Apocalipsis

20 Nikitak se ángel katli temoyaya tlen iluikak uan kiitskitoya nopa llave tlen nopa ostotl tlen tlauel uejkatla* uan se ueyi cadena. 2 Kiitskik nopa dragón,* nopa kouatl* tlen uejkajkia, katli eli Diablo uan Satanás, uan kiilpik mil xiuitl. 3 Uan kitlauisok* uan kitsajki ipan nopa ostotl tlen tlauel uejkatla, kuali kitsajki kampa kikalakik* para ayokmo sampa ma kinkajkayaua maseualmej tlen nopa altepemej hasta kema tlamiskia nopa mil xiuitl. Uan teipa, kikixtisej san se tlalochtli.*

4 Nikitak uejueyi sillas, uan katli moseuijtoyaj nopaya kinmakakej tlanauatili para ma tetlajtolsenkauakaj. Kena, nikitak inineso* katli kinmiktijkej pampa tematiltijkej tlen Jesús uan pampa kamanaltikej tlen Dios,* katli amo kiueyichijtoyaj nopa fiero tlapiali yon iixkopinka uan amo kintlalilijtoyaj nopa marca ininkuaixpa yon ipan ininmax. Inijuantij moyolkuikej uan tlanauatijkej iuaya Cristo mil xiuitl. 5 Ni elkej katli achtoui moyolkuikej. (Nopa sekinok katli miktokej amo kiselijkej nemilistli hasta kema tlanki nopa mil xiuitl). 6 Yolpakij uan tlatsejtseloltikej katli achtoui moyolkuij; nopa ompa mikilistli amo kipia tlanauatili ipan inijuantij, pampa elisej isacerdotes Dios uan Cristo, uan tlanauatisej iuaya Cristo mil xiuitl.

7 Pero kema tlamis nopa mil xiuitl, Satanás kikixtisej kampa tsaktok 8 uan kisas para kinkajkayauas nopa altepemej tlen eltok ipan naui lados Tlaltipaktli, nopa Gog uan Magog, uan kiampa kinsentilis para tlateuisej. Ininmiaka elis kej xali tlen onka ipan mar. 9 Uan yajtiajkej ipan nochi Tlaltipaktli uan kiyaualojkej kampa itstoyaj katli tlatsejtseloltikej* uan nopa altepetl katli Dios kiiknelia. Pero temok tlitl tlen iluikak uan kintlatik. 10 Nopa Diablo, katli kinkajkayajtinenki, kitlauisojkej* ipan tlitl tlen eli kej se ueyi akomoli tlen tlatla ika azufre, kampa ya itstoyaj nopa fiero tlapiali uan nopa teokamanalojketl katli san tlakajkayaua.* Inijuantij kintlaijiyouiltisej* para nochipa tonaya uan tlayoua uan amo kema tlamis.

11 Nikitak se ueyi silla chipauak uan nojkia katli nopaya moseuijtoya. Tlaltipaktli uan iluikaktli cholojkej iixpa uan ayokmo kema kinitakej. 12 Uan nikinitak katli miktokej, katli ya uejueyij uan katli pilsiltsitsij*, ijkatoyaj iixpa nopa ueyi silla, uan motlapok miak amamimili. Pero motlapok seyok: nopa amamimili kampa kiijtoua ajkia inijuantij kiselisej nemilistli. Uan ika tlen ijkuilijtoya ipan nopa amamimili, kintlajtolsenkajkej katli miktokej ika tlen kichijkej. 13 Nopa mar temaktilik nopa mijkatsitsij katli nopaya itstoyaj, uan mikilistli uan nopa Mijkaostotl* nojkia temaktilijkej mijkatsitsij katli nopaya itstoyaj. Uan sejse tlen inijuantij kintlajtolsenkajkej ika tlen kichijkej. 14 Nopa mikilistli uan nopa Mijkaostotl* kintlauisojkej ipan nopa tlitl tlen eli kej se ueyi akomoli tlen tlatla. Nopa tlitl tlen eli kej se ueyi akomoli tlen tlatla, kiixnextia nopa ompa mikilistli. 15 Nojkia, katli amo ijkuilijtoya inintoka ipan nopa amamimili kampa kiijtoua ajkia inijuantij kiselisej nemilistli, kintlauisojkej ipan nopa tlitl tlen eli kej se ueyi akomoli tlen tlatla.