kampa kakistitok se trompeta, yon kampa kakisti itoskak se akajya katli kamanalti. Kema israeleuanij kikajkej itoskak, tlajtlankej ayokmo tleno ma kiniljui. 20 Pampa tlauel momajmatijtoyaj kema kinmakakej ni tlanauatili: “Hasta tlaj se tlapiali kinechkauia nopa tepetl, moneki kitepachosej”.* 21 Uan tlen kiitayayaj eliyaya tlauel temajmati, yeka Moisés kiijtok: “Niuiuipika pampa tlauel nimajmaui”. 22 Pero inmojuantij inmonechkauijtokej ipan tepetl Sion uan ipan ialtepe Dios katli yoltok, tlen kiijtosneki nopa Jerusalén tlen eltok iluikak, kampa tlauel miakej ángeles 23 mosentilijtokej ipan se ueyi tlanechikolistli. Inmonechkauijtokej ipan inintlanechikol nopa achtouieuanij katli kinamatlalijtokej ne iluikak, kampa Dios Katli Eli Juez tlen nochi, uan kampa itstokej katli xitlauakej katli monejnemiltiaj kej ichikaualis Dios kinyakana uan ya kinkixtilijtokej tlajtlakoli. 24 Inmonechkauijtokej kampa Jesús, katli motlajkoketsa* para ma mochiua se yankuik tlajtolsenkaualistli,* uan kampa nopa estli tlen yaya techatsejtseljuilik uan eli más kuali que ieso Abel.

25 Kuali xikitakaj para amo inkiuejkamajkauasej katli kamanaltitok. Pampa tlaj amo momanauijkej* katli amo kinejkej kitlakakilisej katli tematiltiyaya ipan Tlaltipaktli tlen Dios kiijtouayaya, ¡uajka achi más tojuantij amo timomanauisej tlaj timouejkatlaliaj tlen katli kamanalti desde iluikak! 26 Ipan nopa tonali, itoskak kitsejtselok Tlaltipaktli, pero nama kitenkajtok ni tlamantli: “Sampa nijtsejtselos Tlaltipaktli, uan amo san nopa, nojkia nijtsejtselos iluikaktli”. 27 Nopa tlajtoli “sampa”, kinextia Dios kiixpolos nopa tlamantli tlen ueli motsejtseloua, nopa kiijtosneki tlen sekinok kichijchijtokej, uan kiampa san mokauas para nochipa nopa tlamantli tlen amo ueli motsejtseloua. 28 Yeka, pampa tijselisej se Tlanauatijkayotl tlen amo uelis kitsejtselosej, nojua ma tijchiuakaj kampeka timopaleuisej kema Dios kinextia ueyi iyolo ika tojuantij,* tlen ika uelis tijchiuasej nopa tekitl para tijueyichiuasej Dios kej ya kipaktia, tijnextisej tijmakasij uan tlauel tijtlepanitaj. 29 Pampa toDios eli kej se tlitl tlen nochi kitlamitlatia.