Apocalipsis
17 Se tlen nopa chikomej ángeles katli kipixtoyaj nopa chikome pilplatojtsitsij tlen komoltik, ualajki uan nechiljuik: “Xiuala uan nimitsnextilis kenijkatsa kitlajtolsenkauasej nopa siuatl katli monamaka,* katli moseuia ipan miak atl. 2 Tlanauatianij tlen Tlaltipaktli auilnenkej* iuaya, uan maseualmej katli itstokej ipan Tlaltipaktli moiuintijkej ika ivino, tlen kiixnextia kej auilnemi”.
3 Uan ika ichikaualis Dios,* ya nechuikak ipan uaktok tlali. Uajka nikitak se siuatl moseuijtoya ipan se fiero tlapiali tlen nelchichiltik, katli kipixtoya miak tokajyotl tlen ika kiixpano Dios* uan kipixtoya chikome itsonteko uan matlaktli ikuakua. 4 Nopa siuatl moyoyontijtoya ika se yoyomitl moradojtik uan nelchichiltik, uan motlalilijtoya tlamantli tlachijchiuali ika oro, piltetsitsij tlen yejyektsitsij uan perlas. Kiitskitoya se copa tlachijchiuali ika oro tlen temitoya ika tlamantli tlen kiijiaj* uan tlamantli tlen sokiyo tlen kichiua para auilnemis.* 5 Ipan ikuaixpa ijkuilijtoya se tokajyotl tlen amo aka kimati: “Ueyi Babilonia, ininnana siuamej katli monamakaj uan tlamantli tlen kiijiaj tlen onka ipan Tlaltipaktli”. 6 Uan nikitak nopa siuatl moiuintijtoya ika inineso katli tlatsejtseloltikej* uan ika inineso itestigos Jesús.
Kema nikitak, tlauel nimosentlachilik. 7 Uajka nopa ángel nechiljuik: “¿Kenke timosentlachilia? Na nimitsiljuis tlen ayamo aka kimati tlen nopa fiero tlapiali uan tlen nopa siuatl tlen tlejkotok ipani, tlen kipia chikome itsonteko uan matlaktli ikuakua. 8 Nopa fiero tlapiali katli achtoui tikitak, itstoya nikaj, uan maske nama ayokmo itstok nikaj, nechka kisas tlen nopa ostotl tlen tlauel uejkatla* uan kitsontlamiltisej. Maseualmej katli itstokej ipan Tlaltipaktli, katli desde kema pejki Tlaltipaktli* amo ijkuilijtok inintoka ipan nopa amamimili kampa kiijtoua ajkia inijuantij kiselisej nemilistli, mosentlachilisej kema kiitasej nopa fiero tlapiali katli itstoya nikaj, uan nama ayokmo itstok nikaj, pero sampa monextis.
9 ”Para uelis mokuamachilis ni tlamantli, moneki se akajya ma tlalnamiki. Nopa chikome itsonteko kiixnextia chikome tepemej, kampa moseuia nopa siuatl. 10 Itstokej chikomej tlanauatianij, makuiltij ayokmo itstokej, se nojua itstok uan nopa seyok ayamo asi, pero kema asiki, san mokauas se tlalochtli.* 11 Uan nopa fiero tlapiali katli nikaj itstoya pero teipa polijki, ya eli nopa chikuexpa tlanauatijketl; kisa tlen nopa chikomej tlanauatianij uan kitsontlamiltisej.
12 ”Nopa matlaktli ikuakua tlen tikitak kiixnextia matlaktli tlanauatianij tlen ayamo kiseliaj se tlanauatijkayotl, pero kena kinmakasej tlanauatili iuaya nopa fiero tlapiali para ma tlanauatikaj sanse tlalochtli. 13 Inijuantij moiljuiaj sanse tlamantli, uan yeka kimakaj tetikayotl uan tlanauatili nopa fiero tlapiali. 14 Kiteuisej nopa Pilborregojtsi, pero nopa Pilborregojtsi kintlanis pampa ya eli ininTeko nochi katli elij tekojmej uan ininTlanauatijka nochi tlanauatianij. Nojkia tlatlanisej katli itstokej iuaya, inijuantij elij katli Dios kinnotstok uan kintlapejpenijtok uan amo kitlauelkauaj.
15 Nopa ángel nechiljuik: “Nopa miak atl tlen tikitak, kampa moseuijtok nopa siuatl katli monamaka, kiixnextia pilaltepetsitsij, miakej maseualmej, altepemej uan maseualmej katli kamanaltij sekinok tlajtoli. 16 Nopa matlaktli ikuakua tlen tikitak uan nopa fiero tlapiali, kikualankaitasej nopa siuatl katli monamaka uan kikixtilisej nochi tlen kipia uan mokauas xolotik.* Kikuasej inakayo uan kitlamitlatisej. 17 Pampa Dios kitlalik ipan ininyolo ma kichiuakaj tlen ya moiljuijtok. Yeka nochi inijuantij kipiaj sanse tlalnamikilistli, nopa kiijtosneki kimakasej tlanauatili nopa fiero tlapiali para ma tlanauati hasta kema motlamiaxitijtos itlajtol Dios. 18 Uan nopa siuatl tlen tikitak kiixnextia nopa ueyi altepetl tlen kinnauatia tlanauatianij tlen itstokej ipan Tlaltipaktli”.