¿Kenijkatsa uelis kuali timomachtisej tlen kiixtomasej ipan tlanechikoli?

Tlaj mitsmachtiaj Jehová itlajtoltemakauaj uelis achtoui timomachtia moselti nopa tlamachtili. Tlaj tijneki ma mitspaleui tlen tlamachtiaj ipan tlanechikoli, nojkia kualtiaskia achtoui timomachtis moselti tlen nopaya kiixtomasej. Tlaj tikijkuilos kema uan tlake hora timomachtis, tlauel mitspaleuis.

Xikijkuilo kema uan kanke timomachtis. ¿Tlake hora kualtiaskia timomachtis? ¿Ijnalok kema ayamo tijpeualtia titekiti, o tlayoua kema mokoneuaj ya kochtosej? Tlaj amo ueli timomachtia miak pampa amo tijpia tonali, uajka xikijkuilo keski tiuejkauas timomachtis uan amo tleno xijkaua ma mitstsakuili. Ximomachti kampa tlatsitsikatok, xijseui moradio, motelevisión uan moteléfono. Tlaj achtoui timomaijtos mitspaleuis tikilkauas tlen mitstekipachoua uan kej nopa uelis timomachtis toTeotsij iTlajtol (Filipenses 4:6, 7).

Xijuasani tlajtoli katli pankisa uan ximosentlali titlanankilis. Kema timomachtis, achtoui xikita tlake pankisa ipan nopa tlamachtili. Xikita tlake itoka, uan nojkia kenijkatsa nopa inintoka tlen kixelojti nopa tlamachtili monamiki ika nochi tlen moixtoma nopaya, xikita tlaixkopinkayomej uan xijpoua nopa tlajtlanili tlen ika kiompauiaj nopa tlamachtili. Teipa xijpoua sejse párrafo uan xijtemo kenijkatsa monankilia sejse tlajtlanili. Nojkia xijtemo nopa textos ipan moBiblia katli amo kiixkopintokej nopaya uan ximoiljui kenke kitekiuijtokej (Hechos 17:11). Kema tikitas kanke monankilia nopa tlajtlanili, xijuasani san katli pankisa, ni mitspaleuis tikilnamikis kanke monankilia. Uajka kema tiitstos ipan tlanechikoli, tlaj tijneki uelis timomatlalanas uan titlanankilis.

Ika nochi tlen techmachtiaj sejse chikueyi ipan tlanechikoli, ta tijmajtias “sekij tlamachtili” yankuik tlen uala ipan Biblia (Mateo 13:51, 52).

• ¿Kenijkatsa uelis mitspaleuis tlaj tikijkuilos kema uan tlake hora timomachtis?

• ¿Kenijkatsa uelis timomachtis moselti uan kej nopa uelis titlanankilis ipan tlanechikoli?