Nopa carta tlen kintitlanilijkej hebreos
8 Uajka ya ni tlen más ipati tlen nochi tlen tikijtojtokej: tojuantij tijpiaj se sumo sacerdote kej nopa, uan moseuijtok ika imanejmak iueyi silla Dios* Katli Tlauel Ueyi uan itstok iluikak 2 uan tlatekipanoua kampa tlatsejtseloltik uan ipan nopa yoyonkali* tlen melauak, tlen kichijchijki Jehová* uan amo maseualmej. 3 Pampa nochi sumos sacerdotes kintekimakaj para temaktilisej ofrendas* uan tlapialmej; yeka nojkia monekiyaya nopa sumo sacerdote ma kipia se tlenijki tlen temaktiliskia. 4 Tlaj itstoskia ipan Tlaltipaktli amo eliskia sacerdote, pampa ya itstokej tlakamej katli temaktiliaj ofrendas kej kiijtoua nopa Tlanauatili. 5 Nopa tekitl tlen kichiuaj nopa tlakamej eli kej se ekauili uan tlen kiixnextia tlen onka iluikak, sanse kej kiijtoua nopa tlanauatili tlen Dios kimakak Moisés kema nechka kichijchiuaskia nopa yoyonkali: “Kuali xikita para tijchiuas nochi tlamantli sanse kej nimitsnextilik ipan nopa tepetl”. 6 Pero nama Jesús kiselijtok se tekitl tlen más kuali, pampa nojkia motlajkoketsa* para ma mochiua se tlajtolsenkaualistli* tlen nojkia más kuali, tlen moixtlalik ika nopa tlanauatili uan motlatskilia ipan nopa tlamantli tlen más kuali tlen techtenkauilijkej.
7 Tlaj nopa achtoui tlajtolsenkaualistli amo kipixtoskia yon se tlamantli tlen amo kuali, amo monektoskia ma onka seyok tlajtolsenkaualistli. 8 Pampa nesi para Dios kiita tlen amo kuali ipan ialtepe kema kiijtoua: “ ‘Xikita, monechkauia tonali, kiijtoua Jehová,* kema nijchiuas se yankuik tlajtolsenkaualistli ininuaya katli itstokej ipan altepetl Israel uan ipan altepetl Judá. 9 Amo elis kej nopa tlajtolsenkaualistli tlen nijchijki ininuaya inintatauaj katli uejkajkia itstoyaj ipan nopa tonali kema nikinmaitskik para nikinkixtis tlen tlali Egipto. Inijuantij amo kitlepanitakej nopa tlajtolsenkaualistli, yeka ayokmo nimotekipachok por inijuantij’, kiijtoua Jehová.*
10 ”‘Pampa ya ni elis nopa tlajtolsenkaualistli tlen nijchiuas ininuaya katli itstokej ipan altepetl Israel kema ya panotos nopa tonali’, kiijtoua Jehová.* ‘Nijtlalis notlanauatiljuaj ipan inintlalnamikilis uan nikijkuilos ipan ininyolo. Na nielis ininDios uan inijuantij elisej noaltepe.
11 ” ’Uan ayokmo aka kinmachtis katli euaj ipan ialtepe yon iikniuaj kema kiniljuis: “¡Xikixmati Jehová!”.* Pampa nochi nechixmatisej, desde katli más pilsiltsi* hasta katli más ueyi. 12 Uan na nikintlasojtlas kema kichiuasej tlen amo xitlauak, uan ayokmo kema nikilnamikis inintlajtlakoljuaj’ ”.
13 Kema kamanalti tlen “se yankuik tlajtolsenkaualistli”, kiita tlen achtouia eltoya ayokmo kipia ipati. Kena, tlen ayokmo kipia ipati uan tlen mokajtia tlaika, nechka ixpoliuis.