ToTeotsij itekipanojkauaj nojkia tikixnamikij tlaouijkayotl uan timokokouaj kej sekinok maseualmej. Nojkia techtlatsakuiltiaj katli amo kinekij ma tijtekipanokaj toTeotsij. Maske Jehová kikaua ma tikixnamikikaj tlaouijkayotl, ya kiijtojtok techpaleuis (Is. 41:10). Jehová uelis techpaleuis ma tiyolpakikaj, kuali ma tijtlapejpenikaj tlen tijchiuasej uan amo ma tijtlauelkauakaj maske tikixnamikisej uejueyi tlaouijkayotl. Jehová kiijtojtok techmakas “tlaseuilistli” ipan toyolo (Filip. 4:6, 7). Tijpiaj nopa tlaseuilistli pampa timouampojchijtokej iuaya Jehová, uan maseualmej amo uelij kikuamachiliaj kenke kiampa tijyolmatij. Uelis se tonali tlauel timomaijtok pampa tlauel timotekipachojtoya uan kema titlanki, ayokmo kiampa tijyolmatki pampa Jehová mitsmakak tlaseuilistli. w24.01 20 párr. 2; 21 párr. 4

Katli kiikneliaj Dios kinekij kiueyichiuasej itoka ika nochi ininyolo. Tlanauatijketl David kuali kimatiyaya kema kiueyichiuayaya itoka Jehová, nojkia kiueyichiuayaya Jehová. Kema kamanaltiyaya tlen Jehová itoka, nojkia kiijtouayaya kenijkatsa eli, tlake kuajkuali tlamantli kinextia uan tlake kichijchijtok. David kinekiyaya kinextis Jehová itoka eli tlatsejtseloltik uan kinekiyaya kiueyichiuas. Yeka, kiijtok nochipa kiampa kichiuaskia ika nochi iyolo. Levitas nojkia kiueyichijkej Jehová uan nojkia kiijtojkej ayokmo kipantiyayaj tlake tlajtoli kitekiuisej para kiueyichiuasej pampa itoka Jehová eli tlauel tlatsejtseloltik (Neh. 9:5). ¡Jehová tlauel yolpaki kema kikajki levitas kiueyichiuayayaj ika nochi ininyolo! w24.02 9 párr. 6

Jehová nojua kuali mitsitas maske amo tijchijki nopa tlamantli tlen amo tiueliskia (2 Cor. 8:12). Kema tikixnamiki se tlaouijkayotl, xijchiua kampeka tijyekos sekinok tlamantli. Xikilnamiki tlen ya tijchijki. Biblia kiijtoua Jehová “axkiilkauas nopa tekitl tlen inkichijtokej” (Heb. 6:10). Uajka, nojkia xikilnamikto tlen ya tijchijki. Ximoiljui kenijkatsa tijchijki se keski tlamantli tlen timosentlalijtoya, kej kema pejki timouampojchiua iuaya Jehová, kema pejki titlajtolmoyaua uan kema timoatsonpoliuiltik. Tlen ya tijchijki, kinextia uelis tijchiuas sekinok tlamantli tlen timosentlalijtok. Ika Jehová itlapaleuil uelis tijchiuas tlen timosentlalijtok. Nojkia uelis tiyolpakis kema tikitas kenijkatsa Jehová mitspaleuia pampa tijchiua kampeka tijchiuas tlen timosentlalijtok (2 Cor. 4:7). Tlaj nojua tijchijtos kampeka, tikitas kenijkatsa Jehová tlauel mitsteochiuas (Gál. 6:9). w23.05 31 párrs. 16-18