Jehová tlauel techiknelia

1. ¿Kenijkatsa timoiljuia eli Jehová?

¿KENIJKATSA timoiljuia eli Jehová kema timomaijtoua? Maske amo ueli tikitaj, Biblia kiijtoua miak tlamantli tlen ya. Kiijtoua Jehová ‘tetlauilia uan temanauia’ uan nojkia kiijtoua eli “keja se tlitl tlen kitlamitlatia nochi tlen onka” (Sal. 84:11; Heb. 12:29). Kejuak ipan se temiktli teokamanalojketl Ezequiel kiijtok Jehová eli kej nopa yejyektsi tetl tlen itoka zafiro, kej se tepostli tlen tlauel petlani uan nojkia kiijtok tlauel tlauia kej se akosamalotl (Ezeq. 1:26-28). Kema tikitaj Jehová kiampa eli, uelis timosentlachiliaj uan timoiljuiaj amo kinamiki tijnechkauisej.

2. ¿Kenke sekij kimatij ouij motemachisej Jehová kiniknelia?

² Uelis ouij tijmatij tijneltokasej Jehová techiknelia pampa amo ueli tikitaj o pampa totatauaj amo techiknelijkej. Pero Jehová kikuamachilia tlen tijyolmatij uan kimati nochi tlen techpanotok ipan tonemilis. Jehová kineki ma timotemachikaj ya techiknelia, yeka ipan iTlajtol techiljuia tlake kuajkuali tlamantli kinextia.

3. ¿Kenke timomachtisej kenijkatsa Jehová kinextia teiknelia?

³ Jehová eli tlaiknelili pampa nochi tlen kichiua, kichiua pampa tlauel teiknelia (1 Juan 4:8). Jehová nojkia kiniknelia katli amo kiikneliaj (Mat. 5:44, 45). Ipan ni tlamachtili tikitasej kenijkatsa Jehová kinextia tlaiknelili. Tlaj kuali tikixmatisej techpaleuis más ma tikiknelikaj.

JEHOVÁ TLAUEL TECHIKNELIA

4. ¿Tlake tijyolmati kema tikita Jehová tlauel teiknelia? (Xikita tlaixkopinkayotl).

⁴ Jehová “tlauel teiknelia” (Sant. 5:11). Biblia kiijtoua tlauel techiknelia kej se siuatl katli tlauel kiiknelia ikone (Is. 66:12, 13). Ximoiljui ipan se siuatl katli kimokuitlauia ikone ika miak tlaiknelili, kitlalia ikuaxanko uan kinojnotsa ika miak tlaiknelili. Kema nopa pilkonetsi choka o kikokoua se tlamantli, inana nima kipaleuia. Jehová nojkia kiampa kichiua kema amo kuali tijyolmatij. Katli kiijkuilok se salmo kiijtok: “Kema san nimoyoliljuia tlen miak kuesoli uan san ya nopa nijmati, ta tinechyoltlalia” (Sal. 94:19).

5. ¿Kenijkatsa Jehová kinextia teiknelia uan amo tetlauelkaua?

⁵ Jehová amo tetlauelkaua (Sal. 103:8). Ya nojua techiknelia maske kemantika timokuapolouaj. Maske israeleuanij miakpa kiixpanokej Jehová, kema moyolkuepayayaj, Jehová kinnextiliyaya nojua kinikneliyaya. Se tonali kiniljuik israeleuanij: “Niinmechita para nelia miak inmopati. Niinmechtlepanita uan miak niinmechiknelia” (Is. 43:4, 5). Jehová nojua kiampa kichiua. Uelis timotemachisej ya tlauel techiknelia uan maske titlajtlakolchiuasej, amo techtlauelkauas. Ya nojua techiknelis kej achtouia, tlaj timoyolkuepaj uan tijkauaj ma techpaleui. Ya kiijtojtok techtlapojpoljuis (Is. 55:7). Biblia kiijtoua kema Jehová techtlapojpoljuia techpaleuia kuali ma tijyolmatikaj o ma tijpiakaj “miak pakilistli” (Hech. 3:19).

6. ¿Tlake techmachtia Zacarías 2: 8?

