Adán uan Eva amo kineltokakej toTeotsij

Se tonali, kema Eva iselti itstoya, se kouatl kinojnotski uan kitlajtlanilik: “¿Nelia toTeotsij amo inmechkauilia xijkuakaj itlajka yon se kuauitl?”. Eva kinankilik: “Uelis tijkuasej itlajka nochi kuatinij, san itlajka se kuauitl amo uelis tijkuasej. Pampa tlaj tijkuasej, timikisej”. Uajka nopa kouatl kinankilik: “Amo inmikisej. Tlaj inkikuasej, inelisej kej toTeotsij”. ¿Nelia tlen kiiljuik? Amo. San kikajkayajki. Uan Eva kineltokilik. Eva pejki kitlachilia itlajka nopa kuauitl, uan yeka tlauel kinejki kikualilis itlajka. Uajka kitejki uan kikuajki, uan nojkia kimakak Adán. Maske Adán kimatiyaya mikiskiaj tlaj amo kineltokaskiaj toTeotsij, kikuajki itlajka nopa kuauitl.

Ipan nopa tonali ika tiotlak, Jehová kinnojnotski Adán uan Eva uan kintlajtlanilik kenke amo kichijtoyaj tlen kinnauatijtoya. Eva kitlajtlakoltik nopa kouatl, uan Adán kitlajtlakoltik Eva. Uajka Jehová kinkixtik tlen nopa xochimili pampa amo kineltokakej. Ayokmo kinkauiliskia sampa ma kalakikaj ipan xochimili. Yeka kintlalik iluikaeuanij ma tlamokuitlauikaj; uan nojkia kitlalik se espada tlen lementoya uan momalakachouayaya.

Jehová kiijtok nojkia kitlatsakuiltiskia katli kikajkayajtoya Eva. Nopa kouatl amo eliyaya katli kinojnotski Eva, pampa Jehová amo kinchijki kouamej ma kamanaltikaj. Se iluikaejketl katli amo kuali, kichijki nopa kouatl ma kamanalti pampa kinekiyaya kikajkayauas Eva. Nopa iluikaejketl motokaxtia Satanás uan Diablo. Teipa, Jehová kitsontlamiltis Satanás, kiampa ayokmo kinyoltilanas maseualmej ma kichiuakaj tlen amo kuali.