Nopa achtoui carta tlen kiijkuilok Juan

3 ¡Xikitakaj kenijkatsa tlauel techiknelia toTata! Ya techiljuia tielij ikoneuaj, uan nelnelia tielij ikoneuaj. Uan yeka maseualmej amo techixmatij pampa amo kiixmatij Dios.* 2 Noikniuaj katli niinmechiknelia, nama tielij ikoneuaj Dios pero nojua ayamo nesi kenijkatsa tielisej. Tijmatij kema ya monextis tielisej kej ya, pampa tikitasej kej nelnelia eli. 3 Uan nochi katli motemachiaj ipan ya, ininselti motlapajpakchiuasej pampa ya eli tlapajpaktik.

4 Nochi katli tlajtlakolchijtinemij, kiixpanoj nopa tlanauatili; pampa tlajtlakoli kiijtosneki kema kiixpanoj tlanauatili. 5 Inmojuantij nojkia inkimatij ya monextik para kiixpolos totlajtlakoljuaj, uan ya amo kipia tlajtlakoli. 6 Yon se katli itstok iuaya, tlajtlakolchijtinemi; yon se katli tlajtlakolchijtinemi, kiitstok yon kiixmajtok. 7 Nopilkoneuaj, amo aka ma inmechkajkayaua. Katli kichiua tlen xitlauak, kichiua tlen kuali, sanse kej ya eli xitlauak. 8 Katli nojua tlajtlakolchijtinemi, kichiua kej Diablo, pampa Diablo tlajtlakolchijtiualajtok desde uejkajkia.* IKone Dios monextik por ni tlamantli: para kitlamiltis nochi tlen Diablo kichijtok.

9 Nochi katli elij ikoneuaj Dios amo tlajtlakolchijtinemij, pampa ichikaualis Dios* mokaua ipan inijuantij,* uan inijuantij amo uelij tlajtlakolchiuaj pampa elij ikoneuaj Dios. 10 Uelis nesis ajkia inijuantij elij ikoneuaj Dios uan ikoneuaj Diablo ika ni tlamantli: katli amo kichiua tlen kuali uan katli amo kiiknelia iikni, amo kichiua kej Dios. 11 Pampa ya ni eli nopa tlanauatili tlen inkikajkej desde uejkajkia: ma timoiknelikaj se ika seyok; 12 amo ma tijchiuakaj kej Caín, katli kichijki kej Axkualtlakatl uan kimiktik iikni. ¿Uan kenke kimiktik? Pampa kichiuayaya tlen amo kuali, pero iikni kichiuayaya tlen kuali.

13 Noikniuaj, amo ximosentlachilikaj tlaj maseualmej inmechkualankaitaj. 14 Tojuantij kejuak timiktoyaj, pero nama tiyoltokej pampa tikinikneliaj toikniuaj. Katli amo teiknelia nojua kejuak miktok. 15 Katli kikualankaita iikni eli se temiktijketl, uan inmojuantij inkimatij yon se temiktijketl kipias nemilistli tlen amo kema tlamis.* 16 Nama tojuantij tijkuamachiliaj tlen kiijtosneki tlaiknelili, pampa ya temaktilik inemilis* por tojuantij, uan tojuantij moneki titemaktilisej tonemilis por toikniuaj. 17 Pero tlaj se akajya kipia tlen ika uelis tepaleuis uan kiita se iikni amo tleno kipia, pero amo kitlasojtla, ¿kenijkatsa uelis kiijtos kiiknelia Dios? 18 Nopilkoneuaj, amo san xikijtokaj inteikneliaj, xijnextikaj ika tlen inkichiuaj uan nelnelia xiteiknelikaj.

19 Kiampa tijmatisej tlen melauak kiyakana tonemilis uan timotemachisej Dios techiknelia, 20 maske toyolo techtlajtlakoltis, pampa Dios eli más ueyi que toyolo uan kimati nochi. 21 Noikniuaj katli niinmechiknelia, tlaj toyolo amo techtlajtlakoltia, amo timajmauisej tikamanaltisej iuaya Dios; 22 uan nochi tlen tijtlajtlaniaj ya techmaka, pampa tijneltokaj itlanauatiljuaj uan tijchiuaj tlen ya kipaktia. 23 Kena, ya ni eli nopa tlanauatili tlen techmaka: ma titlaneltokakaj ipan itoka iKone Jesucristo uan ma timoiknelikaj se ika seyok kej ya technauatik. 24 Nojkia, katli kineltoka itlanauatiljuaj itstok iuaya Dios, uan ya itstok iuaya nopa maseuali. Uan ika ichikaualis tlen techmakak, tijmatij para ya itstok touaya.