¿Kenke moneki timonechikosej?

1-3. 1) ¿Kenijkatsa tijmatij toTeotsij itekipanojkauaj tlauel kipatiitaj monechikosej? (Xikita nopa achtoui tlaixkopinkayotl). 2) ¿Tlake tikixtomasej ipan ni tlamachtili?

KEMA Corinna kipixtoya 17 xiuitl, inana kitsajkej uan kiuikakej uejka kampa kichiualtiyayaj ma tekiti. Teipa Corinna nojkia kiitskijkej uan kiuikakej Siberia, se altepetl tlen tlauel uejka mokauayaya. Nopaya kichiualtijkej ma tekiti kampa kinpixtoyaj tlapialmej. Kemantika kichiualtiyayaj ma tekiti kalteno kampa tlauel tlaseseyayaya, uan amo kipixtoya tlen ika mopikis. Maske kiampa itstoya, Corinna iuaya seyok toikni mosentlalijkej yasej tlanechikoli.

² Corinna kiijtoua: “Tikistejkej kema nechka tlayouiaskia uan tinejnenkej 25 kilómetros, kiampa tiasitoj kampa kisayaya se tren. Nopa tren kiski a las dos de la mañana, uan uejkajki chikuasej horas. Kema titemokej, nojua tinejnenkej seyok 10 kilómetros, kiampa tiasitoj kampa timonechikoskiaj”. Corinna tlauel yolpajki pampa yajki tlanechikoli. Ya kiijtok: “Ipan tlanechikoli timomachtijkej pilamochtsi Tlen Tematiltia uan sentik tiuikakej. Tlen tijchijkej ipan nopa tonali tlauel techyolchikajki uan techpaleuik kuali ma titlaneltokakaj”. Nopa omej toikniuaj sampa tlakuepilijkej kampa itstoyaj, uan nopa tlakatl katli tlamokuitlauiyaya amo kimatki tlaj amo itstoyaj eyi tonali.

³ ToTeotsij itekipanojkauaj tlauel kipatiitaj monechikosej. Cristo itokilijkauaj tlauel kinekiyayaj monechikosej uan kiampa kiueyichiuaskiaj toTeotsij uan kuali kiixmatiskiaj (Hech. 2:42). Maske ta nojkia tlauel tijneki tias tlanechikoli, uelis mitspano kej sekij toikniuaj uan amo nochipa ueli timonechikoua. Uelis moneki titekitis miak horas, uelis tlauel timotekiuijtok o tlauel tisiajtok. Yeka, ¿tlake techpaleuis nochipa timonechikosej?^[1] (Xikita nopa nota kampa tlami ni tlamachtili). ¿Kenijkatsa uelis tikinpaleuisej katli tikinmachtiaj uan sekinok maseualmej nojkia ma monechikokaj? Ipan ni tlamachtili tikitasej eyi tlamantli: ¿Kenijkatsa techpaleuia kema timonechikouaj? ¿Kenijkatsa kinpaleuia sekinok kema timonechikouaj? ¿Kenijkatsa kiyolmati Jehová kema timonechikouaj?^[2] (Xikita nopa nota kampa tlami ni tlamachtili).

¿KENIJKATSA TECHPALEUIA KEMA TIMONECHIKOUAJ?

4. ¿Kenijkatsa techpaleuia kuali ma tikixmatikaj Jehová kema timonechikouaj?

⁴ Kema timonechikouaj techmachtiaj miak tlamantli. Nopa tlanechikoli tlen mochiua sejse chikueyi techpaleuia kuali ma tikixmatikaj Jehová. Ipan miak tlanechikoli momachtijkej nopa amochtli Acerquémonos a Jehová. ¿Kenijkatsa kiyolmatkej toikniuaj kema kiixtomayayaj nochi kuajkuali tlamantli tlen Jehová kinextia? ¿Kenijkatsa kiyolmatkej kema sekinok toikniuaj tlanankiliyayaj? Tlen momachtijkej kinpaleuik nojua tlauel ma kiiknelikaj Jehová. Ipan tlanechikoli nojkia techpaleuia nojua kuali ma tijkuamachilikaj Biblia kema kuali tijtlakakiliaj se tlamachtili, kema kinextiaj kenijkatsa titlajtolmoyauasej o kema kipouaj se texto (Neh. 8:8). Uan nojkia tijyekouaj miak tlamachtili kema tijpouaj tlen mopouas ipan Biblia sejse chikueyi, uan nojkia kema toikniuaj kiijtouaj ipan tlanechikoli tlen inijuantij momachtijkej.

