Pejki momoyaua toTeotsij iTlajtol ipan Portugal

NOPA atl tlen eltok ipan océano Atlántico kitajtakania nopa akali tlen yaui Europa. Toikni George Young yaui ipan nopa akali uan yolpaki kema kiilnamiki tlen uelki kichijki kema tlatekipanok ipan Brasil.a Kema yaui ipan akali, toikni Young moiljuijtok kampa nama tlatekipanos: España uan Portugal, kampa amo tlauel momoyajtok toTeotsij iTlajtol. Kema asiti, moiljuia kenijkatsa kichiuas uan kiampa nochi uelis kikakisej nopa tlamachtili tlen kipanoltis toikni Joseph F. Rutherford uan nojkia kimoyauas 300,000 pilamatsitsij.

Toikni Young asito Lisboa (Portugal) ipan 1925. Kema asito, ipan nopa altepetl amo kuali itstoyaj. Nopa tlauilankayotl tlen mochijki ipan 1910, kichijki ayokmo ma tlanauatikaj san se keskij maseualmej uan ininchampoyouaj, uan nojkia kichijki nopa Iglesia Católica ayokmo ma kipia miak tlanauatili ipan nopa altepetl. Maske maseualmej ueliyayaj kichiuaj se keski tlamantli, sekinok nojua kualaniyayaj ika tlen panoyaya ipan nopa altepetl.

Kema toikni Young nochi kikualchijchijtoya uan kiampa toikni Rutherford kipanoltiskia se tlamachtili, nopa tlanauatijketl kitlalik se tlanauatili pampa se keskij maseualmej kinekiyayaj kitekikixtilisej. Nopa secretario de la Sociedad Bíblica Brítanica y Extranjera kiiljuik toikni Young kipiaskia miak tlaouijkayotl. Maske kiampa kiiljuijkej, tlajtlanki ma kitlanejtikaj se gimnasio tlen eltoya ipan Escuela Secundaria Camões, uan kena kitlanejtijkej.

Ipan mayo 13, kema toikni Rutherford kipanoltiskia se tlamachtili, miakej kinekiyayaj kimatisej tlake panoskia. Ipan uejueyi amatl tlen kitlalijtoyaj ipan uejueyi kali uan ipan periódicos kiijtouayaya itoka nopa tlamachtili eliskia “Cómo vivir en la Tierra para siempre”. Maseualmej katli eliyayaj tlen seyok religión uan tlen kinkualankaitayayaj, nimantsi kiijkuilojkej se tlamachtili ipan periódico kampa kiijtouayaya asitoyaj “tlakajkayauanij”. Nojkia, ipan nopa gimnasio temajmakakej miak pilamochtsitsij tlen kipixtoya tlamachtili tlen amo melauak, tlen toikni Rutherford amo tlamachtiskia.

Maske kichijkej nopa, se 2,000 maseualmej yajkej kampa mopanoltiskia nopa tlamachtili, nojkia uelis se 2,000 maseualmej amo uelkej kalajkej. Miakej kinekiyayaj kimatisej tlake tlamachtiskia toikni, yeka tlejkokej ipan se keski tlamantli tlen eltoya ipan nopa gimnasio.

Panok se keski tlamantli tlen amo kuali. Katli kinkualankaitayayaj chikauak kuatsajtsiyayaj uan kisosolojkej kampa moseuiyayaj. Maske kichijkej nopa, toikni Rutherford amo kualanki uan tlejkok ipan se mesa pampa kinekiyaya maseualmej kuali ma kitlakakilikaj. Kema tlanki tlamachtia, nechka tlajkoyoual, kipano mil doscientos maseualmej kiijtojkej kinekiyayaj ma kintitlanilikaj amatlajkuiloli, yeka kiijtojtejkej kenijkatsa inintoka uan kanke ininchaj. Ualmostla ipan nopa periódico O Século moijkuilojtoya nopa tlamachtili tlen toikni Rutherford kipanoltijtoya.

