¿Kenijkatsa moneki timomaijtosej tlaj tijnekij toTeotsij ma techtlakakili?
ToTeotsij Jehová techtlakakilia kema timomaijtouaj (Salmo 65:2). Uelis tijnojnotsasej maske kampa ueli tiitstokej uan kema tojuantij tijnekisej, ichtakatsi o chikauak tikamanaltisej. Jehová kineki ma tikitakaj kej toTata pampa san ya eli se kuali teTata (Mateo 6:9). Ya techmachtia ika tlaiknelili kenijkatsa moneki timomaijtosej tlaj tijnekij ma techtlakakili.
MA TIJTEKIUIKAJ JESÚS ITOKA KEMA TIMOMAIJTOSEJ
“Nochi tlen inkitlajtlanisej [noTata] ipan notoka, yajaya inmechmakas” (Juan 16:23).
Tlen Jesús kiijtok techmachtia Jehová kineki san ya ma tijnojnotsakaj, uan amo ma tikintekiuikaj tlaixkopinkayomej, santos, iluikaeuanij o tochampoyouaj katli ya miktokej. Jehová kineki ma tijtlajtlanikaj se tlamantli ika Jesús itoka. Kema tijtekiuiaj Jesús itoka, tijnextiliaj toTeotsij tijmatij ueli techtlakakilia pampa Jesús kitemaktilik inemilis. Jesús kiijtok: “Axaka uelis asis kampa itstok noTata nepa iluikak tlaj axnechneltoka” (Juan 14:6).
MA TIKILJUIKAJ TLEN TIJYOLMATIJ
“Xijpouilikaj [toTeotsij] nochi tlen eltok ipan inmoyolo” (Salmo 62:8).
Kema timomaijtosej moneki tijchiuasej kej kema tijkamanaljuiaj totata. Amo moneki tijpouasej tlamaijtoli tlen uala ipan se amochtli o tikompauisej tlen tijtsontekontlalijtokej, moneki tijnojnotsasej toTeotsij ika tlatlepanitakayotl uan ika nochi toyolo.
MA TIJTLAJTLANIKAJ TOTEOTSIJ TLEN YA KIPAKTIA
“Intla tijtlajtlaniaj toTeko tlen kinamiki ika tlen yajaya kineki, yajaya techtlakakilia” (1 Juan 5:14).
Ipan Biblia, toTeotsij techiljuia kenijkatsa techpaleuis uan nojkia techiljuia tlake kineki ma tijchiuakaj. Tlaj tijnekij ma techtlakakili, moneki tijtlajtlanisej tlen ya kipaktia. Yeka, moneki timomachtisej Biblia uan kiampa kuali tikixmatisej. Kiampa kuali techtlakakilis kema timomaijtosej.
¿TLAKE UELIS TITLAJTLANISEJ TOTEOTSIJ?
Ma titlajtlanikaj tlen techpoloua. Uelis titlajtlanisej toTeotsij ma techmaka tlen techpoloua, kej tlakualistli, toyoyo o kampa tiitstosej. Nojkia uelis tikiljuisej ma techpaleui kuali tijtlapejpenisej tlen tijchiuasej uan ma techpaleui tikijiyouisej tlaouijkayotl. Nojkia uelis tikiljuisej ma techtlapojpoljui, ma techpaleui kuali titlaneltokasej uan ma techmokuitlaui (Lucas 11:3, 4, 13; Santiago 1:5, 17).
Ma timomaijtokaj ika sekinok. Tetajmej yolpakij kema kiitaj ininkoneuaj moikneliaj. Jehová eli toTata, yeka kineki nochi ma timomokuitlauikaj. Tlauel kuali tlaj tikiljuisej Jehová ma kipaleui toueue o tosiua, tokoneuaj, tochampoyouaj uan touampoyouaj. Se Cristo itokilijka katli itoka Santiago, kiijtok: “Se ika seyok ximomaijtokaj ipan toTeko ipampa sejse inmojuantij” (Santiago 5:16).
Ma tijtlaskamatilikaj. Biblia kiijtoua toTeotsij kinmakak maseualmej kuajkuali tlamantli: “Kichijki ma uetsi atl uan ma onka pixkistli tlen kuali. Uan temakayaya nochi tlen monekiyaya para ma tlakuakaj uan para ma yolpakikaj” (Hechos 14:17). Tlaj timoiljuisej kenijkatsa toTeotsij techpaleuijtok, tijnekisej tijtlaskamatilisej, uan uelis tijnextisej tijtlaskamatiliaj kema tijneltokaj itlanauatiljuaj (Colosenses 3:15).