⁶ (Xijpoua Zacarías 2:8). Jehová tlauel techiknelia, yeka kikuamachilia tlen tijyolmatij uan kineki techpaleuis. Ya kiyolkokoua kema amo kuali tijyolmatij, yeka uelis tikiljuisej: “Xinechmokuitlaui keja se kimokuitlauia iixsitlal” (Sal. 17:8). Tlauel tijpatiitaj uan tijmokuitlauiaj toixteyol. Yeka kema Jehová kiijtoua tielij kej iixteyolsitlal, kejuak techiljuia: “Kema inmechchiuiliaj tlen amo kuali kejuak na nechchiuiliaj”.

7. ¿Kenke moneki timotemachisej Jehová nelia techiknelia?

⁷ Jehová kineki ximotemachi ya mitsiknelia. Ya kimati uelis tijmati ouij timotemachis mitsiknelia pampa tikixnamiktok tlaouijkayotl. Yeka, tlauel moneki timotemachis ya nelia mitsiknelia. Tlauel mitspaleuis tlaj tikitas kenijkatsa Jehová kinextia kiiknelia Jesús, katli kintlapejpenijtok yasej iluikak uan nochi tojuantij. Ya nopa tikitasej ipan ni tlamachtili.

JEHOVÁ KINEXTIA TEIKNELIA

8. ¿Kenke Jesús motemachiyaya iTata nelia kiikneliyaya?

⁸ San Jehová uan Jesús tlauel miak xiuitl mouampojchijtokej uan tlauel moikneliaj. Ipan Mateo 17:5 Jehová kiijtok kiiknelia Jesús. Ya amo san kiijtok kuali kiitayaya tlen Jesús kichiuayaya, Jehová kinekiyaya ma tijmatikaj tlauel kiiknelia uan yolpakiyaya ika tlen Jesús kichiuayaya uan ika tlen nechka kichiuaskia. Yeka kiijtok: “Ni eli noKone katli tlauel nikiknelia” (Efes. 1:7). Jesús motemachiyaya iTata kiikneliyaya, yeka miakpa kiampa kiijtok (Juan 3:35; 10:17; 17:24).

9. ¿Tlake tlajtoli kinextia Jehová kiniknelia katli kintlapejpenijtok yasej iluikak? (Romanos 5:5).

⁹ Jehová nojkia kinextia kiniknelia katli kintlapejpenijtok yasej iluikak (xijpoua Romanos 5:5). Nopa tlajtoli “kitemitis toyolo ika itlaiknelijkayo” kinextia Jehová tlauel techiknelia. Se amochtli kiijtoua nopa tlaiknelili tlen Jehová kinextia eli kej se atlajtli. ¡Nopa kinextia Jehová tlauel kiniknelia katli tlapejpenilmej! Uan inijuantij kimatij Jehová tlauel kiniknelia (Jud. 1). Nochi inijuantij kiyolmatij sanse kej kiijtok apóstol Juan: “Ximomakakaj cuenta keski techiknelia Toteko Totata pampa technotstok tiikoneuaj” (1 Juan 3:1). ¿San kiniknelia Jehová katli kintlapejpenijtok? Amo, kej tikitasej Jehová kinextijtok kiniknelia nochi itekipanojkauaj.

10. ¿Tlake kichiua ma timotemachikaj Jehová tlauel techiknelia?

¹⁰ Jehová kinextik tlauel techiknelia pampa temaktilik iKone (Juan 3:16; Rom. 5:8). Jehová temaktilik iKone uan kikajki ma kimiktikaj uan kiampa ueliskia techtlapojpoljuis totlajtlakoljuaj uan timouampojchiuasej iuaya (1 Juan 4:10). Kema timoyoliljuiaj tlen kichijkej Jehová uan Jesús techpaleuia ma timotemachikaj tlauel techikneliaj (Gál. 2:20, TNM). Jehová amo techmakixtik san pampa kiampa monekiyaya kichiuas, ya kichijki pampa techiknelia, kiampa kinextik kema temaktilik iKone katli tlauel kiiknelia uan kikajki ma kitlaijiyouiltikaj uan ma kimiktikaj.

11. ¿Tlake techmachtia Jeremías 31:3?

¹¹ Kej tikitstokej, Jehová nochipa kinextia techiknelia (xijpoua Jeremías 31:3). Kikajtok ma tijtekipanokaj pampa techiknelia (nojkia xikita Deuteronomio 7:7, 8). Amo tleno uelis kichiuas ayokmo ma techikneli (Rom. 8:38, 39). ¿Kenijkatsa tijyolmati kema timoyoliljuia ipan ni tlamantli? Ma tijpouakaj Salmo 23 uan ma tikitakaj kenijkatsa kipaleuik David pampa Jehová kiikneliyaya uan kenijkatsa uelis techpaleuis.

