Kema Jesús eliyaya piltelpokatsi

José uan María itstoyaj Nazaret iuaya Jesús. Inijuantij nojkia kinpixtoyaj sekinok ininkoneuaj: okichpilmej uan siuapilmej. José eliyaya kuaxinketl, kiampa kinpanoltiyaya ichampoyouaj. José nojkia kinmachtiyaya ichampoyouaj tlen Jehová uan iTlanauatiljuaj. Inijuantij momajtoyaj kiueyichiuaj Jehová ipan sinagoga, uan sejse xiuitl yauiyayaj Jerusalén kema mochiuayaya nopa iljuitl Pascua.

Kema Jesús kipixtoya 12 xiuitl, ichampoyouaj yajkej Jerusalén, kej ipa kichiuayayaj. Ipan nopa altepetl itstoyaj miakej katli nojkia yajtoyaj iljuichiuaj ipan Pascua. Kema tlanki nopa iljuitl, José uan María tlakuepilijkej ininchaj uan moiljuijkej Jesús yauiyaya ininuaya sekinok iteixmatkauaj. Kema kitemojkej, kiitakej Jesús amo yauiyaya ininuaya.

Sampa tlakuepilijkej Jerusalén uan eyi tonali kitemojtinenkej ininkone. Teipa, kipantijkej ipan teokali. Nopaya itstoya Jesús, moseuijtoya tlatlajko tlen nopa tlamachtianij, kuali kintlakakilijtoya uan kinchiuiliyaya tlajtlanili. Nopa tlamachtianij mosentlachiliyayaj kema Jesús kamanaltiyaya, yeka pejkej kitlatsintokiliaj miak tlamantli uan mosentlachiliyayaj kema kinnankiliyaya. Kiitakej kuali kikuamachiliyaya Jehová iTlanauatiljuaj.

José uan María tlauel motekipachojtoyaj, yeka María kiiljuik: “Nokone, kampa ueli timitstemojtinemiyayaj. ¿Kanke tiitstoya?”. Jesús kiniljuik: “¿Amo inkimatij moneki niitstos ichaj noTata?”.

Jesús tlakuepilik Nazaret ininuaya itatauaj. Nopaya, José kimachtik ma kuaxima. ¿Kenijkatsa timoiljuia eliyaya Jesús kema nojua telpokatl eliyaya? Jesús moskaltijtiajki uan tlalnamiktiajki. Yeka toTeotsij uan maseualmej tlauel kiikneliyayaj.