¿San ajkia nojua kuali tlanauatik ne Israel?

JOSÍAS san kipiayaya chikueyi xiuitl kema pejki tlanauatia ne Israel ipan nopa ome pilaltepetsitsij tlen eltoyaj ika sur. Ya nojua eliyaya okichpil. Yeka achtoui sekij tlakamej kipaleuijkej ma tlanauati ipan nopa altepetl.

Kema Josías ya tlanauatijtoya chikome xiuitl, pejki kichiua tlen Jehová kineki. Ya nojkia kichijki kej David, Josafat uan Ezequías katli kuali tlanauatijkej. Kema nojua eliyaya telpokatl, amo majmajki kichiuas se tlamantli.

Ipan miak xiuitl, miakej israeleuanij san tlemach tlachijtoyaj. Kinueyichiuayayaj sekinok teotsitsij uan iniixpa teteyomej motlankuaketsayayaj. Yeka ipan nochi nopa altepetl, Josías uan itlapaleuijkauaj pejkej kintlamiltiaj tlen kinueyichiuayayaj. Kichijkej miak tekitl pampa miakej maseualmej kinueyichiuayayaj teteyomej. Xikita ipan tlaixkopinkayotl kenijkatsa Josías uan itlapaleuijkauaj kintlatlapatskej teteyomej.

Teipa Josías kinnauatik eyij tlakamej ma kikualchijchiuakaj nopa Jehová iteokal. Israeleuanij kinmakakej tomij ni eyij tlakamej uan kej nopa kintlaxtlauijkej katli tekitikej. Kema tekitiyayaj ipan teokali, Hilcías (o Hilquías) katli kinyakana sacerdotes, kipantik se tlamantli tlen tlauel ipati; nopa amochtli tlen polijtoya katli kipiayaya Jehová itlanauatiljuaj tlen uejkajkia kiiljuik Moisés ma kiijkuilo.

Kema nopa amochtli kimakatoj Josías, ya kinejki ma kipouilikaj. Kema kikajki, ya kiitak kenijkatsa nopa israeleuanij amo kichiuayayaj tlen Jehová kinnauatijtoya. Tlauel mokuesok, yeka kitsayanki iyoyo kej nesi ipan tlaixkopinkayotl. Uan kiijtok: ‘ToTeko tlauel kualantok touaya pampa totatauaj amo kichijtokej ni tlanauatili tlen toTeko kiijkuilok ipan ni amatlapouali’.

Josías kititlanki nopa sacerdote Hilcías ma kimatiti tlake kinchiuiliskia Jehová. Yeka Hilcías yajki kitlajtlanito nopa tlajtolpanextijketl Hulda. Ya kimatiltik Hilcías tlen Jehová kiiljuijtoya. Uan kiiljuik ma kimatiltiti Josías ni: ‘Jerusalén uan nochi tlakamej nikintsontlamiltis pampa kinueyichijtokej teotsitsij tlen amo melauakej, uan kichijtokej tlen amo kuali. Uan pampa ta, Josías, tijchijtok tlen kuali, nijtitlanis ni tlatsakuiltilistli kema ya timiktos’.