¿TLAKE TIJYOLMATI KEMA TIMOILJUIA JEHOVÁ TLAUEL MITSIKNELIA?

12. ¿Tlake kiijtok David ipan Salmo 23?

¹² (Xijpoua Salmo 23:1-6). Ipan Salmo 23, David kiijtok kiitayaya Jehová kej se tlapialmokuitlauijketl pampa kimokuitlauiyaya ika miak tlaiknelili uan kuali mouikayaya iuaya. David amo majmauiyaya pampa motemachiyaya Jehová kiyakanayaya. Kimatiyaya Jehová nochipa kiikneliskia. Tikitasej tlake kipaleuik tlauel ma motemachi ipan toTeotsij.

13. ¿Kenke David kimatiyaya Jehová kimokuitlauiyaya?

¹³ “Axtleno nechpoloua”. David motemachiyaya Jehová kimokuitlauiyaya pampa nochipa kipaleuijtoya. Nojkia kimatiyaya Jehová eliyaya iuampox uan kuali kiitayaya tlen kichiuayaya. David motemachiyaya maske kiixnamikiskia miak tlaouijkayotl, toTeotsij nochipa kipaleuiskia. Kimatiyaya Jehová tlauel kiikneliyaya uan nopa kichijki ayokmo tlauel ma motekipacho (Sal. 16:11).

14. ¿Kenijkatsa Jehová kinextia techiknelia?

¹⁴ Jehová techmokuitlauia ika miak tlaiknelili kema techpano tlen amo kuali. Ma tikitakaj tlen kipanok Claire,a katli tlatekipanojtok kipano 20 xiuitl ipan Betel. Ya kiijtoua amo kimatiyaya kenijkatsa kinpaleuis ichampoyouaj kema pejki kiixnamikij tlaouijkayotl. Itata kipixki se infarto cerebral. Se isiuaikni kikixtijkej tlen tlanechikoli, ichampoyouaj ayokmo kipixkej tlen ika mopanoltisej uan ayokmo kipixkej ininchaj. ¿Kenijkatsa kinextik Jehová kinmokuitlauiyaya? Claire kiijtoua: “Jehová mojmostla kinmakak nochampoyouaj nochi tlen monekiyaya. Kinpaleuik ika tlen amo nimoiljuijtoya. Nochipa nikilnamiki kenijkatsa Jehová kinextijtok nechiknelia. Nopa tlauel nechyolchikaua kema nikixnamiki tlaouijkayotl”.

15. ¿Tlake kipaleuik David sampa ma kipia chikaualistli? (Xikita tlaixkopinkayotl).

¹⁵ “Nechmaka yankuik chikaualistli”. David kiixnamikiyaya miak tlaouijkayotl. Yeka kemantika tlauel mokuesouayaya (Sal. 18:4-6). Pero kema kiitak Jehová tlauel kiikneliyaya kipaleuik sampa ma kipia chikaualistli. Kiitak kenijkatsa iuampo Jehová kejuak kiuikak “kampa onka yejyektsi sakatl tlen xoxouik” uan “kampa onka kuali atl tlen axmauilili”. Nopa kipaleuik sampa ma kipia chikaualistli uan nojua ma kitekipano Jehová ika pakilistli (Sal. 18:28-32).

16. ¿Kenijkatsa tikitstok mitspaleuijtok Jehová?

¹⁶ Jehová nojkia techpaleuis kema tikixnamikisej tlen ueli tlaouijkayotl pampa “iteiknelilis [ . . . ] axkema tlamis” (Lam. 3:22; Col. 1:11). Ma tikitakaj tlen kipanok Rachel. Kema momoyajtoya COVID-19, iueue kitlauelkajki ya uan nojkia kitlauelkajki Jehová. ¿Kenijkatsa kipaleuik toTeotsij? Ya kiijtoua: “Jehová nechpaleuik ma nikita kenijkatsa ya tlauel nechiknelia. Miakej nouampoyouaj nochipa itstoyaj nouaya, nechualikiliyayaj tlakualistli, nechtitlaniliyayaj mensajes, nechpouiliyayaj textos, kuali nechseliyayaj uan nechilnamikiliyayaj Jehová nechmokuitlauia. Tlauel nijtlaskamatilia Jehová pampa ipan itlanechikol toikniuaj tlauel techikneliaj”.

