Apocalipsis

1 Ni tlajtoli Jesucristo tematiltijtok. Dios* kimatiltik Jesucristo para ma kinnextili itekipanojkauaj tlamantli tlen nechka panos. Uan Jesucristo kititlanki iángel para ma kimatilti itekipanojka Juan ika tlaneskayotl*, 2 uan ya tematiltik nopa tlajtoli tlen Dios uan Jesucristo kimatiltijkej, kena, nochi tlamantli tlen kiitak. 3 Yolpaki katli chikauak kipoua ni tlajtoli tlen teipa panos uan yolpakij katli kitlakakiliaj uan kichiuaj tlen nopaya ijkuilijtok, pampa nopa tonali tlen kiixtlalijtokej, monechkauijtok.

4 Na Juan, nikintlajkuiljuilia nopa chikome tlanechikoli tlen eltok ipan tlali Asia:

Dios, “ya katli eli, katli eliyaya uan katli ualas”, uan nopa chikome chikaualistli* katli itstokej iixpa nopa ueyi silla ma kinextikaj ueyi ininyolo ika inmojuantij* uan ma inmechpaleuikaj inkipiasej tlaseuilistli. 5 Uan nojkia Jesucristo, Katli Eli Testigo Tlen Amo Kitlauelkaua Dios, Katli Achtoui Moyolkuik uan Tlanauatijketl katli kinnauatia nochi tlanauatianij katli itstokej ipan Tlaltipaktli, ma kinexti ueyi iyolo ika inmojuantij uan ma inmechpaleui inkipiasej tlaseuilistli.

Katli techiknelia uan katli ika ieso techmakixtik* tlen totlajtlakoljuaj, 6 ya kichijki ma tielikaj tlanauatianij uan sacerdotes para tijtekipanosej iDios uan iTata. San yaya kinamiki ma kiuejkapantlalikaj uan ma kipia tetikayotl para nochipa. Amén.*

7 ¡Xikitakaj! Ualas ika mixtli uan nochi kiitasej, hasta katli kikoyonijkej; uan por ya nochi uejueyi familias* ipan Tlaltipaktli, moyolixtejtejtsonasej.* Kena, amén.

8 “Na nieli Ipejya Uan Itlamia,* kiijtoua Jehová* Dios, katli eli, katli eliyaya uan katli ualas, Katli Kipia Nochi Chikaualistli”.

9 Na Juan, nieli inmoikni uan nojkia nitlaijiyouijtok kej inmojuantij, nojkia nitlanauatis inmouaya uan nikijiyouijtok nochi pampa nieli itokilijka Jesús. Niitstoya ipan piltlaltsi* Patmos pampa nitepouiliyaya tlen Dios uan nitematiltiyaya tlen Jesús. 10 Ika ichikaualis Dios* niitstoya ipan tonali tlen iaxka toTeko, uan ika noika nijkajki se akajya chikauak kiijtok, kej kema kakisti se trompeta, 11 katli kiijtouayaya: “Xikijkuilo tlen tikita ipan se amamimili uan xikintitlanili nopa chikome tlanechikoli: Éfeso, Esmirna, Pérgamo, Tiatira, Sardis, Filadelfia uan Laodicea”.

12 Nimoikankuepki para nikitas ajkia nechkamanaljuiyaya, uan kema nimoikankuepki nikitak chikome tlauilketsali tlen oro. 13 Tlatlajko tlen nopa tlauilketsalmej nikitak itstoya kej katli eli ikone se maseuali* uan moyoyontijtoya ika se yoyomitl tlen ueueyak,* tlen tlamiyaya hasta iikxitla, uan motlajkoilpitoya ika se yoyomitl tlen kichijchijtoyaj ika oro, tlen tlamiyaya hasta iyolixko. 14 Nojkia, itsonteko uan itsonkal eliyaya chipauak kej ipochkiyo* borrego, tlauel chipauak, uan iixteyol eliyaya kej tlilelemektli. 15 Uan iikxiuaj eliyaya kej senkistok cobre tlen kauani kema kitlalijtokej ipan horno, uan itoskak kakistiyaya kej kema motepexiuia miak atl. 16 Ipan imanejmak kinpixtoya chikome sitlalimej; ikamako ualkisayaya se espada* tlen onkak kuali tlatentili uan ueueyak, uan ixayak nesiyaya kej Tonati kema chikauak tona. 17 Kema nikitak, niuetsito iikxitla kej nimiktok.

Uan ya kitlalik imanejmak nopani uan nechiljuik: “Amo ximajmaui. Na nieli Katli Peua Uan Katli Tlami, 18 uan katli yoltok. Nimijki pero nama niitstos para nochipa uan ayokmo kema nimikis, uan nijpia llaves para nijtlapos nopa puerta tlen mikilistli uan Mijkaostotl.* 19 Yeka xikijkuilo ni tlamantli tlen tikitak, tlen nama panotok uan tlen panos kema ya mochijtos ni tlamantli. 20 Nopa chikome sitlalimej tlen tikitak nijpixtoya ipan nomanejmak uan nopa chikome tlauilketsali tlen oro eli tlen Dios ayamo tematiltijtoya,* ya ni kiijtosneki: nopa chikome sitlalimej kiixnextia ángeles tlen itstokej ipan nopa chikome tlanechikoli, uan nopa chikome tlauilketsali kiixnextia nopa chikome tlanechikoli.