Jacob uan Esaú moyoltlalijkej

Jehová kiiljuik Jacob nochipa kimokuitlauiskia kej kinmokuitlauijtoya Abraham uan Isaac. Jacob uejkajki itstoya ipan altepetl Harán. Nopaya mosiuajtik, kinpixki miakej ikoneuaj uan tlauel tlapijpixki.

Teipa, Jehová kiiljuik Jacob: “Xitlakuepili inintlal motatauaj”. Uajka Jacob uan ichampoyouaj kistejkej. Kema nejnentiauiyayaj, se keskij itekipanojkauaj kiiljuijkej Jacob: “Moikni Esaú uala mitsnamikiki uan iuaya ualauij 400 tlakamej”. Jacob majmajki pampa moiljuik Esaú kinekiyaya kinmiktis. Yeka momaijtok uan kiiljuik Jehová: “Nimitstlajtlania, xinechmanaui imako noikni Esaú”. Ualmostla, Jacob kititlanilik Esaú miakej borregojmej, chivojmej, uakaxmej, camellos uan burros.

Ipan nopa youali, kema Jacob iselti mokajki, ¡kiitak se iluikaejketl! Nopa iluikaejketl pejki moteuia iuaya. Seyoual moteuijkej. Uan maske nopa iluikaejketl kikokok Jacob, ya amo kikajki ma kitlani. Nopa iluikaejketl kiiljuik: “Xinechkaua ma nia”. Uan Jacob kinankilik: “Tlaj amo tinechteochiuas, amo nimitsmajkauas”.

Uajka nopa iluikaejketl kiteochijki. Kiampa kimatki Esaú amo tleno kichiuiliskia pampa Jehová kimokuitlauiskia.

Ika ijnalok, Jacob kiuejkaitak Esaú uan nopa 400 tlakamej tlen iuaya ualayayaj. Uajka Jacob tlayakanki, uan kema kinamikito Esaú, chikompa moixtlapachok iixpa. Uan kema Esaú kiitak, motlalok kinamikito uan kikuanajnauajki. Nopa omej iknimej pejkej mochokiliaj uan moyoltlalijkej. ¿Kipaktik Jehová tlen Jacob kichijki?

Teipa Esaú tlakuepilik ichaj, uan Jacob yajki kampa Jehová kiiljuijtoya ma tlakuepili. Jacob kinpixtoya 12 ikoneuaj. Motokaxtiyayaj: Rubén, Simeón, Leví, Judá, Dan, Neftalí, Gad, Aser, Isacar, Zabulón, José uan Benjamín. Teipa Jehová kitekiuik José kema kinmanauik itekipanojkauaj. ¿Tijneki tijmatis kenijkatsa kichijki? Tikitasej ipan seyok tlamachtili.