Nopa achtoui carta tlen kititlanilijkej Timoteo

4 Pero nopa tlajtoli tlen uala tlen Dios* xitlauak kiijtoua para teipa se keskij ayokmo tlaneltokasej, pampa kichiuilisej cuenta tlamachtili tlen tlakajkayaua tlen nesi uala tlen Dios, uan nojkia inintlamachtil amo kuali ajakamej,* 2 kitlakakilisej nopa istlakatili tlen kiijtouaj tlakamej katli kipiaj ome ininxayak uan katli inintlalnamikilis ayokmo kinpaleuia pampa kejuak kinmarcarojtokej ika tepostli.* 3 Inijuantij kiijtouaj maseualmej amo kinamiki mosenkauasej uan kinnauatiaj amo ma kikuakaj se keski tlakualistli tlen Dios kichijtok para ma kikuakaj katli tlaneltokaj uan kuali kiixmatij tlen melauak para kitlaskamatilisej Dios. 4 Pampa nochi tlen Dios kichijchijtok nelia eli tlauel kuali, uan tlaj tijtlaskamatiliaj kema tijseliaj, amo kinamiki tijuejkamajkauasej yon se tlamantli, 5 pampa mochiua tlatsejtseloltik* ika itlajtol Dios uan ika tlamaijtoli.*

6 Tlaj tikinmakas toikniuaj ni consejo, tielis se kuali itekipanojka Cristo Jesús, katli kejuak kuali timotlamakatok ika nopa tlajtoli tlen tijneltokaj uan ika nopa kuali tlamachtili tlen tijtokilijtok ika nochi moyolo. 7 Yon kentsi xijseli nopa tlatenpoualistli* tlen kiixpano Dios, kej tlen kiijtouaj sekij nanatsitsij.* Pero xijchiua kampeka* timosentlalis tijtekipanos Dios ika nochi moyolo. 8 Pampa kema se akajya kichiua ejercicio kipaleuia ipan se keski tlamantli, pero kema tijtekipanouaj Dios ika nochi toyolo techpaleuia ipan nochi, pampa kichiua ma tijselikaj tlateochiualistli ipan ni tonali uan nojkia teipa. 9 Tlen nikijtoua eli temachtli uan nochi kinamiki kiselisej. 10 Yeka tijchiuaj kampeka chikauak titekitisej, pampa timotemachijtokej ipan se Dios katli yoltok, katli eli ininTlamakixtijka* nochi maseualmej, pero achi más katli amo kitlauelkauaj.

11 Nojua xitemakato uan xitlamachtijto ni tlanauatili. 12 Amo xijkaua yon se akajya amo ma mitstlepanita san pampa nojua titelpokatl. Más kuali, xikinpaleui tlaneltokanij ma kichiuakaj kej ta kema kiitasej kej tikamanalti, kej timonejnemiltia, kej titeiknelia, kej titlaneltoka uan kej tijpixtok monemilis tlapajpaktik. 13 Maske ayamo niasi, nojua xijchijto kampeka kuali titlapouas ininixpa maseualmej, titetlajtolmakas* uan titlamachtis. 14 Nochipa xijmokuitlaui nopa yajatili* tlen tijpia, tlen tijselik kema ueuejtlakamej mitstlalilijkej ininmax mopani, kema teokamanalouanij* kiijtojkej tlen tijchiuaskia. 15 Ximoyoliljui ipan ni tlamantli; ximosentlali san ya nopa tijchijtos, para nochi xitlauak ma kiitakaj nojua más kuali titlaneltoka. 16 Ajachika* xijtlachilijto kenijkatsa timonejnemiltia uan kenijkatsa titlamachtia. Nochipa xijchijto ni tlamantli, pampa kiampa timomakixtis ta uan nojkia katli mitstlakakiliaj.