TLAMACHTILI 26
UIKATL 123 Ma tijchiuakaj tlen Jehová kineki
Ma tikilnamikikaj amo uelis tijmatisej nochi tlamantli
“Axueli tijmachiliaj iyajatil Toteko Tlen Kipia Nochi Chikaualistli” (JOB 37:23).
TLEN MOIXTOMAS
Maske amo tijmatij nochi tlen panos teipa uelis tikijiyouisej tlen techpano tlaj timosentlaliaj ipan tlen kena tijmatij uan tlaj timotemachiaj ipan Jehová.
1. ¿Kenijkatsa techchijchijki Jehová, uan kenke?
JEHOVÁ tlauel kuali techchijchijki pampa ueli timoiljuiaj ipan tlen tijchiuasej, tijyekouaj miak tlamantli uan tikitaj kenijkatsa tijchiuasej tlen tijyekojkej. ¿Kenke kiampa techchijchijki? Pampa kineki ma tijpiakaj tlalnamikilistli uan kuali ma tijtlapejpenikaj tlen tijchiuasej kema tijtekipanouaj (Prov. 2:1-5; Rom. 12:1).
2. 1) ¿Tlake moneki tikilnamiktosej? (Job 37:23, 24; nojkia xikita tlaixkopinkayotl). 2) ¿Kenijkatsa techpaleuia kema tikilnamikij amo tijmatij nochi tlamantli?
2 Maske Jehová kichijki ma tijyekokaj miak tlamantli, amo nochi tijmatij (xijpoua Job 37:23, 24). Ma timoiljuikaj ipan tlen kipanok Job. Jehová kitlatsintokik miak tlamantli tlen kinextik ya amo kimatiyaya nochi. Nopa kipaleuik ma kiita amo kinamikiyaya moueyimatis uan kipatlas kej moiljuiyaya (Job 42:3-6). Tojuantij nojkia tlauel techpaleuia tikilnamikisej amo tijmatij nochi tlamantli. Nopa techpaleuis amo ma timoueyimatikaj uan ma timotemachikaj Jehová techiljuis tlen moneki tijmatisej uan kiampa kuali tijtlapejpenisej tlen tijchiuasej (Prov. 2:6).
Sanse kej Job, tojuantij nojkia techpaleuia kema tikilnamikij amo nochi tijmatij. (Xikita párrafo 2).
3. ¿Tlake tikitasej ipan ni tlamachtili?
3 Ipan ni tlamachtili tikitasej se keski tlamantli tlen amo tijmatij, uan kenke kemantika uelis tijmatij ouij. Nojkia tikitasej kenke kemantika techpaleuia kema amo tijmatij se keski tlamantli. Tlen tikitasej techpaleuis ma tikitakaj Jehová, katli tlauel tlalnamiki, techiljuis tlen nelia moneki tijmatisej (Job 37:16).
AMO TIJMATIJ KEMA KITLAMILTISEJ TLEN AMO KUALI
4. Kej kiijtoua Mateo 24:36, ¿tlake tlamantli amo tijmatij?
4 (Xijpoua Mateo 24:36). Amo tijmatij kema kitsontlamiltisej tlen amo kuali. Uan kema Jesús itstoya ipan Tlaltipaktli nojkia amo kimatiyaya “nopa tonali uan nopa hora”.a Teipa kiniljuik iapóstoles san Jehová kinamiki kiijtos kema panos se keski tlamantli (Hech. 1:6, 7). Jehová ya kiixtlalijtok nopa tonali kema kitsontlamiltis tlen amo kuali, uan tojuantij amo uelis tijmatisej.
5. ¿Tlake uelis techpanos pampa amo tijmatij kema kitsontlamiltisej tlen amo kuali?
5 Uajka kej Jesús kiijtok, amo tijmatij tlaj uejkauas tijchixtosej nopa tonali kema kitsontlamiltisej tlen amo kuali. Yeka uelis timoyolkokosej o tijnekisej nima ma asi nopa tonali, uan nojua más tlaj miak xiuitl tijtekipanojtokej Jehová. O uelis tijmatij ouij kema tochampoyouaj o sekinok maseualmej techpinajtiaj pampa amo asi nopa tonali (2 Ped. 3:3, 4). Uelis timoiljuisej: “Tlaj nijmatiskia kema asis nopa tonali, amo ouij nijmatiskia nijpias noyolo uan nikijiyouis kema nechpinajtiaj”.
6. ¿Kenke techpaleuia pampa amo tijmatij kema kitsontlamiltisej tlen amo kuali?
