Apocalipsis

19 Teipa, ipan iluikak nijkajki se tlamantli kej miakej inintoskak. Inijuantij kiijtouayayaj: “¡Xijueyichiuakaj Jah!* ToDios* kinmakixtia* maseualmej, kipia miak tetikayotl uan ueyitilistli, 2 pampa melauak uan xitlauak tetlajtolsenkaua; pampa kitlatsakuiltik nopa siuatl katli monamaka,* katli kichijki ipan Tlaltipaktli ma auilnemikaj* kej ya, uan Dios momakuepki ika nopa siuatl pampa kinmiktik itekipanojkauaj”. 3 Uan ika ompa nimantsi kiijtojkej: “¡Xijueyichiuakaj Jah!* Nopa poktli tlen kistos kema kitlatisej Babilonia nochipa tlejkotos uan amo kema tlamis”.

4 Nopa 24 ueuejtlakamej uan nopa nauij ángeles motlankuaketskej uan kiueyichijkej Dios, katli moseuijtok ipan ueyi silla uan kiijtojkej: “¡Amén!* ¡Xijueyichiuakaj Jah!”.*

5 Nojkia, ipan nopa ueyi silla kakistik itoskak se akajya uan kiijtok: “Xijueyichiuakaj toDios, nochi inmojuantij katli inelij itekipanojkauaj, katli inkimakasij, katli pilsiltsitsij* uan katli uejueyij”.

6 Uan nijkajki kakistiyaya kej eliskia miakej inintoskak, kej kema kakisti miak atl uan kej kema chikauak tlatomoni. Inijuantij kiijtouayayaj: “¡Xijueyichiuakaj Jah!* ¡Pampa Jehová* toDios, Katli Kipia Nochi Chikaualistli, ya pejtok tlanauatia! 7 Tlauel ma tiyolpakikaj, uan ma tijuejkapantlalikaj nopa Pilborregojtsi pampa ya asik tonali para mosiuajtis uan isiua ya mokualchijchijtok. 8 Kena, isiua kinamiki moyoyontijtos ika yoyomitl tlen lino tlen más kuali, tlen kauani uan amo sokiyo, pampa nopa yoyomitl lino tlen más kuali, kiixnextia tlamantli tlen kuali tlen kichiuaj katli tlatsejtseloltikej”.*

9 Uan nopa ángel nechiljuik: “Xikijkuilo ni: ‘Yolpakij katli kintlanejkej ma tlakuatij kema mosiuajtis nopa Pilborregojtsi’ ”. Uan nojkia kiijtok: “Ni tlajtoli tlen Dios kiijtoua eli melauak”. 10 Teipa, nimotlankuaketski para nijueyichiuas, pero ya nechiljuik: “¡Amo! ¡Amo xijchiua nopa! Na san nieli se tlatekipanojketl kej ta uan moikniuaj, katli kipiaj nopa tekitl para tematiltisej tlen Jesús. ¡Xijueyichiua Dios! Pampa nochi tlen Dios tematiltia, eli para kiijtos tlen melauak tlen Jesús”.

11 Nikitak iluikaktli tlapojtok; uan neski se kauayo chipauak. Uan katli tlejkotok ipan nopa kauayo kitokaxtiaj Katli Amo Kitlauelkaua Dios Uan Eli Melauak, uan tetlajtolsenkaua uan tlateuia kej kinamiki kichiuas. 12 Uan iixteyol eliyaya kej tlilelemektli, uan ipan itsonteko kipixtoya miak coronas. Ipan ya, ijkuilijtok se tokajyotl tlen sekinok amo kimatij, san ya kimati. 13 Moyoyontijtok ika se yoyomitl tlen ajalijtok* ika estli, uan kej ni kitokaxtiaj: ITlajtol Dios. 14 Nojkia, nochi tlateuianij katli itstokej iluikak kitokiliyayaj ipan kauayojmej chipauakej uan moyoyontijtoyaj ika yoyomitl tlen lino tlen más kuali, chipauak uan amo sokiyo. 15 Ikamako kisa se espada* ueueyak uan kuali tlatentili para kinteuis altepemej. Uan kinyakanas maseualmej ika teposkuatopili. Nojkia ipan mokejketsa kampa kipatskaj uvas, tlen kiixnextia ikualankayo Dios, Katli Kipia Nochi Chikaualistli. 16 Uan ipan iyoyo, kampa imets,* ijkuilijtok se tokajyotl: IninTlanauatijka nochi tlanauatianij uan ininTeko nochi katli elij tekojmej.

17 Nojkia nikitak ijkatoya se ángel kampa Tonati. Ya chikauak kuatsajtsik uan kiniljuik nochi totomej katli patlanij tlatlajko tlen iluikak: “¡Xiualakaj nikaj! Ximosentilikaj pampa Dios inmechtlamakas ika miak tlakualistli. 18 Xijkuakaj ininnakayo tlanauatianij, katli kinyakanaj soldados uan tlakamej katli tejtetikej, ininnakayo kauayojmej uan katli yauiyayaj ininpani. Xijkuakaj nochi ininnakayo, katli tlatekipanouaj uan katli amo, katli pilsiltsitsij uan katli uejueyij”.

19 Uan nikitak nopa fiero tlapiali, tlanauatianij katli itstokej ipan Tlaltipaktli uan ininsoldados, nochi mosentilijtoyaj para kiteuisej katli yauiyaya ipan nopa kauayo uan itlateuijkauaj. 20 Uan katli yauiyaya ipan nopa kauayo kinitskik nopa fiero tlapiali iuaya nopa teokamanalojketl katli san tlakajkayaua,* katli kichijki tlaneskayotl* iixpa uan ika nopa kinkajkayajki katli kintlalilijkej imarca nopa fiero tlapiali uan katli kiueyichiuaj iixkopinka. Kema nojua yoltoyaj nopa omej, kintlauisok* ipan tlitl tlen eli kej se ueyi akomoli tlen tlatla ika azufre. 21 Pero nochi nopa sekinok kinmiktijkej ika nopa espada ueueyak tlen kisayaya ikamako katli tlejkotoya ipan nopa kauayo. Uan nochi nopa totomej kuali ixuikej ika ininnakayo.