MA TIJPIAKAJ TOYOLO UAN NOJUA MA TIMOMAIJTOKAJ
Kemantika uelis timoyolkokosej tlaj tikitasej toTeotsij amo nimantsi kichiua tlen tijtlajtlaniaj. ¿Kinextia nopa amo kitekipachoua tlen techpano? ¡Kena kitekipachoua! Ma tikitakaj tlen kinpanok se keskij maseualmej katli tlauel kinpaleuik pampa nochipa momaijtojkej.
Ipan achtoui tlamachtili tikijtojkej tlen Steve. Ya nojua kiijtoua tlen kipanok: “Tlaj amo nimomaijtojtoskia, amo ueltoskia nikijiyouis tlaouijkayotl”. ¿Tlake kipaleuik? Ya pejki momachtia Biblia uan kiitak monekiyaya nochipa momaijtos. Steve kiijtoua: “Nijtlaskamatilia toTeotsij pampa nouampoyouaj nechikneliaj uan nechpaleuiaj. Nama tlauel niyolpaki”.
¿Uan tlake kipanok Jenny, katli moiljuiyaya toTeotsij amo kitlakakiliyaya kema momaijtouayaya? Ya kiijtoua: “Kema tlauel amo kuali nijyolmatiyaya, nikiljuik toTeotsij ma nechpaleui nijkuamachilis kenke kiampa nijyolmatiyaya”. ¿Kenijkatsa kipaleuik tlamaijtoli? “Kema nimomaijtok nechpaleuik ma nikita kenijkatsa nechitayaya. Nikitak maske noyolo nechiljuiyaya nijchijtok tlen amo kuali, toTeotsij amo kiampa nechitayaya. Nojkia nechpaleuik ma nikijiyoui nochi tlen nechpanok”. ¿Kenijkatsa kiyolmatki teipa? “Tlamaijtoli nechpaleuik ma nikita Jehová eli nouampo, noTata katli tlauel nechiknelia uan eli se Teotsij katli nelia itstok. Ya nochipa itstos nouaya uan nechpaleuis tlaj nijchiuas kampeka nijchiuas tlen kipaktia”.
Isabel kiijtoua: “Nikita toTeotsij nelnelia nechtlakakilik kema nimomaijtok pampa maske nokone mokokoua uan amo ueli kichiua se keski tlamantli, tlauel yolpaki”.
Nama ma tikitakaj tlake kipanok Isabel. Kema tlanemiltiyaya, tepajtianij kiiljuijkej ikone tlakatiskia ika se kokolistli, nopa kichijki tlauel ma moyolkoko. Sekij maseualmej kiiljuijkej ma mokonetlauiso. Isabel kiijtoua: “Ipan nopa tonali nimoiljuik nimikiskia pampa tlauel nimotekipachouayaya”. ¿Tlake kichijki? “Miakpa nimomaijtok uan nikiljuik toTeotsij ma nechpaleui”. Teipa tlakatki ikone Gerard, uan nelia kipixki nopa kokolistli. ¿Moiljuia Isabel kipaleuik toTeotsij? ¡Kena! ¿Uan kenijkatsa kipaleuik toTeotsij? “Ya panotok 14 xiuitl, uan nikita nokone Gerard kej se tlateochiualistli. Nikita toTeotsij nelnelia nechtlakakilik kema nimomaijtok pampa maske nokone mokokoua uan amo ueli kichiua se keski tlamantli, tlauel yolpaki”.
Tlen kiijtok Isabel, kichiua ma tikilnamikikaj tlen kiijtok katli kiijkuilok se salmo: “ToTeko, ta tikintlakakilia tlen mitstlajtlaniaj teikneltsitsij. Tikinfuerzajmaka uan tikinpaleuia. Tikinchiuilia cuenta kema mitstsajtsiliaj” (Salmo 10:17). Kej tikitaj, tlauel techpaleuis tlaj timomaijtosej.
Ipan Biblia ijkuilijtok miak tlamaijtoli tlen Jesús kichijki. Uan nojkia ijkuilijtok nopa tlamaijtoli tlen tlauel kiixmatij, eli nopa tlamaijtoli tlen kinmachtik itokilijkauaj. ¿Tlake techmachtia nopa tlamaijtoli?