17. ¿Kenke David kiijtok “axtleno nikimakasis”?

¹⁷ “Axtleno nijmakasis, pampa ta, TOTEKO, tiitstok nouaya”. David kinpiayaya miakej ikualankaitakauaj uan miakpa kinejkej kimiktisej. Pero amo majmauiyaya uan kuali kiyolmatiyaya pampa kimatiyaya Jehová kiikneliyaya. David kimatiyaya Jehová itstoya inechka. Nopa kipaleuik amo tlauel ma majmaui. Ipan se uikatl kiijtok: “Nechmanauik tlen nochi tlen nechmajmatiyaya” (Sal. 34:4). David kimatiyaya Jehová kiikneliyaya, nopa kipaleuik ayokmo ma majmaui.

18. Kema tikixnamikij tlaouijkayotl, ¿kenijkatsa techpaleuia tikilnamikisej Jehová techiknelia?

¹⁸ Kema tikilnamikij Jehová techiknelia, techpaleuia kema tikixnamikij tlaouijkayotl. Susi, katli tlatekipanoua kej precursora, kiijtoua kenijkatsa kiyolmatkej ya uan iueue kema ininkone momiktik: “Kema mitspanos se tlamantli tlen tlauel ouij, tlauel amo kuali tijyolmatis uan amo tijmatis tlake tijchiuas. Pero tlauel techpaleuia pampa tijmatij Jehová techiknelia uan techmokuitlauia”. Rachel, katli tikijtojkej ipan párrafo 16, kiijtoua: “Se youali kema tlauel nimotekipachouayaya uan nimajmauiyaya, tlauel nichokak kema nimomaijtok. Kema kiampa nijchijki, nikitak kenijkatsa Jehová nechyoltlalik kej se siuatl kiyoltlalia ipilkone, uan teipa uelki nikochki. Amo kema nikilkauas tlen Jehová kichijki”. Tasos, se toikni katli tlatekipanoua kej ueuejtlakatl, kitsajkej naui xiuitl pampa amo kinejki yas tlateuiti. Toikni kiijtoua Jehová kimokuitlauik ika miak tlaiknelili. Ya kiijtok: “Jehová nechpaleuik ika tlen amo nimoiljuiyaya uan nopa kichijki más ma nimotemachi ipan ya. Nojkia, nechmakak ichikaualis uan nopa nechpaleuik ma niyolpaki maske tlauel ouij kampa niitstoya. Nopa kichijki ma nikita, tlaj más nimotemachiskia ipan Jehová, más nikitaskia kenijkatsa nechiknelia. Yeka maske nitsaktoya, pejki nitlatekipanoua kej precursor regular”.

MA TIJNECHKAUIKAJ JEHOVÁ KATLI TLAUEL TEIKNELIA

19. 1) ¿Kenijkatsa timomaijtosej tlaj timotemachiaj Jehová nelia techiknelia? 2) ¿Tlake textos kampa kiijtoua Jehová techiknelia más mitspaktia? (Xikita nopa recuadro “Textos tlen techpaleuia ma timotemachikaj Jehová techiknelia”).

¹⁹ Tlen kinpanok toikniuaj, kinextia Jehová tlauel teiknelia (2 Cor. 13:11). Jehová kitekipachoua tlen techpano, yeka timotemachiaj “techyaualoua ika itlaiknelilis” (Sal. 32:10). Tlaj timoyoliljuisej kenijkatsa Jehová kinextijtok techiknelia, techpaleuis más ma timotemachikaj ya nelia kitekipachoua tlen techpano. Uelis tikiljuisej nochi tlen techtekipachoua uan timotemachisej ya kikuamachilia tlen tijyolmatij uan kineki techpaleuis (Sal. 145:18, 19).

20. ¿Kenijkatsa techpaleuia tijnechkauisej Jehová pampa tijmatij techiknelia?

²⁰ Sanse kej tlitl techtotonilia kema tlauel tlaseseya, nopa tlaiknelili tlen Jehová kinextia techyolchikaua kema tikixnamikij tlaouijkayotl. Yeka xijkaua Jehová ma mitsikneli, kiampa mitsyolchikauas uan tijpias tlaseuilistli. Nochi ma tikijtokaj: “Nelia nikiknelia TOTEKO” (Sal. 116:1).