Nopa carta tlen kintitlanilijkej Cristo itokilijkauaj tlen Filipos
3 Noikniuaj, para nijtlamiltis, niinmechiljuia nochipa xiyolpaktokaj pampa initstokej sansejko iuaya toTeko. Amo kenijki nikita niinmechtlajkuiljuilis tlen ipa niinmechtlajkuiljuilijtoya, pampa nopa inmechpaleuis.
2 Ximomokuitlauikaj ika nopa maseualmej katli elij kej chichimej, ika katli kinekij inmechchiuilisej tlen amo kuali uan katli san kinekij ximochiuilikaj circuncisión.* 3 Pampa tojuantij tielij katli tijpiaj nopa circuncisión tlen melauak, tojuantij katli tijtekipanouaj Dios* ika ichikaualis* uan timoueyimatij ika tlen Cristo Jesús kichijki uan amo timotemachiaj ipan tlen maseualmej kichiuaj, 4 maske ueliskia nikijtos para na más uelis nimotemachis ipan tlen maseualmej kichiuaj.
Tlaj se akajya moiljuia ueli motemachia ipan tlen maseualmej kichiuaj, uajka na más uelis kiampa nikijtos. 5 Pampa nechchiuilijkej circuncisión* kema ya nijpixtoya chikueyi tonali ika nitlakajtoya, nieua Israel ipan nopa ueyi familia* tlen Benjamín, nieli hebreo pampa notatauaj eliyayaj hebreos, nieliyaya fariseo* uan nijtokiliyaya nopa tlanauatili, 6 tlauel nitlaneltokayaya ipan noreligión, yeka nikintlaijiyouiltik toikniuaj tlen tlanechikoli, uan nojkia nijnextik amo nijchijtoya yon se tlamantli tlen amo kuali, pampa nijchiuayaya tlen nopa tlanauatili kiijtoua eli xitlauak. 7 Pero nochi nopa tlamantli tlen achtouia nikitayaya tlauel ipati, nama nikita ayokmo kipia ipati* pampa nieli se Cristo itokilijka. 8 Uan amo san nopa, nojkia nikita nochi tlamantli san tlapik pampa nama nikixmati noTeko Cristo Jesús, uan nopa kena tlauel ipati. Yaya nijtekipanoua uan yeka amo kenijki nikita pampa nijpolojtok nochi nopa tlamantli uan nikita kej se monto tlasoli, para uelis niitstos iuaya Cristo* 9 uan ma kiitakaj nieli se itokilijka. Pero amo nieli xitlauak pampa nijchiua tlen kiijtoua nopa Tlanauatili, nieli xitlauak pampa nitlaneltoka ipan Cristo; kena, pampa Dios kinita xitlauakej katli tlaneltokaj ipan Cristo. 10 Na nimosentlalijtok kuali nikixmatis, uan nikixmatis nopa tetikayotl tlen kichijki ma moyolkui, nojkia nijneki nitlaijiyouis kej ya tlaijiyouik uan nimikis sanse kej ya mijki, 11 para nikitas tlaj uelis nielis se tlen nopa katli achtoui moyolkuisej.
12 Amo nijneki nikijtos para ya nijselijtok nopa tlateochiualistli yon nikijtoua ya nijtlamichijki tlen monekiyaya, na san nijchiua kampeka para nikitas tlaj uelis nijselis nopa tlateochiualistli, pampa nijmati Cristo Jesús nechtlapejpenik para nijselis. 13 Noikniuaj, nijmati ayamo nijselia nopa tlateochiualistli. Pero kena niitstok temachtli ipan ni tlamantli: nikilkaua nochi tlen mokajtia tlaika uan nimotilana para nikaxilis* tlen ualas teipa, 14 uan kiampa nijchiua kampeka niasiti kampa nimosentlalijtok, para uelis nijselis nopa tlateochiualistli tlen Dios nechmakas ne iluikak pampa nechnotski ika Cristo Jesús. 15 Uajka, katli kuali titlaneltokaj ma tijpiakaj ni tlalnamikilistli, uan tlaj ipan se tlamantli amo kiampa inmoiljuiaj, Dios inmechnextilis tlake tlalnamikilistli moneki inkipiasej. 16 Pero maske ya tijmatij kenijkatsa kuali tijchiuasej miak tlamantli para tijtekipanosej Dios, nojua ma tijsentokilikaj tijchiuasej kej ipa tijchijtiualauij.
17 Noikniuaj, nochi inmojuantij sansejko xijchiuakaj kej na, uan xikintlachilikaj katli monejnemiltiaj kej tojuantij tiinmechnextilijkej. 18 Pampa itstokej miakej katli monejnemiltiaj kejuak kikualankaitaskiaj nopa kuauitl kampa kitlaijiyouiltijkej* Cristo. Achtouia ajachika* nikinilnamikiyaya, pero nama kema nikinilnamiki hasta niixayotemo. 19 Inijuantij temachtli kintsontlamiltisej uan tlen tlauel kiyoltilana inintlakayo kiitaj kej inindios; moueyimatij ika tlamantli tlen monekiskia kichiuas ma pinauakaj, uan san moiljuiaj ipan tlamantli tlen onka ipan ni Tlaltipaktli. 20 Pero tojuantij tieuaj iluikak uan tlauel tijchiaj se totlamakixtijka,* toTeko Jesucristo, katli itstok iluikak. 21 Ya kipatlas totlakayo tlen amo tetik, para kichiuas ma eli kej itlakayo tlen tlauel yejyektsi. Uan kichiuas nopa ika iueyichikaualis tlen ika kipia tlanauatili para kinauatis nochi tlamantli.