Ipan septiembre 1925, ipan Portugal pejki mochijchiua La Torre del Vigía ipan tlajtoli portugués, nama kiiljuiaj Tlen Tematiltia (ipan nopa tonali, ipan Brasil ya mochijchiuayaya nopa pilamochtsi ipan tlajtoli portugués). Se katli momachtiyaya Biblia, katli itoka Virgílio Ferguson uan itstoya Brasil, pejki moiljuia kuali eliskia tlaj yaskia Portugal uan tlapaleuiskia ipan tlajtolmoyaualistli. Ya uan toikni George Young tekitikej sansejko ipan sucursal tlen eltoya Brasil. Toikni Virgílio uan isiua Lizzie, nimantsi yajkej Portugal, nopaya sampa kiitakej toikni Young. Tlauel kuali pampa toikniuaj Ferguson yajkej Portugal pampa teipa toikni Young yajki tlajtolmoyaua ipan sekinok altepemej, kej ipan Unión Soviética.

Kema sekij soldados pejkej tlanauatiaj, toikniuaj kipixkej miak tlaouijkayotl. Toikni Ferguson mokajki ipan nopa altepetl uan kinmokuitlauik toikniuaj tlen Portugal uan kinpaleuik nojua ma kitekipanojtokaj Jehová, nojkia kiniljuik tekichiuanij ma kikauakaj ma mosentilikaj ichaj. Ipan octubre 1927, kena kikajkej.

Ipan nopa achtoui xiuitl kema tlanauatiyayaj soldados, se cuatrocientos cuarenta maseualmej kinejkej ma kintitlanilikaj pilamochtsi La Torre del Vigía. Pampa motekiuik pilamatsitsij uan pilamochtsitsij, tlamachtili tlen melauak momoyajki ipan miak altepemej kej: Angola, las Azores, Cabo Verde, Goa (India), Madeira, Mozambique uan Timor Oriental.

Ipan xiuitl 1920, se portugués katli eliyaya jardinero asito Lisboa. Motokaxtiyaya Manuel da Silva Jordão. Kema itstoya Brasil, kikajki se tlamachtili tlen kipanoltik toikni Young. Uan nimantsi kimatki tlen tlamachtiyaya eliyaya tlen melauak, yeka kinejki kipaleuis toikni Ferguson uan kiampa miakej maseualmej ueliskiaj kimatisej tlen melauak. Yeka, Manuel mochijki colportor, uejkajkia kiampa kintokaxtiyayaj katli eliyayaj precursores. Toikniuaj kuali moiljuijtoyaj kenijkatsa kichijchiuasej uan kimoyauasej amatlajkuiloli, yeka tlanechikoli tlen Lisboa moskaltik.

Ipan 1934, toikniuaj Ferguson monejki sampa tlakuepilisej Brasil. Ipan Portugal inijuantij kejuak kitoktejkej tlamachtili tlen melauak. Ipan Europa, amo kuali itstoyaj pampa ipan España onkayaya se tlauilankayotl uan nojkia mochijtoya nopa Ompa Ueyi Tlauilankayotl. Maske panoyaya nopa, toikniuaj katli itstoyaj Portugal nojua kuali tlaneltokayayaj. Ipan se keski xiuitl, maske amo itstoyaj miakej, toikniuaj kuali tlaneltokayayaj. Uan ipan 1947, kema asito John Cooke, nopa achtoui misionero katli kistoya tlen Escuela de Galaad, nelia tlauel kinpaleuik. Kiampa pejki momiakilijtiauij tlajtolmoyauanij. Uan nojua tlauel momiakilijtiajkej maske ipan 1962 nopa tlanauatijketl ayokmo kinkauilik ma kitekipanokaj Jehová. Ipan diciembre 1974, kema Jehová itlajtoltemakauaj sampa kinkajkej ma kitekipanokaj toTeotsij, itstoyaj kipano trece mil tlajtolmoyauanij ipan Portugal.

Ipan ni tonali, kipano cincuenta mil toikniuaj tlajtolmoyauaj tlen toTeotsij iTlanauatijkayo ipan Portugal uan ipan miak islas kampa kamanaltij portugués, kej las Azores uan Madeira. Sekij tlen inijuantij elij ininteipaixuiuaj nopa maseualmej katli yajkej kikakitoj nopa tlamachtili tlen kipanoltik toikni Rutherford ipan 1925.

Tijtlaskamatiliaj Jehová uan nojkia toikniuaj katli amo majmajkej uan kimoyajkej nopa tlamachtili tlen toTeotsij iTlanauatijkayo, inijuantij elkej kej kiijtok Pablo, itekipanojkauaj Cristo Jesús katli kintitlanki ma tlajtolmoyauatij ipan nochi altepemej (Rom. 15:15, 16). (Tlen tikajoktokej ipan Portugal).