Nopa achtoui carta tlen kititlanilijkej Timoteo
2 Uajka, achtoui niinmechiljuia ximomaijtokaj,* xijtlajtlanikaj Dios* uan xijtlaskamatikaj por nochi maseualmej, 2 por tlanauatianij uan nochi katli kipiaj uejueyi tekitl, para uelis kuali tiitstosej uan amo tijpiasej kuesoli uan uelis tijtekipanosej Dios ika nochi toyolo uan kej kinamiki. 3 Ni tlamantli eli kuali uan kipaktia toTlamakixtijka* Dios, 4 pampa ya kineki nochi maseualmej ma momanauikaj uan kuali ma kiixmatikaj nopa tlamachtili tlen melauak. 5 Pampa itstok setsi Dios, uan itstok setsi katli motlajkoketsa* ika Dios uan maseualmej, se tlakatl katli eli Cristo Jesús, 6 katli motemaktilik para tlaxtlauas uan kiampa kinmakixtis nochi maseualmej. Ni tlamantli tematiltisej ipan nopa tonali kema kinamiki. 7 Nikijtoua tlen melauak uan amo niistlakati, nechtekimakakej kej tlajtolmoyajketl uan apóstol para nitematiltis ni tlamantli, kej inintlamachtijka katli amo elij judíos para ma tlaneltokakaj uan ma kimatikaj tlen melauak.
8 Uajka, nijneki ejeliuis* tlakamej nojua ma momaijtojtokaj, ma kitlananakaj ininmax tlatsejtseloltik,* amo ma mokualanikaj yon ma mokamaijixnamikikaj ininuaya sekinok. 9 Nojkia siuamej moneki moyoyontisej kej kinamiki, uan kema moyejyekchiuasej* ma kinextikaj tlatlepanitakayotl uan kuali tlalnamikij, uan amo ma moxiljuikaj ika uejueyi tlaxinepaloli* ika oro o perlas yon ma mokentikaj yoyomitl tlen tlauel patiyo, 10 más kuali, ma kichiuakaj tlamantli tlen kuali, kej kinamiki kichiuasej siuamej katli kitekipanouaj Dios ika nochi ininyolo.
11 Kema siuamej momachtiaj san ma tlakaktokaj, uan nochipa ma kinkauakaj tlakamej ma kinyakanakaj. 12 Amo nikinkauilia siuamej ma tlamachtikaj yon ma kinyakanakaj tlakamej, siuamej moneki san tlakaktosej. 13 Pampa Adán achtoui kichijchijkej uan teipa Eva. 14 Nojkia, Adán amo kikajkayajkej, elki nopa siuatl katli tlauel kikajkayajkej uan mochijki se tlajtlakolchijketl.* 15 Maske kiampa panok, tlaj se siuatl kinpias ikoneuaj tlauel kipaleuis amo ma kichiua tlen amo kuali, pero moneki nochipa tlaneltokatos, teiknelijtos uan itstos tlapajpaktik uan kinextis kuali tlalnamiki.