5. ¿Kenijkatsa tlanechikoli techpaleuia ma tijchiuakaj ipan tonemilis tlen Biblia kiijtoua?

⁵ Tlen timomachtiaj ipan tlanechikoli techpaleuia ma tijchiuakaj ipan tonemilis tlen Biblia kiijtoua (1 Tes. 4:9, 10). Uelis tlen timomachtijkej ipan pilamochtsi Tlen Tematiltia, techpaleuik nojua kuali ma tijtekipanokaj Jehová, nojua kuali ma timomaijtokaj o ma tijtlapojpoljuikaj se toikni katli techyolkokok. Uan ipan sekinok tlanechikoli techmachtiaj kenijkatsa kuali titlajtolmoyauasej uan tikinmachtisej sekinok (Mat. 28:19, 20, TNM).

6. ¿Kenijkatsa timoyolchikauaj kema timonechikouaj?

⁶ Kema timonechikouaj, timoyolchikauaj. Maske Satanás kineki amo kuali ma titlaneltokakaj uan ayokmo ma tijnekikaj tijtekipanosej toTeotsij, kema timonechikouaj tlauel techpaleuia uan techyolchikaua (xijpoua Hechos 15:30-32). Nopaya moixtoma kenijkatsa moaxitijtok miak tlajtolpanextili, uan nopa techpaleuia ma timotemachikaj Jehová nelia kichiuas tlen kiijtojtok. Nojkia toikniuaj tlauel techyolchikauaj kema tlamachtiaj, kema kinextiaj kenijkatsa titlajtolmoyauasej, kema tlanankiliaj uan kema uikaj ika nochi ininyolo (1 Cor. 14:26). Nojkia timoyolchikauaj kema tikamanaltij ininuaya toikniuaj kema ayamo peua uan kema tlami tlanechikoli, pampa tikitaj itstokej miakej touampoyouaj katli nelia tlauel techikneliaj (1 Cor. 16:17, 18).

7. ¿Kenke moneki nochipa timonechikosej?

⁷ Kema timonechikouaj, toTeotsij techpaleuia ika itonal. Jesús kiyakana tlanechikoli ika toTeotsij itonal. Ya kiijtok: “Xijtlakakilikaj uan xijmachilikaj tlen itonal toTeko kiniljuia tlaneltokanij” (Apoc. [Rev.] 2:7). ToTeotsij itonal techpaleuia amo ma tijchiuakaj tlen amo kuali, amo ma timajmauikaj kema titlajtolmoyauaj uan kuali ma tijtlapejpenikaj tlen tijchiuasej. Yeka tlauel moneki nochipa timonechikosej, kiampa toTeotsij techpaleuis ika itonal.

¿KENIJKATSA KINPALEUIA SEKINOK KEMA TIMONECHIKOUAJ?

8. ¿Tlake tijnextiaj kema timonechikouaj? (Xikita nopa recuadro “Kuali kiyolmati kema tlakuepilia”).

⁸ Kema timonechikouaj, tikinnextiliaj toikniuaj tikinikneliaj. Miakej toikniuaj kipiaj miak tlaouijkayotl, yeka apóstol Pablo kiijtok “ma tijtemokaj kejatsa timosemakasej se ika seyok” (Heb. 10:24, 25). Kema timonechikouaj, tijnextiaj tikinikneliaj pampa ueli tikinyolchikauaj. Nojkia tijnextiaj tijnekij tiitstosej ininuaya, tikamanaltisej ininuaya uan tijnekij tijmatisej kenijkatsa itstokej. Nojkia tikinyolchikauaj kema titlanankiliaj ipan tlanechikoli uan kema tiuikaj ika nochi toyolo (Col. 3:16).