6 Jehová amo techiljuijtok kema kitsontlamiltis tlen amo kuali, nopa techpaleuia ma tijnextikaj tijtekipanouaj pampa nelia tikikneliaj uan timotemachiaj ipan ya. Tijnekij nochipa tijtekipanojtosej uan amo hasta kema asis nopa tonali. Kema timoiljuiaj ipan “nopa tonal kema nesis itekiuejkayo Toteko”, amo tijnekij san timosentlalisej ipan nopa tonali kema asiki, tijnekij timosentlalisej ipan tlen kichiuas. Kema timoiljuiaj ipan nochi nopa tlamantli techpaleuis más ma timonechkauikaj iuaya uan ma tijchiuakaj se ueyi kampeka tijyolpakiltisej (2 Ped. 3:11, 12).
7. ¿Tlake tlamantli kena tijmatij?
7 Tlauel techpaleuia timosentlalisej ipan tlen kena tijmatij. Uan tijmatij desde xiuitl 1914 tiitstokej ipan itlamia tonali. Ipan Biblia, Jehová kiijtok se keski tlamantli tlen kiampa kinextia uan kiijtoua kenijkatsa tiitstoskiaj ipan nopa tonali. Yeka, timotemachiaj “nechkatitok nopa tonal” kema Jehová tetlajtolsenkauas (Sof. 1:14). Nojkia tijmatij Jehová kineki ma tikinkamanaljuikaj nochi maseualmej tlen “nopa kuali tlamachtili tlen iTlanauatijkayo Dios” (Mat. 24:14). Uan titlajtolmoyauaj ipan se 240 altepemej ipan kipano mil tlajtoli. Ni kinextia amo moneki tijmatisej “nopa tonali uan nopa hora” para titlajtolmoyauasej ika pakilistli.
AMO TIJMATIJ TLAKE KICHIUAS JEHOVÁ PARA TECHPALEUIS
8. ¿Tlake kineki kiijtos nopa tlajtoli “kejatsa tekiti Toteko”? (Eclesiastés 11:5).
8 Amo nochipa tijmatij “kejatsa tekiti Toteko” (xijpoua Eclesiastés 11:5). ¿Tlake kiijtosneki? Eli nochi tlen Jehová kichiua o kikaua ma pano para ma mochiua tlen ya kineki. Amo ueli tijmatij kenke Jehová kikaua ma pano se keski tlamantli yon tijmatij tlake kichiuas para techpaleuis (Sal. 37:5). Biblia kiijtoua tojuantij amo kema tijkuamachilisej nopa tlamantli, sanse kej amo tijkuamachiliaj kenijkatsa moskaltia se pilkonetsi iijtiko inana. Ipan ni tonali científicos nojkia amo kikuamachilijtokej nopa tlamantli.
9. ¿Tlake uelis techpanos pampa amo tijmatij kenijkatsa techpaleuis Jehová?
9 Uelis tijmatisej ouij tijtlapejpenisej se keski tlamantli pampa amo tijmatij kenijkatsa techpaleuis Jehová. Uelis nojkia timajmauisej tijkauasej se keski tlamantli tlen techpaleuis más ma titlajtolmoyauakaj o tiasej kampa monekij más tlajtolmoyauanij. Nojkia uelis timotlatsintokisej tlaj Jehová kuali techita pampa amo kuali kiski se tlamantli tlen tijnekiyayaj tijchiuasej. Uelis timosentlalijtoyaj tijchiuasej se tlamantli pero amo uelki tijchiuaj. O uelis tlauel titlajtolmoyauaj pero amo aka techtlakakilia. Nojkia, uelis titlapaleuiaj kampa mochijchiua kali kampa titlaueyichiuaj pero tijmatij ouij se keski tlamantli. Uan uelis timotlatsintokisej: “¿Kena nechpaleuia Jehová?”.
10. ¿Tlake kuajkuali tlamantli uelis tijnextisej pampa amo tijmatij tlake kichiuas Jehová?
10 Kema amo tijmatij kenijkatsa techpaleuis Jehová, kichiua amo ma timoueyimatikaj uan ma tikilnamikikaj amo nochi tijmatij. Techilnamikilia itlalnamikilis uan iojui eli más ueyi que tojuantij (Is. 55:8, 9). Nojkia techpaleuia ma timotemachikaj kuali kisas tlen tijchiuasej tlaj timotemachiaj ipan ya. Tlaj kuali techtlakakiliaj kema titlajtolmoyauaj o tlaj kuali kisa se tlamantli kampa mochijchiua kali kampa titlaueyichiuaj, tikijtouaj kuali kiski pampa Jehová techpaleuik uan amo pampa tojuantij tijchijkej (Sal. 127:1; 1 Cor. 3:7). Pero tlaj amo kuali kisa se tlamantli tlen tijnekiyayaj tijchiuasej, techyolchikaua tijmatisej Jehová nochi kiita uan kimati kenijkatsa kisenkauas (Is. 26:12). Tijchiuaj nochi tlen tiuelij uan timotemachiaj Jehová techpaleuis. Maske tijmatij Dios amo technextilis ika se milagro tlake moneki tijchiuasej kej kichiuayaya uejkajkia, timotemachiaj ya techyakanas (Hech. 16:6-10).
