¿Kenke toTeotsij amo kikaki nochi tlamaijtoli?
Jehová kipaktia techtlakakilis kema timomaijtouaj ika nochi toyolo. Maske kipaktia techtlakakilis, amo techmaka nochi tlen tijtlajtlaniaj. ¿Kenke? ¿Tlake moneki tikilnamikisej kema timomaijtosej? Xikita tlake kiijtoua Biblia.
“Kema inmomaijtouaj ika toTeko Dios, amo xijchiuakaj keja tlakamej tlen axkiixmatij toTeko. Yajuantij san kiompauiaj miak uelta se tlajtoli tlen kitsontekomajtokej” (Mateo 6:7).
Kema tijchiuaj se tlamaijtoli, Jehová amo kineki ma tikompauikaj san tlen tijtsontenkotlalijtokej o san ma tijpouakaj tlen eltok ipan se amochtli. Ya kineki ma tikiljuikaj tlen eltok ipan toyolo. Ximoiljui se mouampo mojmostla mitsiljuia sanse tlamantli, uelis mitsnakaskuesiuiltis. Katli kuali mouampojchijtokej moiljuiaj tlen nelnelia kiyolmatij uan mopouiliaj miak tlamantli. Kema tikiljuiaj Jehová tlen nelia tijyolmatij, tijnextiaj nelia eli touampo.
“Yonke inkitlajtlaniaj toTeko ma inmechmaka se tlamantli, yajaya axinmechmaka pampa inkitlajtlaniaj ika se inmoyolo tlen axkuali” (Santiago 4:3).
ToTeotsij amo techtlakakilis tlaj tijtlajtlanisej se tlamantli tlen amo kipaktia. Ximoiljui se akajya kineki mauiltis ika tomij uan kiiljuia toTeotsij ma kimaka suerte pampa kineki tlatlanis. Jehová amo kineki ma tijneltokakaj suerte yon tlauel ma titlapijpiakaj. Uajka, ¿timoiljuia kipaleuis nopa maseuali? (Isaías 65:11; Lucas 12:15). Jehová amo techmakas tlaj tijtlajtlanisej nopa tlamantli. Tlaj tijnekij ma techtlakakili uan ma techpaleui, moneki tijtlajtlanisej tlen Biblia kiijtoua kipaktia.
“Intla se tlakatl axkitlepanita itlanauatiljuaj toTeko, toTeko axkitlakakilis kema momaijtoua” (Proverbios 28:9).
Uejkajkia, toTeotsij amo kintlakakiliyaya katli kiixpanoyayaj itlanauatiljuaj, uan ipan ni tonali nojua kiampa kichiua (Isaías 1:15, 16; Malaquías 3:6). Tlaj tijnekij toTeotsij ma techtlakakili moneki tijchiuasej kampeka tijneltokasej itlanauatiljuaj. ¿Uan tlaj uejkajkia tijchijkej se tlamantli tlen amo kuali? ¿Jehová amo kema techtlakakilis? Kena techtlakakilis. Ya techtlapojpoljuis tlaj timoyolkuepasej uan tlaj tijchiuasej tlen kipaktia (Hechos 3:19).