9, 10. 1) ¿Kenijkatsa techpaleuia ma timonechikokaj tlen Jesús kiijtok ipan Juan 10:16? 2) Tlaj nochipa timonechikouaj, ¿kenijkatsa kinpaleuia toikniuaj katli ininseltsitsij kitekipanouaj Jehová?

⁹ Kema timonechikouaj, nochi sansejko tiitstokej (xijpoua Juan 10:16). Jesús kiijtok yaya eliyaya kej se tlamokuitlauijketl uan itokilijkauaj kej pilborregojtsitsij tlen sansejko itstokej. Nopa tlapialmej nochipa sansejko itstokej uan nochipa kitokiliaj katli kinmokuitlauia. Ximoiljui ni: tlaj omej pilborregojtsitsij itstoskiaj tlamimiltipa, omej itstoskiaj tlamayaj uan se sejkanok itstoskia, ¿tikijtoskia nopa makuiltij pilborregojtsitsij sansejko itstokej? Ipan tlanechikoli nojkia kiampa pano, tlaj tijnekij ‘tiitstosej sansejko’ uan tijtokilisej Jesús, moneki nochipa timonechikosej uan tiitstosej ininuaya toikniuaj.

¹⁰ Kema tiauij tlanechikoli techpaleuia sansejko ma tiitstokaj uan ma timoiknelikaj kej kema tiitstokej ininuaya tochampoyouaj (Sal. 133:1). Sekij toikniuaj inintatauaj o ininikniuaj ayokmo kinikneliaj pampa kitekipanouaj Jehová. Jesús kiijtok inijuantij kipiaskiaj ininchampoyouaj katli tlauel kinikneliskiaj uan kinpaleuiskiaj (Mar. 10:29, 30). Tlaj nochipa timonechikosej, nopa toikniuaj techitasej kej tiinintatauaj o tiininikniuaj uan moyolchikauasej. Tlaj nochipa tikilnamikisej ni, nochipa tijchiuasej kampeka tiasej tlanechikoli.

¿KENIJKATSA KIYOLMATI JEHOVÁ KEMA TIMONECHIKOUAJ?

11. ¿Tlake tijchiuaj kema timonechikouaj?

¹¹ Kema timonechikouaj, tijmakaj Jehová tlen kinamiki. Pampa Jehová techchijchijki, kinamiki tijtlaskamatilisej, tijueyichiuasej uan tijtlepanitasej (xijpoua Apocalipsis 7:12). Ni tijchiuaj kema timomaijtouaj, kema tiuikaj uan kema tikijtouaj kenijkatsa eli Jehová. Uelis tijueyichiuasej Jehová sejse chikueyi.

12. ¿Kenijkatsa kiyolmati Jehová kema kiita tijchiuaj kampeka tijneltokasej?

¹² Jehová kichijki ma tiitstokaj, yeka kinamiki tijneltokasej tlen technauatia. Ya kineki nochipa ma timonechikokaj, pampa kimati nechka kitsontlamiltis tlen amo kuali. Uan kema kiita tijneltokaj, nelia tlauel yolpaki (1 Juan 3:22). Jehová kimati tijchiuaj kampeka timonechikosej, yeka tlauel kipatiita (Heb. 6:10).

13, 14. ¿Kenke tijnechkauiaj Jehová uan Jesús kema tiauij tlanechikoli?

¹³ Kema timonechikouaj, tijnextiaj nojua tijnekij tijnechkauisej Jehová uan iKone. Ipan tlanechikoli timomachtiaj Biblia uan tijmatij tlake kineki Jehová ma tijchiuakaj (Is. 30:20, 21). Miakej katli amo kitekipanouaj Jehová uan yauij tlanechikoli nima kiitaj toTeotsij techyakana (1 Cor. 14:23-25). Jehová kiyakana tlanechikoli ika itonal, yeka nochi tlen nopaya tijyekouaj yaya techmachtia. Uajka, kema tiauij tlanechikoli tijtlakakiliaj toTeotsij uan tikitaj kenijkatsa tlauel techiknelia, yeka nojua tijnechkauiaj.