11. ¿Tlake tlamantli tlen tlauel ipati kena tijmatij?
11 Kema tikilnamikij tlen kena tijmatij, tlauel techpaleuia. Tijmatij Jehová tlauel teiknelia, kichiua tlen xitlauak, tlauel tlalnamiki uan tlauel kipatiita tlen tijchiuaj por ya uan por toikniuaj, uan ya nochipa kinteochiua katli amo kitlauelkauaj (Heb. 11:6).
AMO TIJMATIJ TLAKE PANOS TEIPA
12. Kej kiijtoua Santiago 4:13, 14, ¿tlake tlamantli amo tijmatij?
12 (Xijpoua Santiago 4:13, 14). Amo tijmatij tlake techpanos teipa pampa “tlen ueli tlalochtli”, uelis techpanos tlen amo kuali (Ecl. 9:11). Yeka, amo tijmatij tlaj kuali kisas tlen tijnekij tijchiuasej o tlaj nojua tiyoltosej para tijchiuasej.
13. ¿Kenke uelis tijmatisej ouij pampa amo tijmatij tlake panos teipa?
13 Uelis nojkia tijmatisej ouij pampa amo tijmatij tlake panos teipa. Uelis tlauel timotekipachouaj pampa timoiljuiaj panos se tlamantli tlen amo kuali, uan ayokmo tiyolpakisej. Tlaj techpano se tlamantli tlen amo tijchiayayaj o tlen amo kuali, uelis kichiuas tlauel ma titlaijiyouikaj o ma timokuesokaj. O tlaj amo mochiua tlen tijchiayayaj, uelis kichiuas ma timoyolkokokaj (Prov. 13:12).
14. ¿Tlake kichiua nelnelia ma tiyolpakikaj? (Nojkia xikita tlaixkopinkayomej).
14 Kema tikixnamikij tlaouijkayotl, tijnextiaj tijtekipanouaj Jehová pampa tikikneliaj uan amo san pampa tijnekij ma techmaka se tlenijki. Biblia kipia miak tlapoualistli tlen kinextia amo kinamiki timoiljuisej Dios techkixtilis nochi tokuesoljuaj, uan amo techiljuia tlen techpanos teipa. Ya kimati tiyolpakij kema tijkauaj ma techyakana uan tijneltokaj, uan amo san pampa tijmatiskiaj nochi tlen techpanos teipa (Jer. 10:23). Kema tijkauaj Jehová ma techyakana kema tijtlapejpeniaj se tlamantli, kejuak tikijtouaj: “Tlaj Jehová kineki, tiitstosej uan tijchiuasej ni o ne seyok tlamantli” (Sant. 4:15).
Tlauel techpaleuia tlaj tijkauaj Jehová ma techyakana uan tlaj tijneltokaj (Xikita párrafos 14, 15).b
15. ¿Tlake tlamantli kena tijmatij panos teipa?
15 Maske amo tijmatij tlake panos teipa, Jehová techtenkauilijtok tiitstosej nochipa ipan iluikak o ipan Tlaltipaktli. Tijmatij ya amo istlakati uan amo tleno kitsakuilia para kichiuas tlen mosentlalijtok (Tito 1:2). San ya uelis kiijtos: “Na nitlayolmelajtok tlen ipejya tlachke panos teipa”. Nochi tlen kitenkajtok moaxitijtok uan nojua moaxitijtias (Is. 46:10). Timotemachiaj amo tleno uelis kichiuas Jehová ayokmo ma techikneli (Rom. 8:35-39). Techmakas tlalnamikilistli, techyolchikauas uan techpaleuis ma tikixnamikikaj nochi tlen techpanos. Timotemachiaj Jehová techpaleuis uan techteochiuas (Jer. 17:7, 8).
AMO TIJTLAMIKUAMACHILIAJ JEHOVÁ KUALI TECHIXMATI
16. ¿Tlake kimati Jehová tlen tojuantij uan tlake kichiua ma tijyolmatikaj? (Salmo 139:1-6).