¹⁴ Jesús, katli kiyakana tlanechikoli kiijtok: “Kampa mosentiliaj [...] omej o eyij, na niitstok ininuaya” (Mat. 18:20). Biblia nojkia kiijtoua Jesús nemi “tlatlajko” tlanechikoli (Apoc. 1:20–2:1). Uajka Jehová uan Jesús itstokej touaya uan techyolchikauaj kema timonechikouaj. ¿Timoiljuia kenijkatsa kiyolmati Jehová kema kiita tijchiua kampeka tijnechkauis ya uan iKone?

15. ¿Kenke kema timonechikouaj tijnextiliaj Jehová tijnekij tijneltokasej?

¹⁵ Kema timonechikouaj, tijnextiliaj Jehová tijnekij tijneltokasej. Maske Jehová technauatia ma timonechikokaj, ya amo techchiualtia ma tijneltokakaj (Is. 43:23). Ya kikaua tojuantij ma tijtlapejpenikaj tlaj tijneltokasej o amo. Ximoiljui ni: ¿Tlake tijchiuaskia tlaj amo ueliskia tias tlanechikoli pampa katli tijtekipanoua mitsiljuia ximokaua xitekiti? ¿Tlake tijchiuaskia tlaj tekichiuanij kiijtouaj mitstsakuasej, mitstlatsakuiltisej o moneki titlaxtlauas pampa timonechikoua? ¿Tlake tijchiuaskia tlaj amo tijneki tias tlanechikoli pampa tijneki tijchiuas seyok tlamantli? Tlaj tijtlapejpenisej tijneltokasej Jehová, tijnextilisej nelia tikikneliaj uan tijnextisej tijmatij yaya kinamiki kiijtos tlake tijchiuasej (Rom. 6:17; Hech. 5:29). Kema tijchiuaj nopa, Jehová tlauel yolpaki (Prov. 27:11).

NOCHIPA MA TIMONECHIKOKAJ

16, 17. 1) ¿Kenijkatsa tijmatij Cristo itokilijkauaj tlauel kipatiitayayaj monechikosej? 2) ¿Tlake kiyolmatiyaya toikni George Gangas kema monechikouayaya?

¹⁶ Kema ya panotoya nopa iljuitl Pentecostés, xiuitl 33, Cristo itokilijkauaj nochipa “kitlakakiliyayaj nochi tlen nopa tlayolmelauanij kinmachtiyayaj” uan “sansejko” kiueyichiuayayaj Jehová (Hech. 2:42). Inijuantij nochipa monechikouayayaj, maske katli tlanauatiyayaj ne Roma uan katli tlayakanayayaj ipan religión judía amo kinkauiliyayaj ma monechikokaj. Maske ouij, kichijkej kampeka nochipa monechikosej.

¹⁷ Ipan ni tonali nojkia tlauel tijtlaskamatiliaj Jehová pampa timonechikouaj. Toikni George Gangas, katli 22 xiuitl tlatekipanok kej se tlen katli kinyakanayaya Jehová itlajtoltemakauaj, kiijtok: “Tlauel nechyolchikaua niitstos ininuaya toikniuaj, nopa tlauel nechpakilismaka. Nechpaktia nima niasis ipan tlanechikoli uan amo nima nias kema tlami. Kuali nijyolmati kema nikamanalti ininuaya toikniuaj. Kema niitstok ininuaya, nijmati kejuak niitstoskia ininuaya nochampoyouaj pampa nochi tlauel timoikneliaj. Tlauel nijneki nochipa niitstos ininuaya ipan tlanechikoli”.

18. ¿Kenke tijpatiita timonechikos, uan tlake timosentlalijtok tijchiuas?

¹⁸ ¿Nojkia tijyolmati kej toikni Gangas? Uajka, xijchiua kampeka nochipa tiitstos ininuaya toikniuaj ipan tlanechikoli maske kemantika tijmatis ouij tias. Xijnextili Jehová nojkia tijyolmati kej David, katli kiijtok: “Tlauel nikiknelia mochaj kampa tiitstok” (Sal. 26:8).