16 (Xijpoua Salmo 139:1-6). Jehová, katli techchijchijki, kimati kenijkatsa eli totlakayo, tlen tijyolmatij uan tlen timoiljuiaj. Ya nochipa techmokuitlauijtok. Kimati tlen tikijtouaj uan tlen tijnekij tikijtosej, tlen tijchiuaj uan kenke tijchiuaj se tlamantli. Tlanauatijketl David kiijtok Dios kejuak techyaualoua uan techmokuitlauia kej se tlamokuitlauijketl, uan nochipa mokualtlalijtok para techmokuitlauis. Tlauel timosentlachiliaj pampa toTeko Katli kinamiki kinauatis nochi, Katli kichijchijki nochi tlen onka uan Katli kipia nochi chikaualistli, tlauel kitekipachoua tlen techpano. David kiijtok: “Nochi ni tlamantli tlen ta tijmati nelia yejyektsi, uan ouij para nijneltokas” (Sal. 139:6).
17. ¿Kenke uelis ouij tijneltokasej Jehová kuali techixmati?
17 Uelis kej techiskaltijkej, kej elij ipan toaltepe o tlen uejkajkia tijneltokayayaj, kichiuas ouij ma tikitakaj Jehová eli kej se tetaj katli tlauel techiknelia uan motekipachoua por tojuantij. O uelis tlen tijchijkej uejkajkia kichiuas ma timoiljuikaj Jehová ayokmo kineki ma tijnechkauikaj o mouejkatlalijtok tlen tojuantij. Kemantika David nojkia kiampa kiyolmatki (Sal. 38:18, 21). O uelis se akajya kichijtok kampeka kipatlas inemilis para kiyolpakiltis Dios, pero uelis motlatsintokia: “Tlaj Dios nechixmati, ¿kenke nechiljuia ma nijpatla se tlamantli tlen na nijmati tlauel ouij?”.
18. ¿Kenijkatsa techpaleuia kema tikitaj san Jehová tlauel kuali techixmati? (Nojkia xikita tlaixkopinkayomej).
18 Uelis timotemachisej san Jehová tlauel kuali techixmati uan kiita nopa kuajkuali tlamantli tlen tijnextiaj maske tojuantij amo tikitaj. Ya kiita timokuapolouaj, pero nojkia kikuamachilia tlen tijyolmatij uan kenke tijchiuaj se keski tlamantli. Maske kiampa pano, ya techiknelia (Rom. 7:15). Kema tikitaj Jehová kimati tlake uelis tijchiuasej, techpaleuia amo ma tijtlauelkauakaj uan ma tijtekipanokaj ika pakilistli.
Maske amo tijmatij nochi tlamantli, kena tijmatij Jehová techtenkauilijtok teipa kuali tiitstosej, uan nopa techpaleuia ma tikijiyouikaj tlen techpano. (Xikita párrafos 18, 19).c
19. ¿Tlake tlamantli kena tijmatij tlen Jehová?
19 Tijmatij Jehová tlauel teiknelia (1 Juan 4:8). Tijmatij ika itlanauatiljuaj kinextia tlauel techiknelia uan kineki kuali ma tiitstokaj. Nojkia tijmatij kineki ma tiitstokaj nochipa uan yeka techmakixtik. Jehová temaktilik iKone, yeka uelis timotemachisej uelis tijyolpakiltisej maske timokuapolouaj (Rom. 7:24, 25). Uan tijmatij “tlen Toteko kiijtoua tlen tojuantij ipati más tlen nopa tlen toyolo techiljuia” (1 Juan 3:19, 20). Jehová tlauel kuali techixmati uan motemachia kena uelis tijyolpakiltisej.
20. ¿Tlake techpaleuis amo ma timotekipachokaj ika tlen amo tijmatij?
20 Kej tikitakej ipan ni tlamachtili, Jehová techiljuia nochi tlen moneki tijmatisej. Kema tikilnamikij amo uelis tijmatisej nochi, techpaleuia amo ma timotekipachokaj ika tlen amo tijmatij, uan timosentlaliaj ipan tlen kena ipati. Kiampa tijnextiaj timotemachiaj ipan Jehová katli kipia “miak tlalnamikistli tlen tlauel kuali” (Job 36:4). Maske ipan ni tonali amo tijmatij miak tlamantli, tiyolpakij kema timoyoliljuiaj teipa nochipa tijyekojtiasej sekinok tlamantli tlen toUeyiteko Jehová (Ecl. 3:11).
UIKATL 104 ToTeotsij itonal techyolchikaua
a Jesús tlayakanas kema kitsontlamiltis nochi tlen Satanás kinauatia. Yeka, uelis tikijtosej nama ya kimati tlake tonali mochiuas Armagedón uan kema tlatlanis (Apoc. 6:2; 19:11-16).
b TLEN NESI IPAN TLAIXKOPINKAYOMEJ: Se tetaj iuaya iokichpil kitlaliaj se keski tlamantli ipan ininmochila de emergencia.
c TLEN NESI IPAN TLAIXKOPINKAYOMEJ: Se toikni katli kiixnamiktok tlaouijkayotl moyoliljuia kenijkatsa tlauel yolpakis kema itstos ipan yankuik Tlaltipaktli.